Read bahnar I Kor 15 Bible Online

I Kor 15 - bahnar bible

I Kor 15

¹Ơ lu 'nhŏng oh, 'nâu inh wă tơ'blŏk ăn kơ iĕm tơdrong 'nao 'lơ̆ng mă inh đei bơtho ăn kơ lu iĕm boih, lu iĕm lui boih păng oei kơjăp lăm tơdrong lui dang ei 'noh.

²Yua kơ tơdrong 'nao 'lơ̆ng 'nâu, na iĕm gơh klaih. Dang ei đĭ kơ iĕm hăm oei răk tơdrong 'nao 'lơ̆ng mă đêl inh bơtho kơ lu iĕm dah ưh? Tơ̆ng ưh, tơdrong lu iĕm lui ưh kơ đei yua kiơ ôh.

³Inh bơtho kơ iĕm sơ̆ tơdrong mă kăl dêh đêl Kră Yang Yêsu Krist ăn kơ inh, khan 'Bok Krist lôch yua kơ tơdrong yoch bơ̆n 'blep thoi đe chih khan lê̆ hơdrol boih lăm sơ̆p hla bơar 'Bok Kei-Dei.

⁴Đe 'bŭ Sư; kơtĕch pêng năr Sư iung arih dơ̆ng 'blep thoi đe chih khan lê̆ hơdrol boih lăm sơ̆p hla bơar 'Bok Kei-Dei tơpă.

⁵Klaih kơ noh Yêsu Krist tơ'bôh akâu Sư kơ Pêtrôs păng tơ'bôh kơ mơjĭt-'bar 'nu jơ̆ng 'bang Sư.

⁶Đơ̆ng noh lăm minh 'măng Sư tơ'bôh kơ loi pơđăm-hrĕng 'nu bơngai lui kơ Sư. Mă lu bơngai 'noh dang ei kư̆m oei arih, kư̆m đei mơ'nah lôch mơ̆n.

⁷Đơ̆ng noh dơ̆ng Sư tơ'bôh kơ Yakơ păng đĭ-đăng bơngai jơ̆ng 'bang Sư.

⁸'Bơ̆t tuch-luch Sư tơ'bôh kơ inh, inh thoi lĕ kơ minh 'nu kon nge đe tơpŭ hloh kơ khei 'năr,

⁹yua kơ inh bơngai jơ̆ng 'bang iĕ hloh kơ lu jơ̆ng 'bang nai. Inh ưh kơ hơnhŏ đe krao inh jơ̆ng 'bang Sư ôh, yua kơ inh đei pơrăm lu bơngai lui kơ 'Bok Kei-Dei.

¹⁰Mă-lei 'Bok Kei-Dei mơnat kơ inh. 'Bok Kei-Dei mơnat kơ inh ưh kơ sĭ Sư mơnat đĕch ôh, Sư tơgŭm ăn kơ inh bơ̆jang lơ hloh kơ lu đe nai. Mă-lei ưh kơ trŏ kơ inh kơdih ôh, 'noh yua kơ đơ̆ng 'Bok Kei-Dei mơnat na Sư tơgŭm ăn kơ inh.

¹¹Dôm tơdrong inh 'nao bơtho iĕm hei gah tơdrong Yêsu Krist iung arih đơ̆ng lôch, dôm lu nhôn bơngai jơ̆ng 'bang, mă inh, mă lu sư, tơdrong bơtho lu nhôn lei-lăi đĕch păng tơdrong lui iĕm kư̆m lei-lăi thoi noh mơ̆n.

¹²Thoi noh dah nhôn bơtho khan Yêsu Krist iung arih đơ̆ng lôch, lei lơliơ lăm lu iĕm mơ'nah khan ưh kơ đei bu gơh iung arih đơ̆ng lôch?

¹³Dah ưh kơ đei bu gơh iung arih, lei Yêsu Krist kư̆m ưh kơ đei iung arih ôh.

