Read bahnar Eph 3 Bible Online

Eph 3 - bahnar bible

Eph 3

¹Yua kơ thoi noh na inh Pôl oei krao khan tơgŭm iĕm ling-lang. Inh oei lăm hnam phak noh yua kơ inh jang tơdrong Yêsu Krist bơtho tơgŭm iĕm bơngai khŭl nai.

²Iĕm băt boih 'Bok Kei-Dei pơjao kơ inh jang tơdrong Sư noh, wă kơ inh gơh tơgŭm iĕm.

³Sư tơbăt ăn kơ inh tơdrong mă đe ưh tam mă băt đơ̆ng sơ̆, tơdrong mă inh chih roi tơ kơpal 'noh hei.

⁴Iĕm đŏk lăng boih na iĕm băt hloi kơ inh hlôh tôm tơdrong Yêsu Krist.

⁵Adrol sơ̆ 'Bok Kei-Dei ưh tam mă tơbăt ăn kơ đe ôh tơdrong noh. Mă-lei dang ei Yang Bơhngol 'Lơ̆ng tơbăt ăn kơ lu jơ̆ng 'bang Yêsu hăm lu bơngai pơtruh nơ̆r Sư boih.

⁶Tơdrong 'noh lĕch đơ̆ng tơdrong 'nao 'lơ̆ng Yêsu Krist, na lu iĕm bơngai khŭl nai dang ei kư̆m hơdai đei tơdrong hiôk jơnap noh. Tơdrong hiôk jơnap noh sơ̆ Sư khan wă ăn kơ lu bơngai Juđê nhôn mă dang ei đei truh tơ iĕm boih; bơ̆n dang 'nhŏng oh minh sĕch minh akar. Iĕm klaih đơ̆ng tơdrong yoch oei hiôk jơnap hăm 'Bok Kei-Dei kư̆m thoi 'Bok Kei-Dei ăn kơ lu nhôn mơ̆n.

⁷'Bok Kei-Dei wă kơ inh roi tơbăt kơ đe tơdrong 'nao 'lơ̆ng noh, na Sư ăn kơ inh jơhngơ̆m pran wă kơ inh kĕ păng gơh jang tơdrong 'noh ling-lang. Sư pơjao kơ inh tơdrong jang noh yua kơ Sư mơnat.

⁸Inh âu bơngai iĕ hloh kơ đĭ-đăng lu kon 'Bok Kei-Dei nai. Mă-lei Sư pơjao kơ inh tơdrong bơtho, wă kơ inh năm bơtho lu bơngai khŭl nai mă ưh kơ trŏ kơ bơngai khŭl Juđê, wă kơ lu sư băt kơnăl kơ tơdrong hiôk jơnap Yêsu Krist ăn kơ bơ̆n thoi yơ. Tơdrong hiôk jơnap noh hiôk tơpă ưh pă băt dang yơ.

⁹Dôm tơdrong Sư wă tơgŭm bơ̆n Sư tơbăt ăn kơ inh, wă kơ inh năm tơbăt ăn kơ đĭ-đăng bơngai. 'Bok Kei-Dei Yang mă pơjing tôm tơdrong Sư wă tơgŭm bơ̆n tơpă tơdrong noh, mă ưh tam mă tơbăt ăn kơ đe đơ̆ng sơ̆.

¹⁰Mă dang ei Sư ăn kơ lu bơngai lui kơ Kon Sư tơbăt ăn kơ lu yŏng pơgơ̆r lu linh jang, tơbăt ăn kơ lu yŏng pơgơ̆r oei tơ kơpal plĕnh wă kơ lu sư băt kơ tơdrong tơchĕng 'Bok Kei-Dei hơgei tơpă wă tơgŭm kon bơngai.

¹¹Dôm tơdrong Sư wă tơgŭm bơ̆n Sư tơchĕng đơ̆ng blŭng-a sơ̆ boih, na dang ei 'blep kơ Kon Sư Kră Yang bơ̆n Yêsu Krist jur tơgŭm lu bơ̆n thoi noh tơpă.

¹²Yua kơ bơ̆n lui kơ Yêsu boih, na bơ̆n băt kơ pôm đon hăm Sư, bơ̆n gơh tŏk truh tơ 'Bok Kei-Dei huay pă hli kơ Sư boih.

¹³Thoi noh na inh apinh iĕm 'nĕ kơ sơ'ngon kơ tơdrong inh pơmat yua kơ iĕm. Inh oei tơ lăm hnam phak kư̆m bưh mơ̆n yua kơ inh wă adrin bơtho tơgŭm iĕm; na iĕm athei hiôk bĕ.

¹⁴Yua kơ thoi noh na inh sơtơ̆p kŭl-tăng krao khan kơ 'Bă tơm bơ̆n 'Bok Kei-Dei,

¹⁵yua kơ Sư 'Bă kơ đĭ-đăng plĕnh teh.

¹⁶Sư đei tôm tĕch tơdrong na inh apinh Sư ăn kơ iĕm Yang Bơhngol 'Lơ̆ng Sư oei hơdai hăm iĕm wă kơ iĕm đei jơhngơ̆m pran.

¹⁷Păng inh kư̆m apinh Yêsu Krist mơ̆t oei lăm jơhngơ̆m iĕm yua kơ iĕm lui kơ Sư. Păng inh apinh Sư ăn kơ iĕm đei đon 'mêm mơnat kơ bôl buăl lăm tôm tơdrong,

¹⁸păng ăn kơ iĕm hlôh băt tơdrong Yêsu Krist 'mêm kơeng kơ bơ̆n tih-tin sư dang yơ, jrŭ să sư dang yơ, kư̆m thoi Sư tơbăt ăn kơ đĭ-đăng lu kon 'Bok Kei-Dei nai.

¹⁹Inh apinh Sư ăn kơ iĕm băt kơ Yêsu 'mêm kơ bơ̆n tih tơpă, mă ưh kơ băt tih dang yơ, jrŭ să sư dang yơ. Păng inh kư̆m apinh 'Bok Kei-Dei oei lăm jơhngơ̆m rim 'nu kơ lu iĕm.

²⁰Bơnê kơ 'Bok Kei-Dei Kră Yang mơsêh tăp pang mơyang tăp dăr tơgŭm bơ̆n lơ hloh kơ đêl bơ̆n apinh, lơ hloh kơ đêl đon bơ̆n tơchĕng.

²¹Na bĕ đĭ-đăng kơ lu bơ̆n kon Sư ư-ang anăn Sư, kư̆m thoi Yêsu Krist ư-ang anăn Sư, ling-lang khŏm khŏm ưh kơ layơ tôch. A-men.