Read bahnar II Kor 12 Bible Online

II Kor 12 - bahnar bible

II Kor 12

¹Inh dang wă roi pơang kơ iĕm dơ̆ng, tơdrong ưh kơ yua ră, mă-lei inh dang wă roi pơang kơ iĕm tơdrong Kră Yang tơ'bôh kơ minh 'nu bơngai.

²Bơngai noh sư kư̆m lui kơ Yêsu Krist. Lăm minh 'măng mơjĭt-puăn sơnăm hơdrol sơ̆, 'Bok Kei-Dei atŏk sư truh tơ anih 'Bok Kei-Dei tơ plĕnh ti, ưh kơ băt atŏk hăm akâu sư hloi, dah atŏk bơhngol sư đĕch; tơdrong noh inh kư̆m ưh kơ băt tơpă, 'Bok Kei-Dei đĕch băt.

³Mă inh băt kơ 'Bok Kei-Dei atŏk sư tơ Pơlei 'Lơ̆ng tơpă, mă tơdrong atŏk akâu sư dah bơhngol sư noh inh ưh kơ băt.

⁴'Bok Kei-Dei atŏk sư wă kơ sư 'bôh tơdrong mă tam kơtơ̆ng, tơdrong kon bơngai ưh kơ pơ̆n pơma.

⁵Inh wă pơang bơngai noh mơ̆n, mă inh ưh kơ pơ̆n pơang dêh, inh wă pơang akâu inh kơtul tơrăn đĕch trŏ.

⁶Mă tơ̆ng inh pơang kơ iĕm tơdrong noh kơbĭ pơkiơ ră, yua kơ tơdrong tơpă, mă inh hli kơ đe ư-ang tơdrong bơngai noh 'bôh păng kơtơ̆ng, dang lĕ pơang akâu inh kơdih. Inh wă kơ đe 'bôh păng kơtơ̆ng dôm tơdrong bơngai noh hmă đĕch.

⁷Yua kơ 'Bok Kei-Dei kuă ăn inh pơang kơ iĕm tơdrong noh, na dang ei inh đei tơdrong nhek nhek dang jơla trŏ akar, yang Satan pơm kơ inh.

⁸Pêng 'măng boih inh apinh Kră Yang pơklaih inh đơ̆ng tơdrong âu.

⁹Mă-lei Sư khan: “Huay ôh, ih kư̆ kơ jang tơdrong Inh mă tơpă đĕch, tơdrong ih jang ưh kơ kĕ ưh kơ pran noh lê̆ kơ Inh tơgŭm ih, ih 'nĕ hiơ̆k kơ tơdrong ih pơmat-tat noh, thoi noh na đe băt kơ tơdrong mơsêh mơyang Inh tih tơpă, ih pơmat-tat dang noh mă oei jang khŏm khŏm.” Thoi noh na dang ei inh kuă boih pơang kơ iĕm tơdrong noh, pơang pơăi tơdrong inh kơtul tơrăn đĕch na Sư ăn kơ inh hiôk gơh jang tơdrong Sư khŏm khŏm.

¹⁰Yua kơ inh wă pơư pơang anăn Yêsu Krist, na inh đei tơdrong rơdu tơrăn, đei tơdrong đe pơjăm, đei tơdrong gleh truh, tơdrong đe pơm pơmat inh, tơdrong anat anot, mă-lei jơhngơ̆m inh hiôk rai pran.

¹¹Kơlih kơ iĕm rai wă hiơt kơ inh bơngai mă pơm jơ̆ng 'bang Yêsu Krist, na inh đei pơma pơang kơ iĕm thoi noh, dang bơngai wơnh, dang bơngai kư̆ kă. Lu bơngai noh chă pơpơm jơ̆ng 'bang Yêsu Krist, lu sư khan lu sư bơngai hơgei dêh mă-lei inh ưh kơ thuơ, mă khan inh bơngai kơtul.

