Read bahnar Gal 1 Bible Online

Gal 1 - bahnar bible

Gal 1

¹Inh Pôl chih hơpong kơ lu bơngai lui tơ dêh char Galati. Jet gia 'nhŏng oh. Lu 'nhŏng oh bơngai lui tơ inh âu kư̆m đei nơ̆r jet gia kơ iĕm mơ̆n. Inh pơm jơ̆ng 'bang Yêsu Krist yua kơ Sư ăn inh pơm jơ̆ng 'bang Sư. 'Bă Sư 'Bok Kei-Dei tơiung arih Sư đơ̆ng lôch păng Sư kư̆m ăn kơ inh pơm jơ̆ng 'bang Yêsu mơ̆n. Ưh kơ sĭ kon bơngai ăn kơ inh ôh. Ưh kơ sĭ kon bơngai pơtruh ăn kơ inh nơ̆r 'Bok Kei-Dei athei inh pơm jơ̆ng 'bang Yêsu ôh, inh kơtơ̆ng đơ̆ng Sư đĕch khan kơ inh.

³Inh krao khan apinh 'Bă tơm bơ̆n 'Bok Kei-Dei hăm Kră Yang bơ̆n Yêsu Krist wei-lăng iĕm tôm tơdrong wă kơ Sư ăn kơ iĕm hiôk-hian ling-lang.

⁴Kră Yang bơ̆n Yêsu Krist ăn akâu Sư kơdih wă lôch tang bơ̆n pơklaih bơ̆n đơ̆ng tơdrong yoch. Sư lôch tang bơ̆n wă iŏk bơ̆n đơ̆ng lu bơngai kơnê̆ ahrei âu. Sư pơm thoi noh wă kơ trŏ thoi 'Bă tơm bơ̆n 'Bok Kei-Dei wă.

⁵Bĕ bơ̆n ư-ang 'Bok Kei-Dei ling-lang ling-lang ưh kơ layơ tôch. A-men.

⁶Inh sơleng kơ đon yua kơ kiơ iĕm lui kơ nơ̆r đe pơlung wă achăng lê̆ nơ̆r 'Bok Kei-Dei 'bônh đĕch. 'Bok Kei-Dei krao bơ̆n wă kơ bơ̆n jing kon Sư, yua kơ Yêsu Krist lôch tang bơ̆n. Mă-lei dang ei iĕm wă kiơ̆ tơdrong 'nao 'lơ̆ng nai dơ̆ng.

⁷Mă tơpă đei minh tơdrong 'nao 'lơ̆ng đĕch, ưh kơ đei tơdrong 'nao 'lơ̆ng nai dơ̆ng ôh. Inh khan kơ iĕm thoi noh yua kơ đei lu bơngai nai pơtuah iĕm, lu sư wă hơmet ming pơthim tơdrong 'nao 'lơ̆ng Yêsu Krist.

⁸Sơ̆ nhôn bơtho ăn kơ iĕm tơdrong 'nao 'lơ̆ng trŏ tơpă, na dang ei mă bu bu, tơdah nhôn kơdih, dah linh jang 'lơ̆ng đơ̆ng plĕnh ti, bơtho ăn kơ iĕm tơdrong phara pơm wă pơhloh kơ nhôn bơtho iĕm sơ̆, ning-mônh 'Bok Kei-Dei gô phak sư tơpă.

⁹Inh wă khan kơ iĕm dơ̆ng, kư̆m thoi nhôn khan boih kơ iĕm: Bơngai bu bơtho ăn kơ iĕm tơdrong phara pơm wă pơhloh kơ nhôn bơtho iĕm sơ̆ na jing ưh kơ trŏ thoi iĕm lui sơ̆, 'Bok Kei-Dei gô phak tơpă bơngai 'noh ning-mônh.

