Read bahnar II Kor 1 Bible Online

II Kor 1 - bahnar bible

II Kor 1

¹Inh Pôl bơngai mă 'Bok Kei-Dei rơih pơm jơ̆ng 'bang Yêsu Krist, na nhi oh bơ̆n Timôthê chih hơpong kơ lu 'nhŏng oh bơngai lui tơ pơlei iĕm Kôrintô, lu mă 'Bok Kei-Dei rơih iŏk, hăm đĭ-đăng kơ lu kon 'Bok Kei-Dei jơ̆p kơ dêh Grĕk.

²Nhôn apinh 'Bă tơm bơ̆n 'Bok Kei-Dei hăm Kră Yang bơ̆n Yêsu Krist wei-lăng iĕm tôm tơdrong wă kơ Sư ăn kơ iĕm hiôk-hian ling-lang.

³Bơnê kơ 'Bok Kei-Dei 'Bă Yêsu Krist Yŏng bơ̆n, Sư 'Bă tơm bơ̆n 'mêm kơ bơ̆n dêh, Sư Kră Yang gơh pơlung bơ̆n tôm tơdrong kơplah bơ̆n đei tơdrong gleh truh pơmat-tat.

⁴Sư pơlung bơ̆n pơmat-tat wă kơ bơ̆n gơh pơlung lu bôl bơ̆n mă đei tơdrong pơmat-tat. 'Bok Kei-Dei pơlung bơ̆n thoi yơ, bơ̆n pơlung bôl thoi noh.

⁵Yua kơ bơ̆n chu iŏk tơdrong pơmat-tat thoi Yêsu Krist, na Sư pơlung bơ̆n, wă kơ bơ̆n huay kơ sơ'ngon.

⁶Nhôn đei tơdrong pơmat-tat, 'noh nhôn adrin tơgŭm iĕm wă kơ iĕm hiôk păng klaih đơ̆ng tơdrong yoch. Nhôn đei 'Bok Kei-Dei pơlung pơhiôk jơhngơ̆m đon nhôn, wă kơ nhôn pơlung pơhiôk jơhngơ̆m đon iĕm, wă kơ iĕm pran jăng hli kơ iĕm mah đei tơdrong pơmat thoi nhôn.

⁷Tơdrong lui kơjăp, nhôn băt kơ iĕm lui kơjăp tơpă. Yua kơ iĕm chu iŏk tơdrong pơmat-tat thoi nhôn, na 'Bok Kei-Dei kư̆m pơlung iĕm hiôk lei-lăi thoi nhôn mơ̆n.

⁸Ơ 'nhŏng oh, nhôn wă roi tơbăt ăn kơ iĕm gah tơdrong đe pơmat nhôn tơ dêh Asi. Nhôn pŭ pơmat trăp dêh, nhôn pă ngêh kơ arih boih.

⁹Nhôn tơchĕng gah lôch đĕch, mă-lei pơm huay huăi. Nhôn băt kơ tơdrong noh truh wă kơ nhôn huay kơ sơđơ̆ng kơ akâu kơdih, wă kơ nhôn gơnang kơ 'Bok Kei-Dei đĕch, yua kơ pôm Sư đĕch gơh tơiung arih kon bơngai.

¹⁰Tơ̆ng Sư ưh kơ tơdŏng nhôn, nhôn lôch tơpă boih. Mă Sư kư̆m oei wă tơdŏng nhôn kơnh pơgê đơ̆ng tôm tơdrong hli hlơt. Lu nhôn oei wă sơđơ̆ng kơ Sư tơdŏng nhôn ling-lang.

¹¹Iĕm krao khan tơgŭm nhôn hŏ, wă kơ 'Bok Kei-Dei mơnat kơ nhôn đơ̆ng lơ bơngai krao khan tơgŭm, wă kơ lơ bơngai bơnê kơ 'Bok Kei-Dei tơdŏng đơ̆ng bơngai tơpôl krao khan.

¹²Tơdrong nhôn hiôk, nhôn hiôk yua kơ tơdrong âu: Jơhngơ̆m đon nhôn mơn kơdih nhôn pơm 'lơ̆ng kơ đĭ-đăng bơngai; mă loi pơm 'lơ̆ng pơm tơpăt hăm iĕm. Mă-lei nhôn ưh kơ bơnê kơ akâu nhôn kơdih hơgei ôh, nhôn bơnê kơ 'Bok Kei-Dei tơgŭm nhôn pơm 'lơ̆ng thoi noh.

