Read bahnar II Kor 3 Bible Online

II Kor 3 - bahnar bible

II Kor 3

¹Nhôn pơma thoi noh, nhôn wă kơ iĕm băt kơ nhôn pơm 'bok bơtho iĕm hă? Ưh ôh. Nhôn ưh kơ kăl kơthơ đe chih tơbăt kơ iĕm, kơthơ iĕm chih tơbăt kơ đe khan nhôn 'bok bơtho iĕm ôh. Lu bơngai nai sư wă thoi noh tơpă, mă-lei lu nhôn ưh ôh.

²Yua kơ iĕm lui đơ̆ng nhôn bơtho tơpă boih na lu iĕm kư̆m dang hla bơar kơthơ tơbăt kơ nhôn tơbăt kơ đe nhôn 'bok bơtho iĕm boih. Yua kơ iĕm dang hla bơar kơthơ, na đĭ-đăng bơngai gơh đŏk gơh lăng.

³Iĕm dang kơthơ Yêsu Krist mă nhôn chih. Mă-lei ưh kơ sĭ chih păng đak mơ̆k ôh. Yang Bơhngol 'Lơ̆ng 'Bok Kei-Dei mă arih ling-lang Sư chih tơgŭm nhôn mă ưh kơ sĭ chih tơ tơmo lat thoi tơdrong 'Bok Kei-Dei pơkă hơdrol sơ̆ ôh, Sư chih tơ'băk tơ lăm jơhngơ̆m đon iĕm.

⁴Nhôn pơma kơ iĕm thoi noh, nhôn pơma kiơ̆ kơ jơhngơ̆m đon nhôn lui kơjăp thoi noh tơpă, kiơ̆ kơ nhôn gơnang kơ Yêsu Krist hăm 'Bok Kei-Dei thoi noh.

⁵Dôm tơdrong noh ưh kơ sĭ đơ̆ng akâu nhôn gơh pơm ôh, yua kơ akâu nhôn kơdih ưh kơ gơh pơm minh tơdrong kiơ. Tôm tơdrong lu nhôn gơh pơm noh đơ̆ng 'Bok Kei-Dei ăn ngăl.

⁶Sư ăn kơ nhôn pran kơtang gơh jang tơdrong pơgơ̆p 'nao, tơdrong Yêsu Krist pơgơ̆p bơ̆n hăm 'Bok Kei-Dei. Tơdrong noh ưh kơ đei chih tơ tơmo lat thoi tơdrong 'Bok Kei-Dei pơkă hơdrol sơ̆ ôh, tơdrong noh Yang Bơhngol 'Lơ̆ng tơgŭm. Tơdrong chih tơ tơmo lat phak pơlôch kon bơngai. Yang Bơhngol 'Lơ̆ng ưh ôh. Sư ling-lang ăn kon bơngai arih.

⁷Tơdrong pơkă noh sơ̆ chih tơ tơmo lat wă phak pơlôch lu bơngai ưh kơ chu. Na lăp Môis iŏk tơmo lat noh đơ̆ng 'Bok Kei-Dei sơ̆, muh măt Môis rang hơdah dêh, truh tơ lu bơngai Isơrael mah pă kĕ lăng muh măt sư, mă-lei muh măt Môis rai đunh ưh pă rang hơdah boih.

⁸Na bĭ tơdrong Yang Bơhngol 'Lơ̆ng tơgŭm bơ̆n dang ei ưh kơ 'lơ̆ng rŏ tih krưp hloh kơ noh ôh hă?

⁹Tơ̆ng tơdrong pơkă noh sơ̆ 'lơ̆ng rŏ mă khan jô̆ kơ kon bơngai yoch, lei tơdrong pơgơ̆p 'nao mă jô̆ kơ kon bơngai 'lơ̆ng tơpăt dang ei 'lơ̆ng rŏ hloh loi kơ tơdrong pơkă so noh.

¹⁰Tơdrong pơgơ̆p so noh ưh pă rŏ hơnơ̆ng boih, yua kơ đei tơdrong pơgơ̆p 'nao 'lơ̆ng rŏ hloh loi tơpă.

¹¹Tơdrong pơgơ̆p so kư̆m 'lơ̆ng, kư̆m rŏ; mă sư 'bônh kơ hiong, 'bônh kơ tôch. Tơdrong pơgơ̆p 'nao sư oei hơnơ̆ng ling-lang ưh kơ layơ tôch, sư rŏ hloh loi kơ tơdrong pơgơ̆p so.

¹²Yua kơ nhôn băt kơ thoi noh, na jơhngơ̆m nhôn sơĭng bơtho nuih tơpă.

¹³Môis iŏk khăn kơlŭk lum kuă ăn lu bơngai Isơrael 'bôh muh măt sư rai đunh ưh pă rang hơdah. Nhôn dang ei ưh kơ pơm thoi noh ôh. Nhôn bơtho tơbăt tôm hloi.

¹⁴Na lu bơngai Isơrael arăng kơ̆l đơ̆ng sơ̆ oei khơ̆ dang ei. Mưh lu sư đŏk lăng hla bơar tơdrong pơgơ̆p so, jơhngơ̆m đon lu sư dang lĕ kơ kơlŭk lum khăn yua kơ lu sư ưh kơ hlôh. Pôm lu bơngai mă gơnang kơ Kră Yang Yêsu đĕch gơh pơih lê̆ khăn noh wă khan lu sư hlôh.

¹⁵Tơpă, mă đơ̆ng sơ̆ khơ̆ dang ei rim kơ lu sư wă đŏk lăng dôm tơdrong Môis chih sơ̆, jơhngơ̆m đon lu sư dang lĕ kơ kơlŭk lum khăn.

¹⁶Mă-lei gah lu bơngai mă gơnang kơ Kră Yang Yêsu Krist, jơhngơ̆m đon lu sư ưh pă thoi kơlŭk lum khăn boih.

¹⁷Kră Yang Yêsu kư̆m thoi Yang Bơhngol 'Lơ̆ng. Yang Bơhngol 'Lơ̆ng oei tơ yơ, tơ anih noh rơngei hiôk-hian.

¹⁸Đĭ rim lu bơ̆n bơngai lui pơih lê̆ boih khăn noh, na lu bơ̆n gơh 'bôh muh măt Kră Yang Yêsu rang hơdah, khŏm khŏm lu bơ̆n rai đunh rai hơdah thoi Sư. Tơdrong hơdah noh Sư boih pơchrang ăn kơ lu bơ̆n. Sư kư̆m thoi Yang Bơhngol 'Lơ̆ng mă ăn kơ bơ̆n arih.