¹⁰Inh pơma thoi noh kon bơngai ưh kơ lăp đon ôh. Mă-lei inh wă kơ 'Bok Kei-Dei lăp đon kơ tơdrong jang inh. Dah inh wă kơ kon bơngai lăp đon kơ inh đĕch lei ưh kơ sĭ inh jang tơdrong Yêsu Krist ôh.

¹¹Ơ lu 'nhŏng oh, inh wă kơ iĕm hlôh tơdrong âu: Tơdrong 'nao 'lơ̆ng mă inh bơtho ăn kơ iĕm sơ̆, ưh kơ sĭ đơ̆ng kon bơngai pơjing ôh.

¹²Kon bơngai ưh kơ đei bơtho inh tơdrong noh, pôm Yêsu Krist đĕch tơbăt kơ inh tơdrong 'nao 'lơ̆ng Sư.

¹³Iĕm kơtơ̆ng boih tơdrong arih inh thoi yơ sơ̆. Kơplah noh sơ̆ inh kiơ̆ tơdrong lu bơngai Juđê. Inh pơm kơnê̆ tơpă kơ lu bơngai lui kơ Kră Yang Yêsu Krist wă kơ tơdrong lui lu sư jah tôch.

¹⁴Inh kiơ̆ tơdrong juăt bơngai Juđê sơ̆, iung lu jơhnơr nhôn pôm inh jang kơtang hloh kơ lu sư. Inh adrin tơpă kiơ̆ tơdrong juăt lu yă 'bok nhôn sơ̆.

¹⁵Mă-lei 'Bok Kei-Dei 'mêm mơnat kơ inh. Sư rơih iŏk inh đơ̆ng inh tam mă tơpŭ sơ̆. Sư krao inh wă kơ inh jang tơdrong Sư.

¹⁶Truh Sư wă tơ'bôh ăn kơ inh Yêsu Kon Sư, wă kơ inh năm bơtho tơdrong 'nao 'lơ̆ng Kon Sư kơ lu bơngai nai mă ưh kơ trŏ bơngai Juđê, kơplah noh inh ưh kơ đei năm pơhrăm đơ̆ng lu bơngai kiơ̆ Yêsu ôh.

¹⁷Inh kư̆m ưh kơ đei năm tơ Pơlei Jêrusalem chă hơpong kơ lu bơngai jơ̆ng 'bang Yêsu mă jang adrol kơ inh ôh. Inh năm tơ dêh char Arabia. Klaih kơ noh inh năm tơ Pơlei Đamas dơ̆ng.

¹⁸Đơ̆ng rŏng kơ inh lui kơ Yêsu pêng sơnăm na inh năm tơ Pơlei Jêrusalem hơpong kơ Pêtrôs. Inh oei păng sư tơ noh 'bar 'măng giĕng.

¹⁹Inh kư̆m tơ'bơ̆p Yakơ oh Yêsu mơ̆n, mă-lei inh ưh kơ đei tơ'bơ̆p jơ̆ng 'bang Yêsu nai ôh kơplah noh.

²⁰Dôm tơdrong inh chih âu trŏ tơpă. 'Bok Kei-Dei 'bôh bơ̆n na inh ưh kơ pơ̆n hơlĕnh ôh.

²¹Đơ̆ng rŏng kơ inh hơpong kơ Pêtrôs noh na inh năm tơ dêh char Siri păng dêh char Salisia.

²²Kơplah dôm sơnăm noh lu bơngai lui tơ dêh char Juđê tam mă tơ'bơ̆p inh ôh.

²³Mă-lei lu sư kơtơ̆ng ang đe khan thoi âu: “Pôl sơ̆ pơm kơnê̆ kơ bơ̆n dêh, sư wă pơrăm tơdrong bơ̆n lui, mă-lei dang ei đe khan sư bơtho tơdrong bơ̆n lui boih.”

²⁴Thoi noh na lu sư ư-ang 'Bok Kei-Dei ăn kơ inh lui kơ Sư.