¹⁴Dah Yêsu Krist ưh kơ iung arih đơ̆ng lôch, thoi noh tơdrong nhôn bơtho jing tơdrong kơđei păng bơ̆n ưh kơ gơh gơnang kơ Yêsu ôh.

¹⁵Dah ưh kơ đei bu iung arih đơ̆ng lôch, thoi noh 'Bok Kei-Dei kư̆m ưh kơ tơiung arih Yêsu Krist ôh păng lu nhôn dang lĕ bơngai pơm kơdranh hơlĕnh kơ 'Bok Kei-Dei đĕch, yua kơ nhôn khan 'Bok Kei-Dei tơiung arih Yêsu Krist đơ̆ng lôch boih.

¹⁶Dah ưh kơ đei bu gơh iung arih đơ̆ng lôch, thoi noh Yêsu Krist kư̆m ưh kơ gơh iung arih đơ̆ng lôch mơ̆n.

¹⁷Dah Yêsu Krist ưh kơ iung arih đơ̆ng lôch, thoi noh tơdrong lui iĕm ưh kơ đei yua kiơ păng iĕm kư̆m oei jrok kiơ̆ tơdrong yoch.

¹⁸Păng mă lu bơngai lui kơ Yêsu Krist, lu sư lôch boih, lu sư kư̆m hơdai hiong hiach mơ̆n.

¹⁹Bơ̆n lui kơ Yêsu Krist, bơ̆n gô arih ling-lang, mă-lei dah kiơ̆ kơ đe khan ưh kơ đei arih ling-lang, lei tơdrong arih bơ̆n 'noh pơmat-tat hloh kơ lu bôl nai đĕch.

²⁰Mă tơpă 'Bok Kei-Dei tơiung arih Yêsu Krist boih, thoi noh bơ̆n băt 'Bok Kei-Dei kư̆m wă tơiung arih lu bơ̆n mơ̆n. Pơtih gia, Yêsu Krist thoi lĕ 'ba hrôih kơ lu bơngai mă lôch boih.

²¹Tơdrong lôch yua kơ đơ̆ng minh 'nu bơngai pơm yoch sơ̆, na đĭ-đăng bơngai gô lôch ngăl. Kư̆m thoi noh mơ̆n, yua kơ đei minh 'nu bơngai gơh iung arih đơ̆ng lôch, na ning-mônh kon bơngai bơ̆n gô iung arih kư̆m lei-lăi thoi Sư mơ̆n.

²²Yua kơ bơ̆n đơ̆ng kon sâu 'bok Ađam, na đĭ-đăng bơngai lôch ngăl. Thoi noh mơ̆n, yua kơ bơ̆n lui kơ Yêsu Krist na đĭ-đăng bơ̆n ning-mônh 'Bok Kei-Dei kư̆m wă tơiung arih mơ̆n.

²³Rim 'nu kơ bơ̆n athei gô lăp kơ khei 'năr. Yêsu Krist Sư thoi lĕ kơ 'ba hrôih, Sư iung arih hơdrol kơ bơ̆n. Mưh lăp kơ khei 'năr Sư wă jur tơ ala teh âu, đĭ-đăng bơngai lui iung arih kiơ̆ Sư.

²⁴'Bơ̆t 'noh boih năr tôch, na dôm lu bơngai juăt kơ pơgơ̆r păng dôm lu yang nai mă hơdai wang 'maih pơgơ̆r, năr 'noh kơnh lu sư gô thuơ kơ Yêsu Krist đĭ na Yêsu gô pơjao ăn kơ 'Bă Sư pơgơ̆r đĭ-đăng tôm tơdrong.

²⁵'Bok Kei-Dei ăn kơ Yêsu pơgơ̆r truh tơ Sư blah rôp ba dôm lu bơngai mă ayăt kơ Yêsu lê̆ tơ kơnơl jơ̆ng Sư.

²⁶Mă tuch-luch ning-mônh 'Bok Kei-Dei gô pơrăm tôm tơdrong kơnê̆ na bơ̆n ưh pă lôch dơ̆ng.

