Read bahnar Gal 2 Bible Online

Gal 2 - bahnar bible

Gal 2

¹Đơ̆ng rŏng kơ noh mơjĭt-puăn sơnăm nhi 'Barna'ba wih dơ̆ng tơ Pơlei Jêrusalem anhăk ba Tĭt kiơ̆ nhi.

²Inh năm tơ Pơlei Jêrusalem yua kơ 'Bok Kei-Dei athei inh năm. Inh akŭm păng lu bơngai pơm tih pơgơ̆r bơngai lui, wă roi kơ lu sư tơdrong 'nao 'lơ̆ng inh bơtho kơ lu bơngai mă ưh kơ khŭl Juđê. Nhôn akŭm kơdrô̆ nhôn đĕch. Inh roi kơ lu sư nhên gah tơdrong inh bơtho wă kơ lu sư băt dôm tơdrong inh bơtho noh, jĭ minh tơdrong trŏ tơpă. Dah inh ưh kơ roi kơ lu sư, lei inh hli kơ lu sư jô̆ kơ inh bơtho tơdrong ưh kơ tơpă. Mă-lei lu sư ưh kơ đei jô̆ kơ tơdrong jang inh khan tơdrong jang ưh kơ tơpă, lu sư ưh kơ đei khan thoi noh ôh.

³Tĭt sư bơngai Grĕk sư kư̆m lui kơ Yêsu boih, sư ưh tam mă kăt tơdra akar sư kiơ̆ kơ tơdrong juăt nhôn bơngai Juđê, mă-lei lu bơngai pơgơ̆r bơngai lui kư̆m ưh kơ đei athei Tĭt kăt tơdra akar sư mơ̆n.

⁴Đei mơ̆n lu bơngai nai đĕch athei nhôn kăt tơdra akar Tĭt. Mă-lei lu bơngai noh ưh kơ trŏ bơngai lui tơpă ôh. Lu sư mơ̆t akŭm hơdai hăm nhôn, lăng sư thoi bơngai lui mơ̆n, mă tơpă lăm to sư ưh ôh. Bơ̆n bơngai rơngei yua kơ bơ̆n lui kơ Yêsu Krist. Bơ̆n ưh kơ kăl kiơ̆ dôm tơdrong juăt lu bơngai Juđê mă đơ̆ng Môis pơkă kơ sư. Lu sư mơ̆t akŭm hơdai nhôn wă chă lăng tơdrong bơ̆n lui thoi yơ, lu sư wă kơ bơ̆n kiơ̆ dôm tơdrong juăt lu bơngai Juđê. Tơdrong juăt bơngai Juđê anat tơpă, dah bu wă kiơ̆, bơngai 'noh sư dang jing đĭch.

⁵Dôm tơdrong lu sư wă kơ nhôn pơm, nhôn ưh kơ chu ôh. Nhôn ưh kơ đei layơ wă tơplih tơdrong 'nao 'lơ̆ng Yêsu Krist mă 'lơ̆ng tơpăt ôh. Nhôn wă kơ iĕm huay kăl kiơ̆ dôm tơdrong juăt bơngai Juđê.

⁶Lu bơngai đe pôk pơm tih pơgơ̆r bơngai lui, inh băt mơ̆n lu sư oei hơdai Yêsu sơ̆, mă-lei 'Bok Kei-Dei pơgơ̆p jơhngơ̆m đon lu nhôn lei-lăi đĕch, lu sư ưh kơ đei wă ming tơplih tơdrong inh bơtho ôh.

⁷Lu sư băt kơ 'Bok Kei-Dei wơh inh bơtho tơdrong 'nao 'lơ̆ng sư kơ lu bơngai mă ưh kơ khŭl Juđê lu sư kư̆m ưh kơ kăt tơdra akar, kư̆m thoi 'Bok Kei-Dei wơh Pêtrôs năm chă bơtho khŭl sư bơngai Juđê.

