Read bahnar Eph 5 Bible Online

Eph 5 - bahnar bible

Eph 5

¹Bơ̆n jing kon 'Bok Kei-Dei, 'Bok Kei-Dei Sư 'mêm kơ bơ̆n tơpă, na bơ̆n athei pơm rok Sư.

²Păng bơ̆n athei băt 'mêm mơnat kơ bôl buăl, thoi Yêsu Krist 'mêm mơnat kơ bơ̆n mah ăn akâu Sư kơdih lôch tang bơ̆n. Sư pơyơ̆r akâu Sư kơ 'Bok Kei-Dei jur lôch tang bơ̆n tơ 'long pơglang kiơ̆ thoi 'Bok Kei-Dei lăp đon, thoi lu bơngai soi sơmah kơ 'Bok Kei-Dei lu sư pơyơ̆r dôm tơmam 'bâu phu.

³Gah tơdrong pơm pơyô ngôi kư̆ kă, hưch hanh lơ tơdrong, dôm tơdrong noh bơ̆n 'nĕ kơ pơma 'bơm tŏ sĕt, yua kơ bơ̆n jing kon 'Bok Kei-Dei boih.

⁴Bơ̆n ưh pă gơh pơma tơdrong kơnê̆, tơdrong kư̆ kă, tơdrong chroih tơ nai. Bơ̆n athei pơma ling-lang gah tơdrong ư-ang kơ 'Bok Kei-Dei đĕch.

⁵Dôm lu bơngai đi, lu bơngai pơm pơyô kư̆ kă, lu bơngai hưch hanh lơ tơdrong, bơ̆n băt boih lu bơngai oei pơm thoi noh ưh kơ gơh oei hơdai Yêsu Krist hăm 'Bok Kei-Dei kơplah Sư pơgơ̆r pơm Pơtao ning-mônh ôh. Lu bơngai thoi noh lu sư dang bơngai kơkuh kơ yang nai đĕch, lu sư tơchĕng tơdrong noh hloh loi kơ tơdrong 'Bok Kei-Dei.

⁶Iĕm 'nĕ kơ lui kơ đe pơhlŭ iĕm kiơ̆ dôm tơdrong kơnê̆ noh mă sư khan tơdrong 'lơ̆ng. Lu bơngai thoi noh ưh kơ chu 'Bok Kei-Dei. 'Bok Kei-Dei hil tơpă kơ lu sư, gô phak lu sư.

⁷Thoi noh na iĕm 'nĕ kơ pơm buăl hăm lu bơngai thoi noh.

⁸Yua kơ dang ei iĕm ưh pă oei lăm măng mu thoi lu bơngai noh boih, iĕm oei lăm hơdah Kră Yang Yêsu Krist pơchrang ăn. Thoi noh na iĕm athei oei kiơ̆ kơ tơdrong hơdah Sư noh.

⁹Dôm lu bơngai oei lăm tơdrong hơdah, Sư gô pơm dôm tơdrong 'lơ̆ng tơpăt ngăl.

¹⁰Iĕm athei chă dôm tơdrong 'Bok Kei-Dei lăp đon noh.

¹¹Iĕm 'nĕ pă kiơ̆ tơdrong măng mu, tơdrong noh tơdrong ưh kơ yua kơ bơ̆n. Bơ̆n athei tơbăt kơ đe tơdrong yoch noh mơ̆n.

¹²Bơ̆n băt kơ tơdrong kơnê̆ lu sư pơm noh kơnê̆ tơpă păng mơlâu ră kơ pơma 'bơm tơdrong noh.

¹³Mă-lei bơ̆n athei tơbăt ăn tơdrong yoch lu sư pơm noh, wă kơ lu sư mơn kơdih, thoi bơ̆n tơ̆k ŭnh tơ'bôh kơ lu sư tơdrong yoch noh. Na lu sư gô lê̆ dôm tơdrong yoch noh, na oei kiơ̆ hloi lăm hơdah ŭnh noh.

¹⁴Tơdrong noh thoi đe juăt kơ khan: “Ơ bơngai tep dang lĕ kơ lôch, iung bĕ, na 'Bok Krist gô pơchrang hơdah ăn kơ iĕm.”

¹⁵Thoi noh na bơ̆n athei kơchăng oei mă hơđơ̆ng hli kơ jơhngơ̆m bơ̆n hơdai 'maih pơm yoch. Bơ̆n 'nĕ kơ pơm kư̆ kă thoi lu bơngai jih 'ma kơ bơ̆n, bơ̆n athei pơm thoi lu bơngai hơgei lu bơngai tơpăt đĕch trŏ.

¹⁶Bơ̆n athei adrin pơm 'lơ̆ng hăm adrin ră roi kơ đe tơdrong Yêsu Krist yua kơ dang ei đei lơ bơngai kơnê̆ tơpă.

¹⁷Thoi noh na bơ̆n athei kơchăng oei mă hơđơ̆ng 'nĕ kơ pơm thoi bơngai kơhlôh, adrol kơ wă pơm athei tơchĕng lăng 'mơ̆i wă kơ băt Kră Yang lăp đon kơ bơ̆n pơm dah ưh.