¹²Kơplah inh oei hơdai iĕm sơ̆, inh adrin jang tơdrong 'Bok Kei-Dei tơpă, iĕm kư̆m 'bôh lơ tơdrong inh tơbăt kơ iĕm inh pơm jơ̆ng 'bang Yêsu Krist păng iĕm kư̆m 'bôh lơ tơdrong mơsêh mơyang hlĭch hlăch tơpă.

¹³Tơdrong jang inh oei tơ iĕm kư̆m lei-lăi thoi inh jang tơ anih nai; pôm tơdrong 'me sa inh đĕch, inh kuă kơ pơgleh iĕm athei iĕm 'me inh, mă-lei iĕm 'nĕ kơ jô̆ yo.

¹⁴Na 'măng mă pêng âu inh wă năm tơ iĕm, mă inh năm inh ưh kơ năm pơgleh iĕm athei iĕm 'me inh, dah iŏk jên tơmam iĕm ôh; inh năm tơ iĕm, inh wă ngôi hơpong păng iĕm. Ưh kơ sĭ kon 'me 'bă ôh, 'bă 'me kon.

¹⁵Inh kư̆m hiôk mơ̆n mă inh pơhuach jên tơmam pơlap akâu kơdih yua kơ inh wă kơ iĕm lui kơjăp. Inh 'mêm kơ iĕm tơpă, bĭ iĕm ưh pă 'mêm kơ inh boih hă?

¹⁶Thoi noh dang ei iĕm băt tơpă boih, inh ưh kơ wă kơ iĕm 'me inh; inh pơma thoi noh mă-lei iĕm khan noh inh pơma pơlung iĕm wă kơ inh gơh iŏk jên tơmam iĕm tơ nai hă?

¹⁷Dôm lu bơngai inh wơh năm tơ iĕm, lu sư hăm đei pơlung iŏk jên tơmam iĕm? Ưh kơ đei ôh.

¹⁸Inh wơh Tĭt hăm minh 'nu 'nhŏng oh bơ̆n năm tơ iĕm ki, Tĭt hăm đei pơhlŭ iŏk tơmam iĕm? Ưh ôh, yua kơ nhi bơ̆jang minh jơhngơ̆m minh đon hơdai.

¹⁹Iĕm tơchĕng nhôn chih đơ̆ng tơm hmơm hei, truh tơ dang ei âu, iĕm tơchĕng nhôn chih athei iĕm pơma sek tơlang tơdrong nhôn hă? Ưh ôh. Tơdrong sek tơlang, bơ̆n gô mơ̆ng kơ 'Bok Kei-Dei sek tơlang đĕch păng gô mơ̆ng kơ Yêsu Krist đĕch tơgŭm nhôn pơma. Ơ 'nhŏng oh mă nhôn 'mêm kơeng, dôm tơdrong nhôn chih bơtho iĕm noh hei ưh kơ sĭ nhôn hil kơ iĕm ôh, nhôn wă kơ iĕm lui kơjăp.

²⁰Inh hli kơ mưh năr inh truh tơ iĕm, iĕm ưh kơ lui kơjăp kiơ̆ thoi đon inh wă. Mă iĕm 'bôh inh iĕm kư̆m ưh kơ hiôk yua kơ iĕm hli kơ inh hil kơ iĕm. Păng inh hli kơ iĕm pơjah pơjăng dih băl, tơgar sa băl, tơhil băl, kret kuă kơ asong băl, pơjăm bôl buăl, bâu roi bôl buăl, pơang akâu kơdih păng hli kơ iĕm akŭm ưh kơ trŏ.

²¹Inh hli kơ mưh inh truh tơ noh, 'Bok Kei-Dei pơm kơ inh mơlâu hmoi ơh akâu kơdih yua kơ lu iĕm mơ'nah lui đunh boih mă oei pơm yoch hơnơ̆ng ưh kơ băt tơbral kơdih dôm tơdrong kơnê̆ 'mê̆-'mach, dôm tơdrong kư̆ kă iĕm pơm.