⁸Lu sư băt thoi noh yua kơ lu sư 'bôh 'Bok Kei-Dei ăn kơ inh pơm jơ̆ng 'bang Yêsu năm chă bơtho đe đei lơi lơ bơngai lui kơ inh bơtho tơpă, kư̆m thoi 'Bok Kei-Dei ăn kơ Pêtrôs pơm jơ̆ng 'bang Yêsu năm chă bơtho đe đei lơi mơ̆n.

⁹Thoi noh na Yakơ, Pêtrôs, Yôhan, lu sư bơngai mă đe pôk pơm tih pơgơ̆r lu bơngai lui đơ̆ng sơ̆ boih, lu sư băt tơpă kơ 'Bok Kei-Dei ăn kơ inh năm chă bơtho kơ lu bơngai mă ưh kơ khŭl Juđê, na lu sư iung rôp ti nhi 'Barna'ba dang wă khan pơgơ̆p băl minh jơhngơ̆m minh đon jang tơdrong 'Bok Kei-Dei. Lu sư bơtho tơdrong 'Bok Kei-Dei kơ lu khŭl sư bơngai Juđê, na nhi bơtho kơ lu khŭl bơngai nai.

¹⁰Lu sư pơma kơ nhi pôm tơdrong athei tơgŭm mơnat kơ lu bơngai dơnuh hin đe Juđê, na inh khan kơ lu sư: “Lăp kơ tơdrong 'noh đơ̆ng sơ̆ inh kư̆m băt tơchĕng ră mơ̆n.”

¹¹Sơ̆ Pêtrôs năm tơ Pơlei Antiôs, inh khă sư, yua kơ sư pơm ưh kơ trŏ tơpă. Sư pơm thoi âu:

¹²Sơ̆ Pêtrôs năm hơpong tơ pơlei nhôn Antiôs, sư kư̆m sŏng sa hơdai lu bơngai nai mă ưh kơ khŭl sư mơ̆n. Na đei minh năr ei Yakơ wơh buăl sư năm tơ nhôn. Lăp lu nhôn wă sŏng sa, na Pêtrôs ưh kơ pơ̆n sŏng sa hơdai hăm lu bơngai mă ưh kơ khŭl sư, yua kơ sư hli kơ buăl sư mă 'nao truh noh hil kơ sư. Lu bơngai noh athei đĭ-đăng lu bơngai lui kơ Yêsu kăt tơdra akar păng ưh kơ ăn lu bơngai Juđê sŏng sa hơdai lu bơngai mă ưh kơ khŭl sư.

¹³Na lu bơngai Juđê mă oei tơ Pơlei Antiôs ei mơ'nah kư̆m lui kơ Yêsu mơ̆n, lu sư kư̆m kiơ̆ Pêtrôs hơdai ưh kơ pơ̆n, kuă kơ sŏng sa thoi Pêtrôs mơ̆n truh tơ 'Barna'ba kư̆m lei-lăi thoi lu sư.

¹⁴Inh 'bôh lu sư kiơ̆ tơdrong 'nao 'lơ̆ng Yêsu ưh kơ 'blep trŏ thoi noh boih na inh bơtho Pêtrôs 'bơ̆t anăp lu sư thoi âu: “Ih bơngai Juđê, krô hmă ih ưh pă wă kiơ̆ boih tơdrong juăt bơngai Juđê, na dang ei thoi yơ ih wă athei lu bơngai ưh kơ khŭl bơ̆n kiơ̆ tơdrong juăt bơ̆n so dơ̆ng?”

¹⁵Nhôn bơngai Juđê đơ̆ng mĕ bơ̆n tơpŭ. Nhôn ưh kơ sĭ bơngai nai ôh. Nhôn kiơ̆ tơdrong juăt 'Bok Kei-Dei pơkă, lu bơngai nai ưh kơ kiơ̆ ôh.