²⁷Bơ̆n băt kơ 'Bok Kei-Dei wă pơrăm tôm tơdrong kơnê̆ yua kơ sơ̆p hla bơar Sư đei khan: “'Bok Kei-Dei wă ăn kơ Kon Sư pơgơ̆r tôm tơdrong.” Mă-lei ưh kơ sĭ Yêsu Krist wă pơgơ̆r 'Bă Sư hai ôh.

²⁸'Bok Kei-Dei ăn kơ Kon Sư pơgơ̆r tôm tơdrong đang boih, na Kon Sư pơjao ăn kơ 'Bă Sư pơđĭ tôm tơdrong păng ăn kơ 'Bă Sư pơgơ̆r akâu Sư hai.

²⁹Bĭ tơdrong âu dơ̆ng, lu bơngai mă iŏk 'batem boih, lu sư wă iŏk tang lu bơngai lui mă lôch boih ưh kơ tam iŏk 'batem, na dah lu bơngai lôch ưh kơ iung arih lei lơliơ sư wă iŏk 'batem tang lu bơngai lôch?

³⁰Gah inh đe ling-lang wă pơm kơnê̆ kơ inh kơlih kơ inh adrin jang tơdrong 'Bok Kei-Dei. Na dah inh lôch ning-mônh ưh kơ đei iung arih đơ̆ng lôch, lei thoi yơ inh wă adrin jang thoi dang ei?

³¹Ơ 'nhŏng oh, inh wă roi tơbăt ăn kơ iĕm gah tơdrong đe wă pơrăm inh, na rim năr ưh kơ băt năr ayơ inh lôch, mă-lei inh hiôk tơpă lăm jơhngơ̆m inh yua kơ iĕm lui kơjăp kơ Kră Yang bơ̆n Yêsu Krist boih, na inh mah roi tơbăt ăn kơ iĕm thoi noh.

³²Inh đei tơdrong gleh truh kơ inh tơ Pơlei Êphêsô dang lĕ inh tơblah păng sem bri. Dah inh adrin tơblah păng sư, mă-lei inh ưh kơ tơchĕng tơdrong inh gô iung arih ning-mônh, lei tơdrong inh adrin 'noh ưh kơ đei yua kiơ kơ inh ôh. Dah 'Bok Kei-Dei ưh kơ tơiung arih lu bơngai bơ̆n đơ̆ng lôch, lei bơ̆n kuă kơ kiơ kơ sa et phĭ mah rơkah rơkai chă tơdrong hiôk ling-lang, yua kơ bơ̆n wă lôch hiong hiơt thoi ei?

³³Iĕm 'nĕ kơ lui kơ lu bơngai wă pơlung iĕm, khan 'Bok Kei-Dei ưh kơ wă tơiung arih bơngai lôch, kơnh đơ̆ng bơngai 'lơ̆ng oei hơdai bơngai kơnê̆ sư jing kơnê̆ lei-lăi.

³⁴Iĕm athei tơbral tơdrong yoch na jing 'lơ̆ng 'nĕ pă pơm tơdrong yoch đơ̆ng âu tơ anăp. Lu iĕm mơ'nah ưh kơ hlôh wao tơdrong 'Bok Kei-Dei thoi yơ na iĕm mơlâu ưh?

³⁵Pơtih gia đei bơngai jet pơngiĕl khan: “Lơliơ bơngai lôch khan gơh iung arih dơ̆ng? Akâu bơ̆n jing thoi yơ dơ̆ng?”

³⁶Bơngai bu jet thoi noh bơngai 'noh sư ưh kơ hlôh ôh. Bơ̆n rei adrĕch tơ teh, sư lôch 'mơ̆i klaih kơ noh sư gô chăt.

³⁷Gah tơdrong bơ̆n rei adrĕch, pơtih gia adrĕch 'ba dah adrĕch găr nai, bơ̆n rei pôm găr sư đĕch tơ teh, ưh kơ sĭ bơ̆n hơloh rei tơnơm sư hloi ôh. Bơ̆n rei găr sư 'mơ̆i na đơ̆ng rŏng sư chăt jing đei tơnơm.

