Read bahnar II Kor 11 Bible Online

II Kor 11 - bahnar bible

II Kor 11

¹Dang ei inh kư̆m dang pơang akâu kơdih, apinh iĕm adrin mơ̆ng 'biơ̆ inh bơngai kơhlôh kơwao, inh chă pơma sa kơ iĕm, thoi iĕm mơ̆ng đơ̆ng sơ̆.

²Inh gar 'mêm kơ iĕm kư̆m thoi 'Bok Kei-Dei gar; inh pơjao iĕm kơ Yêsu Krist, thoi bơngai kơdranh pơjao minh 'nu adruh 'lơ̆ng tơpăt kơ pơyô sư tơdăm kư̆m 'lơ̆ng tơpăt.

³Inh hli kơ lu bơngai mă pơjăm inh pơhlŭ iĕm jing jrok trong ưh pă 'mêm kơ Yêsu Krist, thoi yă bơ̆n Ewơ lui kơ 'bih hơlĕnh pơdăr kơ sư sơ̆.

⁴Yua kơ inh băt kơ iĕm bơngai 'bônh kơ put đe, inh hli kơ đe bơtho iĕm tơdrong Yêsu Krist ưh pă thoi inh bơtho, mă iĕm wă lui hloi; đe bơtho iĕm tơdrong nai, ưh kơ thoi tơdrong Yang Bơhngol 'Lơ̆ng bơtho mă iĕm sơng iŏk sơ̆, mă iĕm wă mơ̆ng hloi; đe khan wă bơtho iĕm tơdrong 'nao 'lơ̆ng mă tơdrong noh ưh pă thoi iĕm lui sơ̆, mă iĕm wă chu hloi.

⁵Iĕm tơchĕng lu bơngai noh jơ̆ng 'bang Yêsu Krist tơpă, lu sư hơgei tơpă hă? Inh hơgei mơ̆n, inh ưh kơ thuơ kơ lu sư ôh.

⁶Mă khan inh bơtho kơtul ưh kơ hơgei, mă-lei inh nhen mơn hlôh tơdrong 'Bok Kei-Dei tơpă, na inh đơ̆ng sơ̆ ling-lang bơtho iĕm thoi noh.

⁷Kơplah inh bơtho iĕm tơdrong 'nao 'lơ̆ng 'Bok Kei-Dei sơ̆, inh iŏk đon ala kơ đe ưh kơ wă iŏk sa tơmam iĕm apah; inh jang sa kơdih bơtho rah iĕm wă kơ iĕm hiôk chơt. Đe ưh kơ hiôk kơ inh tơdrong noh hă na đe pơjăm inh ei?

⁸Inh đei sa apah mơ̆n, đơ̆ng lu bơngai lui pơlei nai. Inh iŏk đĕch tơmam lu sư kư̆m ưh kơ 'lơ̆ng ră, mă-lei wă kơ inh gơh jang tơgŭm iĕm.

⁹Kơplah inh oei păng iĕm noh, inh kư̆m jơ̆l ră mơ̆n mă-lei inh ưh kơ pơgŏ athei iĕm 'me inh ôh. Inh đei lu 'nhŏng oh bơ̆n đơ̆ng dêh Masêđôn chă tơgŭm mơnat kơ inh bơ̆n kon jên bơ̆n tơmam sa. Bĭ mă layơ inh ưh kơ wă athei iĕm tơgŭm inh ôh.

¹⁰Inh băt kơ Yêsu Krist oei lăm inh, Sư wă kơ inh pơma tơpăt, na inh wă roi tơbăt kơ đe dôm tơdrong inh kuă kơ pơgŏ sa tơmam đơ̆ng iĕm, jơ̆p kơ dêh Grĕk gô băt mơ̆n.

¹¹Yua kơ kiơ inh pơma thoi noh, yua kơ inh ưh kơ 'mêm kơ iĕm hă? Ưh ôh. Tơdrong noh 'Bok Kei-Dei Sư băt kơ inh 'mêm kơ iĕm tơpă.

¹²Lu bơngai noh wă kơ nhôn iŏk sa jên iĕm thoi lu sư, wă kơ lu sư gơh pơang khan lu sư jang lei-lăi thoi nhôn, mă-lei nhôn ưh kơ đei layơ wă iŏk sa jên iĕm ôh.

¹³Iĕm ngêh kơ lu bơngai noh pơm jơ̆ng 'bang Yêsu Krist tơpă hă? Ưh ôh. Lu sư hơlĕnh dêh ưh kơ đei layơ tơpăt, chă pôk pơang pơ'brơh kơ akâu kơdih đĕch khan pơm jơ̆ng 'bang Yêsu Krist.

¹⁴Lu bơngai noh iĕm 'nĕ lăng hlĭch tơdrong kiơ, lu sư trŏ kơ khŭl yang Satan 'mơ̆i. Yang Satan phŏ sư kư̆m pơm thoi linh jang 'lơ̆ng.

¹⁵Na mă jơ̆ng 'bang sư chă pơpơm thoi bơngai 'lơ̆ng, iĕm 'nĕ lăng hlĭch tơdrong kiơ; yua kơ dôm tơdrong lu sư pơm kơnê̆ noh, lu sư ưh kơ klaih đơ̆ng tơdrong hiong răm.