¹³Dôm tơdrong nhôn chih kơ iĕm, nhôn ưh kơ đei chih pơjuang ôh; nhôn chih roi tơpăt hloi. Nhôn chih thoi yơ, iĕm đŏk iĕm hlôh thoi ei.

¹⁴Dang ei iĕm tam mă băt nhên nhôn bơngai thoi yơ, layơ kơnh iĕm kư̆m hlôh mơ̆n. Thoi noh na mưh Kră Yang Yêsu Krist jur, iĕm hiôk yua kơ nhôn pơm 'lơ̆ng; nhôn kư̆m hiôk yua kơ iĕm lui đơ̆ng nhôn bơtho.

¹⁵Thoi noh na ki inh băt kơ iĕm lăp đon tơpă, na inh pơkă wă năm hơpong tơ dêh iĕm, inh wă năm tơ pơlei iĕm hơdrol,

¹⁶đơ̆ng noh năm tơ dêh Masêđôn. Đơ̆ng dêh Masêđôn wih drong ngôi tơ pơlei iĕm dơ̆ng wă kơ klaih kơ rơnguơ̆. Đơ̆ng noh na inh wă kơ iĕm tơgŭm inh năm tơ dêh Juđê. Inh tơchĕng wă pơm thoi noh tơpă, mă đơ̆ng rŏng inh ưh kơ gơh kơ năm yua kơ iĕm đei tơdrong yoch, tơ̆ng inh năm inh hli kơ inh pơma pơjĭ đon iĕm, iĕm mơlâu sơ'ngon.

¹⁷Inh pơkă inh wă thoi noh tơpă, mă iĕm jô̆ kơ inh khan đon ưh kơ tơpăt ôh hă? Păng iĕm mơ̆ng dôm tơdrong inh pơkă thoi bơngai ưh kơ lui, hơ̆r kơ năm, năm. Ưh, ưh; thoi noh hă?

¹⁸Ưh ôh. 'Bok Kei-Dei ling-lang pơm trŏ thoi Sư pơkă, na nhôn kư̆m lei-lăi. Dôm tơdrong nhôn pơkă nhôn athei pơm hloi; ưh kơ sĭ nhôn pơkă phŏ 'blep phŏ ưh. Ưh kơ thoi noh ôh.

¹⁹Yêsu Krist Kon 'Bok Kei-Dei, mă nhôn đe Silas, Timôthê năm bơtho tơ tŏk-bŏk iĕm sơ̆, Sư pơkă wă tơgŭm bơ̆n ưh kơ sĭ phŏ 'blep phŏ ưh. Ưh ôh. Sư pơkă ling-lang 'blep ngăl.

²⁰Dôm tơdrong 'Bok Kei-Dei pơkă wă tơgŭm, Yêsu Krist năm hloi. Thoi noh na dôm tơdrong bơ̆n krao khan bơ̆n pơma A-men, noh wă khan bơnê kơ 'Bok Kei-Dei tơpăt ling-lang ăn Yêsu Krist jur tơgŭm tơpă.

²¹'Bok Kei-Dei boih pơm kơ nhôn hăm iĕm lui kơ Yêsu Krist kơjăp. Kư̆m Sư boih ăn kơ nhôn Yang Bơhngol 'Lơ̆ng wă kơ nhôn hơgei jang tơdrong Sư.

²²Sư ăn Yang Bơhngol 'Lơ̆ng oei hơdai hăm nhôn, dang Sư chơ̆m đŏng yâu Sư tơ akâu nhôn, thoi noh na dôm tơdrong Sư pơkă, nhôn băt kơ gô đei tơpă.

²³'Bok Kei-Dei wă kơ inh pơma tơpăt kơ tơdrong inh ưh kơ đei năm hơpong tơ pơlei iĕm noh, ưh kơ sĭ yua inh ôh, yua iĕm. Inh hli kơ mưh inh năm iĕm mơlâu, yua kơ mưh inh năm pă jor kơ inh pơma pơjĭ đon iĕm.

²⁴Mă-lei ưh kơ sĭ nhôn wă pơgŏ pơđep tơdrong lui iĕm ôh. Kơlih kơ nhôn 'bôh iĕm lui kơjăp, na nhôn wă jang hơdai iĕm, wă kơ iĕm chơt.