¹⁸Bơ̆n 'nĕ kơ et sik suai hli kơ bơ̆n jing bơngai kư̆ kă; bơ̆n athei ăn kơ Yang Bơhngol 'Lơ̆ng pơgơ̆r bơ̆n lăm tôm tơdrong.

¹⁹Păng bơ̆n athei hơri bơnê kơ Kră Yang hăm đĭ jơhngơ̆m, mă bơ̆n hơri tơdrong 'Bok Kei-Dei hơdai hăm bơngai tơpôl, mă bơ̆n hơri tơdrong lu bơngai kră sơ̆, mă bơ̆n hơri tơdrong lu bơngai dang ei, mă bơ̆n hơri kiơ̆ kơ đon bơ̆n tơchĕng kơdih.

²⁰Bơ̆n athei băt bơnê kơ 'Bă tơm bơ̆n 'Bok Kei-Dei lăm tôm tơdrong păng bơ̆n athei krao chă Yŏng bơ̆n Yêsu Krist na bơ̆n gơh krao khan bơnê kơ 'Bok Kei-Dei.

²¹Bơ̆n athei chu băl yua kơ bơ̆n bơngai lui kơ Yêsu Krist.

²²Lu bơngai pơm akăn, dang ei iĕm lui boih kơ Yêsu Krist, iĕm athei chu yom kơ klo iĕm gô mơ̆ng kơ sư pơgơ̆r.

²³Yua kơ klo iĕm sư trŏ kơ pơgơ̆r iĕm kư̆m thoi Yêsu Krist pơgơ̆r lu bơngai lui kơ Sư; Yêsu Krist Sư ăn akâu Sư kơdih pơklaih lu bơngai lui kơ Sư.

²⁴Na lu bơngai pơm akăn iĕm athei chu yom kơ klo iĕm pơgơ̆r lăm tôm tơdrong, thoi lu bơ̆n bơngai lui chu yom kơ Yêsu Krist.

²⁵Lu bơngai pơm klo kư̆m lei-lăi athei băt 'mêm kơ akăn sư kơdih thoi Yêsu 'mêm kơ bơ̆n bơngai lui kơ Sư năm ăn akâu Sư kơdih lôch tang bơ̆n,

²⁶wă kơ bơ̆n rơgoh đĭ kơ dôm tơdrong yoch, na pơyơ̆r bơ̆n ăn kơ 'Bok Kei-Dei wei-lăng, yua kơ bơ̆n lui kơ nơ̆r Sư bơtho, truh kơ bơ̆n iŏk 'batem tơmôch akâu bơ̆n tơ lăm đak, dang wă khan tơhoch tŭk tơdrong mơgrĭ boih iŏk tơdrong rơgoh.

²⁷Sư pơm thoi noh wă kơ bơ̆n jing bơngai 'lơ̆ng tơpăt gơh oei hơdai hăm Sư. Bơ̆n thoi bơngai pơm akăn mă 'mêm kơ klo sư, na sư hrŭk hơbĕn ao rơgoh 'lơ̆ng ling-lang wă kơ klo sư lăp đon.

²⁸Lu bơngai pơm klo athei 'mêm kơ akăn sư yua kơ bre sư jing minh sĕch minh akar boih. Bơngai bu 'mêm kơ akăn sư thoi noh, bơngai noh 'mêm kơ akâu sư kơdih thoi noh mơ̆n.

²⁹Ưh kơ đei bu khan ưh kơ 'mêm kơ akâu sư kơdih ôh, đĭ-đăng bơngai tă 'mêm kơ akâu sư kơdih ngăl, thoi noh na bơ̆n băt kơ 'me sa akâu bơ̆n kơdih, băt kơ wei-lăng akâu bơ̆n kơdih, thoi Yêsu Krist wei-lăng lu bơ̆n bơngai lui kơ Sư.

³⁰Na lu bơ̆n âu boih dang akâu akar Yêsu Krist.

³¹Tơdrong noh thoi đe chih khan lê̆ tơ lăm sơ̆p hla bơar 'Bok Kei-Dei sơ̆ thoi âu: “Bơngai pơm klo pơm akăn tơklah đơ̆ng mĕ 'bă sư kơdih na oei hơdai, bre sư jing minh sĕch minh akar.”

³²'Bok Kei-Dei tơbăt ăn kơ bơ̆n tơdrong noh kăl tơpă. Tơdrong noh wă khan Yêsu Krist hăm lu bơngai lui kơ Sư dang lĕ kơ minh sĕch minh akar boih.

³³Thoi noh na lu bơngai pơm klo athei 'mêm kơ akăn sư thoi noh tơpă, thoi sư 'mêm kơ akâu sư kơdih. Na lu bơngai pơm akăn kư̆m lei-lăi athei băt 'mêm mơnat hăm chu yom kơ klo sư pơgơ̆r sư lăm tôm tơdrong.