³⁸Kră Yang 'Bok Kei-Dei ăn kơ rim adrĕch chăt hla kiơ̆ thoi Sư pơjing sơ̆, rim adrĕch đei tơnơm phara kơdih kơdih.

³⁹Na akâu kon bơngai, akâu kon sem brem kư̆m phara kiơ̆ kơ khŭl sư mơ̆n; akâu kon bơngai pha, akâu kon sem brem pha, akâu sem păr pha, akâu ka kư̆m pha mơ̆n.

⁴⁰Dôm tơmam tơ kơpal plĕnh ti, wă khan thoi lĕ kơ sơnglŏng, sư pha; dôm tơmam Sư pơjing tơ ala teh âu pha. Gah tơdrong 'lơ̆ng rŏ sư, tơdrong 'lơ̆ng rŏ khei sơnglŏng sư 'lơ̆ng rŏ, mă tơmam ala teh sư kư̆m 'lơ̆ng rŏ mơ̆n, mă tơdrong 'lơ̆ng rŏ sư phara.

⁴¹Măt 'năr sư 'lơ̆ng rŏ, măt khei kư̆m 'lơ̆ng rŏ mơ̆n, mă lu sơnglŏng kư̆m 'lơ̆ng rŏ mơ̆n, mă tơdrong 'lơ̆ng rŏ sư phara. Sơnglŏng 'noh 'lơ̆ng rŏ thoi noh, sơnglŏng to 'lơ̆ng rŏ thoi to.

⁴²Gah tơdrong iung arih đơ̆ng lôch kư̆m lei-lăi thoi noh mơ̆n. Akâu kon bơngai bơ̆n iung arih ning-mônh phara, ưh kơ thoi akâu bơ̆n mă oei arih dang ei ôh. Akâu bơ̆n lôch boih na đe 'bŭ akâu bơ̆n tơ teh, mưh 'Bok Kei-Dei tơiung arih bơ̆n ning-mônh Sư wă ăn kơ bơ̆n akâu 'nao pran kơtang ưh kơ layơ lôch.

⁴³Đe 'bŭ akâu bơ̆n tơ teh ưh pă yua kiơ dơ̆ng, mă-lei mưh Sư tơiung arih, akâu bơ̆n jing 'lơ̆ng rŏ. Đe 'bŭ akâu bơ̆n tơ teh ưh kơ pran ôh, mă-lei mưh Sư tơiung arih, akâu bơ̆n jing pran.

⁴⁴Akâu bơ̆n mă đe 'bŭ tơ teh, na sơ̆ akâu bơ̆n noh akâu bơngai ala teh, bơ̆n gơh tơbôl hăm bơngai ala teh, gơh pơma dơnuh hăm bơngai ala teh; mă-lei mưh Sư tơiung arih bơ̆n ning-mônh, bơngai bơ̆n đei akâu 'nao gơh oei hơdai hăm Yang, tơbôl hăm Yang. Dah kon bơngai bơ̆n đei akâu tơ ala teh âu, bơ̆n kư̆m gô đei akâu tơ plĕnh ti mơ̆n.

⁴⁵Yua kơ thoi noh na lăm sơ̆p hla bơar 'Bok Kei-Dei đe đei chih boih thoi âu: “Bơngai kơ đĭ-đăng hơdrol sơ̆ jĭ 'bok Ađam, 'Bok Kei-Dei ăn kơ sư đei akâu đei jơhngơ̆m wă kơ gơh arih.” Na 'bok Ađam mă hơtuch âu, wă khan Yêsu Krist, Sư Yang wă anhăk đĭ-đăng kon bơngai oei hơdai hăm Sư arih ling-lang.

⁴⁶Bơ̆n ưh kơ gơh đei akâu wă tơbôl hơdai hăm Yang hơdrol ôh, bơ̆n gơh tơbôl hăm bơngai bơ̆n 'mơ̆i hơdrol, klaih kơ noh na gơh tơbôl kơ Yang dơ̆ng.