¹⁶Inh wă tơbăt dơ̆ng kơ iĕm thoi âu: Iĕm 'nĕ tơchĕng khan inh bơngai kơhlôh tơpă, mă-lei dah iĕm wă jô̆ kơ inh pơm thoi bơngai kơhlôh kư̆m bưh mơ̆n wă kơ inh gơh pơang akâu thoi lu bơngai pơjăm inh noh 'biơ̆.

¹⁷Tơdrong inh wă pơma pơang akâu inh dang ei, ưh kơ sĭ pơma rok thoi Kră Yang Yêsu ôh, inh pơma thoi bơngai kơhlôh na inh pơ̆n pơma pơang akâu kơdih.

¹⁸Dang ei đei lơ bơngai pơma pơang akâu kơdih kiơ̆ thoi lu bơngai ưh kơ lui, na inh kư̆m wă pơma rok lu sư 'biơ̆.

¹⁹Lu iĕm bơngai hơgei dêh boih dah kiơ, na mă iĕm chu mơ̆ng dôm lu bơngai kơhlôh pơma kư̆ kă thoi noh?

²⁰Iĕm chu kơ lu bơngai noh, iĕm jing bơngai đĭch; sư sa yua kơpah tơmam iĕm, sư pơgŏ iĕm, iĕm chu sư pơjuă kơtĭt iĕm, sư tap 'bŏ iĕm.

²¹Lu sư jô̆ kơ inh khan bơngai rơdu, trŏ boih yua kơ inh ưh kơ pơ̆n pơm thoi noh ôh. Na dang ei inh chă pơma kơ iĕm kư̆ kă thoi bơngai kơhlôh kơbăt na đe pơang akâu thoi yơ, inh kư̆m pơang thoi noh mơ̆n.

²²Lu bơngai noh bơngai Hêbrơ hă? Inh kư̆m bơngai Hêbrơ. Lu bơngai noh bơngai Isơrael hă? Inh kư̆m bơngai Isơrael. Lu sư kon sâu Abraham hă? Inh kư̆m kon sâu 'bok noh.

²³Lu sư đĭch đam Yêsu Krist hă? Inh wă pơma pơang thoi bơngai kơhlôh dơ̆ng: Inh jang 'lơ̆ng hloh kơ lu sư, inh jang hrat hloh kơ lu sư, đe tah inh tơ hnam phak lơ 'măng hloh kơ lu sư, đe tach pơjĭ inh lơ 'măng hloh kơ lu sư, lơ 'măng inh jĭ truh kơ wă lôch.

²⁴Lu bơngai Juđê teh pơjĭ inh păng sơnguĕt pơđăm 'măng boih, rim 'măng sư teh pêng-jĭt tơsĭn wơ̆t.

²⁵Pêng 'măng đe tôn teh inh păng 'long tơnôn pah băl, minh 'măng đe klơ̆m păng tơmo, pêng 'măng hao thŏng-nan, thŏng-nan krăm, minh măng minh năr oei tơ kơpal đak dơsĭ.

²⁶Inh bơngai juăt kơ brŏk năm ataih, hơmơt hli kơ glơ̆k tơ đak krong, hơmơt hli kơ lu bơngai brơ̆t răp tơtông, hli kơ tơduă lu bôl nhôn kơdih bơngai Juđê hil areh, hli kơ lu bơngai nai kư̆m hil areh, hli kơ lu bơngai oei lăm pơlei tih păng hơmơt kơ yak rok trong bri brah, hơmơt kơ glơ̆k tơ đak dơsĭ, hơmơt kơ lu bơngai ưh kơ lui hơlĕnh pơm bơngai lui.

²⁷Inh jang gleh đei lơ tơdrong truh pơmat-tat. Phŏ kral kơmăng pă tep, phŏ pơngot hang klak rơhing kơ đak ưh kơ đei, năr jơ̆l kơ tơmam sa ưh kơ đei kư̆m đei, tơngiĕt tơngiot oei akâu hoh kư̆m đei.

²⁸Păng đon tơchĕng rim năr hli kơ lu bơngai lui đei tơdrong gleh kư̆m pha 'mơ̆i.

²⁹Hăm 'bôh bu lui rơdu mă inh ưh kơ mơnat? Hăm 'bôh bu huŏng lăm tơdrong yoch đe pơhlŭ mă inh ưh kơ sơ'ngon?

³⁰'Bơ̆r inh dang pơang akâu kơdih mă inh pơang akâu inh bơngai tơrăn đe pơmat.

³¹'Bok Kei-Dei 'Bă Yŏng bơ̆n Yêsu Krist, Sư trŏ kơ bơ̆n ư-ang ling-lang ưh kơ layơ tôch, Sư băt kơ inh pơma ưh kơ hơlĕnh.

³²Tơ Pơlei Đamas sơ̆ đei minh 'nu pơm phŏ pơtao Arêtah, sư athei đe gak 'măng tơm Đamas, tơ̆ng 'bôh inh athei rôp.

³³Mă-lei lu 'nhŏng oh bôl buăl inh tah inh lăm bai tơjur inh trong 'măng-'mŏk jih dur pơlei, na lu 'bok noh huay kơ rôp inh, inh jăk hloi tơ nai.