Read bahnar II Kor 8 Bible Online

II Kor 8 - bahnar bible

II Kor 8

¹Ơ 'nhŏng oh, inh wă roi tơbăt kơ iĕm tơdrong đe 'nhŏng oh bơngai lui bơ̆n tơ dêh Masêđôn 'lơ̆ng dêh, 'Bok Kei-Dei pơm kơ lu sư băt 'mêm băt mơnat kơ lu bôl lui.

²Lu sư đei tơdrong gleh pơmat-tat păng dơnuh tăm mă-lei jơhngơ̆m lu sư hiôk hơiă păng hơlăng băt kơ pơtơm băl ra jên tơgŭm lu bơngai lui dơnuh hin tơ Pơlei Jêrusalem.

³Inh khan tơpă, lu sư ra jên ra tơmam kiơ̆ kơ lu sư đei, phŏ lu sư kư̆m ăn hloh kơ lu sư đei. Mă-lei tơdrong noh ưh kơ sĭ kơ nhôn pơgŏ ôh, lu sư lăp đon kơdih.

⁴Lu sư nŏng kơ apinh nhôn lơ 'măng wă kơ nhôn ăn kơ lu sư wang tơgŭm jên tơmam kơ lu bơngai dơnuh hin.

⁵Nhôn ngêh kơ lu sư pơm 'blep kơ đon nhôn tơchĕng đĕch, lu sư pơm hloh kơ đon nhôn tơchĕng dơ̆ng; lu sư pơyơ̆r ăn akâu lu sư kơ Kră Yang wă tơgŭm nhôn hai, lu sư pơm thoi 'Bok Kei-Dei lăp đon dêh.

⁶Na tơdrong ra jên tơmam tơ pơlei iĕm noh, nhôn jao kơ Tĭt jang khŏm khŏm yua kơ sơ̆ sư đêl jang tơdrong noh boih.

⁷Iĕm hơgei tôm tơdrong boih, mă tơdrong lui, mă tơdrong bơtho, tơdrong hlôh wao tơdrong 'Bok Kei-Dei, jơhngơ̆m iĕm hưch hanh băt kơ 'maih adrin jang tơdrong 'Bok Kei-Dei păng băt 'mêm kơ nhôn. Na dang ei inh tơchĕng iĕm kư̆m wă tơgŭm lu bơngai dơnuh mơ̆n rŏ lăng.

⁸Mă-lei tơdrong noh ưh kơ sĭ inh wă pơgŏ iĕm ôh, inh wă pơlong lăng iĕm hăm băt 'mêm kơ bôl buăl thoi lu bơngai lui tơ dêh Masêđôn dah ưh.

⁹Yua kơ iĕm băt boih Kră Yang Yêsu Krist 'mêm mơnat kơ bơ̆n dang yơ; Sư mơdrŏng tih tơpă, mă-lei Sư jing dơnuh yua kơ tơgŭm bơ̆n, wă kơ bơ̆n jing mơdrŏng.

¹⁰Sơnăm sơ̆ iĕm kư̆m đêl pơtơm boih tơdrong wă tơgŭm lu bơngai dơnuh hin noh, iĕm kư̆m wă tơpă; na dang ei inh wă kơ iĕm pơjing dơ̆ng tơdrong noh mă tơpă bĕ.

¹¹Pơm kiơ̆ kơ đêl iĕm pơkă boih, mơ̆ng kơ iĕm đei.

¹²Mă tơ̆ng iĕm 'maih ra jên hơdai bôl ră, mă iĕm ưh kơ đei, noh huay ôh, 'Bok Kei-Dei kư̆m hiôk mơ̆n.

¹³Tơdrong inh wă kơ iĕm tơgŭm đe, ưh kơ sĭ inh wă kơ iĕm dơnuh, đe jing mơdrŏng, ưh ôh. Inh wă kơ iĕm atŏ atŏ dih băl.

¹⁴Dang ei iĕm oei đei lơ tơmam rơkah rơkai, na apinh iĕm wang tơgŭm lu sư bơngai oei jơ̆l; layơ iĕm jơ̆l, lu sư đei, lu sư tơgŭm iĕm dơ̆ng. Thoi noh na iĕm hăm lu sư jing atŏ atŏ dih băl.

¹⁵'Noh kư̆m thoi lăm sơ̆p hla bơar 'Bok Kei-Dei khan sơ̆: “Bu dônh 'bĕng mana lơ kư̆m ưh kơ rơkah, bu dônh tŏ sĕt kư̆m mah kơ sa mơ̆n.”

¹⁶Inh bơnê kơ 'Bok Kei-Dei pơm kơ Tĭt hưch hanh kơ năm tơgŭm iĕm kư̆m thoi inh hưch hanh kơ tơgŭm iĕm ling-lang.

¹⁷Sư chu kơ nơ̆r inh wơh, mă sư kư̆m lăp đon wă tơgŭm iĕm, na sư wă năm tơ iĕm boih.

¹⁸Nhôn kư̆m wơh 'bar 'nu 'nhŏng oh bơ̆n bơngai lui kiơ̆ Tĭt, minh 'nu đĭ-đăng bơngai lui rim hnam 'Bok Kei-Dei ư-ang sư bơtho tơdrong 'Bok Kei-Dei pran dêh.

¹⁹Mă ưh kơ sĭ kơ tơdrong noh đĕch, sư âu đơ̆ng rim hnam 'Bok Kei-Dei rơih wă kiơ̆ nhôn chĕp ba jên đơ̆ng iĕm đơ̆ng đe ra. Tơdrong ra jên noh wă pơư pơang anăn Kră Yang păng wă kơ đe băt kơ bơ̆n bơngai lăp đon kơ tơgŭm đe tơpă.

²⁰Inh wă kơ lu bơngai noh tơgŭm gah tơdrong ra jên yua kơ inh hli kơ đe jô̆ kơ inh pơm ưh kơ 'lơ̆ng, pơm ưh kơ trŏ kơ tơdrong iŏk jên iĕm wă tơgŭm đe noh.

²¹Nhôn adrin pơm tơpăt 'bơ̆t anăp 'Bok Kei-Dei hăm kon bơngai.

²²Minh 'nu 'nhŏng oh âu dơ̆ng inh kư̆m wơh sư kiơ̆ Tĭt, inh pơlong lăng sư lơ tơdrong boih, na inh băt kơ sư adrin adran jang tơdrong 'Bok Kei-Dei tơpă. Na dang ei sư băt kơ iĕm wă adrin pơjing tơdrong noh, sư rai 'maih adrin loi.

²³Âu roi gah Tĭt iĕm băt boih, sư 'nhŏng oh bơ̆n jang hơdai hăm inh đơ̆ng sơ̆ boih; na dang ei sư wă tơgŭm wei-lăng iĕm dơ̆ng. Gah 'bar 'nu 'nhŏng oh mă kiơ̆ sư, noh đơ̆ng lu bơngai lui rim hnam 'Bok Kei-Dei rơih bre sư jang tang lu sư, bre sư bơngai pơư pơang anăn Kră Yang Yêsu Krist.

²⁴Thoi noh na iĕm athei ra mă tơpă na lu sư băt kơ iĕm 'mêm mơnat kơ bôl buăl bơngai lui tơpă; păng sư gô băt kơ nhôn ư-ang iĕm 'blep tơpă, đĭ-đăng bơngai lui jơ̆p kơ teh đak kư̆m wang băt.