¹⁶Mă-lei nhôn lui kơ Yêsu boih, nhôn băt kơdih 'Bok Kei-Dei jô̆ lu nhôn 'lơ̆ng tơpăt hăm Sư noh yua kơ nhôn lui păng gơnang kơ Yêsu Krist, ưh kơ sĭ yua kơ nhôn lui kiơ̆ tơdrong juăt Môis khŏm khŏm na 'Bok Kei-Dei jô̆ bơ̆n 'lơ̆ng tơpăt hăm Sư ôh. Dang ei nhôn lui boih kơ Yêsu Krist, na mă 'Bok Kei-Dei jô̆ nhôn bơngai 'lơ̆ng tơpăt hăm Sư. Ưh kơ đei bu 'Bok Kei-Dei wă jô̆ sư 'lơ̆ng tơpăt, dah sư oei gơnang kơ akâu sư kơdih wă kiơ̆ tơdrong juăt Môis.

¹⁷Dang ei nhôn lui kơ Yêsu Krist wă kơ 'Bok Kei-Dei jô̆ nhôn bơngai 'lơ̆ng tơpăt hăm Sư, na nhôn huay pă kăl kiơ̆ tôm tơdrong juăt Môis kư̆m lei-lăi thoi bơngai ưh kơ sĭ khŭl Juđê sư ưh kơ kiơ̆ tơdrong juăt Môis ôh. Na iĕm tơchĕng thoi yơ dang ei? Iĕm tơchĕng dôm tơdrong juăt 'Bok Kei-Dei, Yêsu Krist kuă ăn bơ̆n lui hă? Ưh ôh.

¹⁸Đei bơngai mơ'nah tơchĕng kiơ̆ tơdrong juăt Môis ưh kơ klaih đơ̆ng tơdrong yoch ôh. Na sư lui kơ Yêsu, sư gơnang kơ Yêsu tơgŭm sư đĕch, sư ưh pă kiơ̆ tơdrong juăt Môis. Mă-lei đơ̆ng rŏng kơ noh sư jing kuă dơ̆ng kơ kiơ̆ Yêsu achăng lê̆ tơdrong lui sư wih kiơ̆ tôm tơdrong juăt Môis dơ̆ng, sư khan wă kơ 'Bok Kei-Dei jô̆ sư bơngai 'lơ̆ng tơpăt. Mă-lei bơngai 'noh boih pơm yoch tơpă.

¹⁹Sơ̆ inh kư̆m kiơ̆ mơ̆n tơdrong juăt Môis, mă-lei inh tơchĕng akâu inh kơdih đĕch kiơ̆, mă tơpă lăm to inh ưh kơ 'lơ̆ng hăm 'Bok Kei-Dei ôh. Thoi noh na inh ưh pă gơnang kơ akâu inh kơdih wă kiơ̆ tơdrong juăt Môis, akâu inh dang lĕ kơ lôch, wă kơ inh iung arih gơnang kơ 'Bok Kei-Dei đĕch.

²⁰Inh dang lĕ lôch hơdai hăm Yêsu Krist tơ 'long pơglang sơ̆ boih yua kơ akâu inh kơdih ưh kơ gơh pơm minh tơdrong kiơ ôh. Na dang ei inh ưh pă gơnang kơ akâu inh kơdih boih, inh gơnang kơ Yêsu Krist mă arih lăm akâu inh, lê̆ kơ Sư chă dui ba inh kiơ̆ kơ tơdrong Sư wă. Inh gơnang kơ Sư yua kơ Sư Kon 'Bok Kei-Dei tơpă, Sư 'mêm mơnat kơ inh mah ăn akâu Sư kơdih lôch tang inh.

²¹Dah 'Bok Kei-Dei jô̆ bơ̆n bơngai 'lơ̆ng tơpăt hăm Sư yua kơ bơ̆n lui kiơ̆ tơdrong juăt Môis đĕch, lei Yêsu Krist lôch tang bơ̆n tơ 'long pơglang noh ưh kơ yua kiơ ôh kơ bơ̆n. Gah inh, inh băt tơpă 'Bok Kei-Dei jô̆ inh bơngai 'lơ̆ng tơpăt hăm Sư yua kơ Kon Sư lôch tang yua kơ tơdrong yoch inh.