⁴⁷Bơngai kơ đĭ-đăng hơdrol sơ̆, sư đơ̆ng 'Bok Kei-Dei pơjing sư păng teh, man sư păng 'mui teh; na bơngai mă 'bar 'noh Sư jur đơ̆ng plĕnh.

⁴⁸Bơngai mă 'Bok Kei-Dei man sư păng 'mui teh, đĭ-đăng kon bơngai ala teh kư̆m lei-lăi thoi sư ngăl; bơngai mă jur đơ̆ng plĕnh, wă khan Yêsu Krist, na đĭ-đăng lu bơngai lui kơ Sư kư̆m lei-lăi thoi Sư mơ̆n ning-mônh.

⁴⁹Kư̆m thoi bơ̆n đei kơdih boih akâu đơ̆ng 'Bok Kei-Dei man păng teh, na ning-mônh bơ̆n kư̆m đei lei-lăi thoi akâu Yêsu mă jur đơ̆ng plĕnh mơ̆n.

⁵⁰Ơ 'nhŏng oh, inh khan kơ iĕm tơpă, sĕch akar kon bơngai bơ̆n ưh kơ gơh oei tơ dêh char 'Bok Kei-Dei ôh, yua kơ sĕch akar bơ̆n juăt kơ ôm hach. Tơ dêh char Sư ưh kơ đei kiơ jing ôm hach.

⁵¹Na dang ei inh wă khan ăn kơ iĕm minh tơdrong hrĕp tam mă tơbăt kơ đe đơ̆ng sơ̆: Kon bơngai bơ̆n, 'Bok Kei-Dei ưh kơ ăn lôch đĭ ôh, đĭ-đăng kơ bơngai mă lôch mă oei arih tơplih hloi akâu 'nao. Kơđei kơ minh tơtĕp măt, lăp bơ̆n kơtơ̆ng đe hlôm keng năr tôch; đe hlôm na bơngai lôch iung arih hloi ưh pă đei ôm hach boih, na bơ̆n mă oei arih kư̆m tơplih hloi akâu 'nao mơ̆n.

⁵²

⁵³Yua kơ akâu bơ̆n ling-lang kơ ôm hach na bơ̆n athei iŏk tơplih akâu 'nao mă ưh kơ layơ ôm hach; akâu bơ̆n ling-lang kơ lôch bơ̆n athei iŏk tơplih akâu 'nao mă ưh kơ layơ lôch.

⁵⁴Thoi noh akâu bơ̆n mă ling-lang kơ ôm hach, iŏk tơplih boih akâu 'nao mă ưh kơ ôm hach, akâu bơ̆n ling-lang kơ lôch, iŏk tơplih boih akâu 'nao mă ưh kơ lôch, 'noh 'blep trŏ thoi đe chih khan lê̆ hơdrol sơ̆ thoi âu: “Tơdrong lôch ưh pă đei boih, jei bơ̆n boih.”

⁵⁵“Ơ tơdrong lôch, tơ yơ jei e? Ơ tơdrong lôch, tơ yơ e gơh pơrăm nhôn dơ̆ng?”

⁵⁶Tơdrong yoch pơm kơ bơ̆n lôch răm păng yua kơ bơ̆n ưh kơ kĕ kiơ̆ tơdrong juăt 'Bok Kei-Dei, na bơ̆n yoch rai dêh.

⁵⁷Mă-lei bơnê kơ 'Bok Kei-Dei Sư mơnat ăn jei bơ̆n yua kơ Kră Yang bơ̆n Yêsu Krist lôch tang bơ̆n.

⁵⁸Ơ 'nhŏng oh inh mă 'mêm kơeng, kơlih kơ thoi noh boih na iĕm athei adrin lui mă kơjăp 'nĕ pơm đon ngĭl ngŭl păng iĕm athei jang tơdrong Kră Yang mă tơpă hŏ; iĕm băt boih dah iĕm gơnang kơ Sư, tơdrong jang iĕm yua tơpă.