Read bahnar I Tes 5 Bible Online

I Tes 5 - bahnar bible

I Tes 5

¹Ơ 'nhŏng oh, nhôn ưh kơ kăl chih roi gah tơdrong Kră Yang Yêsu wă jur layơ.

²Mă iĕm kư̆m băt nhên mơ̆n tơdrong ưh kơ đei bu băt Kră Yang Yêsu wă jur layơ, kư̆m thoi bơ̆n ưh kơ băt kơ bơngai wă tơtông klĕ sư wă truh măng ayơ.

³Năr ei kơnh lu bơngai ưh kơ lui sư khan: “Ô hiôk tơpă dêh iih, ưh kơ đei tơdrong kiơ truh tơ lu bơ̆n.” Mă-lei năr noh hloi boih lu sư đei tơdrong răm hloi, kư̆m thoi bơngai drŏ-kăn sư wă jê̆ tơpŭ sư ưh kơ băt layơ sư wă jĭ anăp sư. Lu bơngai noh ưh kơ gơh jăk ôn akâu sư tơ yơ ôh.

⁴Mă-lei iĕm lui boih kơ Kră Yang, iĕm huay kơ hli lăm năr noh kơnh ôh, yua kơ iĕm huay pă oei lăm măng mu boih.

⁵Bơ̆n oei lăm hơdah măt 'năr.

⁶Yua kơ bơ̆n huay pă oei lăm măng mu boih, na bơ̆n 'nĕ kơ tep hiơt thoi lu bơngai ưh kơ lui. Bơ̆n lui boih, bơ̆n thoi lĕ iung đơ̆ng tep na bơ̆n athei kơchăng ling-lang. Bơ̆n athei pơm thoi bơngai hơdrăl ưh kơ et sik; 'noh wă khan bơ̆n athei lui kơjăp mă tơpă.

⁷Pơtih gia thoi lĕ bơngai bơ̆n tep kơ suai sik kơmăng ưh kơ băt tơchĕng tơdrong kiơ, dah bơ̆n kiơ̆ thoi noh răm tơpă.

⁸Na dang ei bơ̆n oei lăm hơdah măt 'năr boih bơ̆n athei kơchăng thoi bơngai hơdrăl. Lu linh tơblah sư hrŭk ao mam wă kơ hơđơ̆ng kơ akâu sư kơdih. Bơ̆n kư̆m thoi lu đe noh mơ̆n athei lui mă kơjăp, băt 'mêm kơ 'Bok Kei-Dei păng bôl buăl bơ̆n, thoi noh na bơ̆n hơđơ̆ng akâu bơ̆n kơdih. Kư̆m thoi lu linh yơ̆l môk kơlăm wă kơ pĕng lăm kơ̆l sư na sư huay kơ hli, âu wă khan 'Bok Kei-Dei pơklaih bơ̆n đơ̆ng tơdrong yoch na wă atŏk bơ̆n oei păng Sư, thoi âu boih bơ̆n huay kơ hli dang ei, thoi âu boih tơdrong hơđơ̆ng bơ̆n.

⁹'Bok Kei-Dei rơih iŏk bơ̆n ưh kơ sĭ Sư wă phak ôh, Sư rơih iŏk bơ̆n Sư wă pơklaih bơ̆n đơ̆ng tơdrong yoch. Kơlih kơ tơdrong 'noh na Sư ăn Kon Sư Yêsu Krist lôch tang bơ̆n boih.

¹⁰Kră Yang Yêsu Krist lôch tang bơ̆n wă kơ bơ̆n oei hăm Sư ling-lang. Năr Sư jur kơnh, lu bơ̆n bơngai lui, mă bơngai oei arih mă bơngai lôch boih, lu bơ̆n gô oei hơdai păng Sư đĭ-đăng.

¹¹Thoi noh tơdrong âu gô sĭt tơpă, na iĕm kư̆ adrin bơtho pơlung dih băl, kư̆m thoi iĕm adrin bơtho dih băl dang ei, wă kơ iĕm lui rai pran kơjăp.

¹²Ơ 'nhŏng oh, nhôn wă kơ iĕm lui yom kơ lu bơngai jang tơdrong 'Bok Kei-Dei păng lu bơngai mă Kră Yang Yêsu Krist rơih wă wei-lăng iĕm păng bơtho iĕm.

¹³Iĕm athei lui yom 'mêm mơnat kơ sư tơpă yua kơ sư jang tơdrong 'Bok Kei-Dei. Đĭ-đăng dôm iĕm athei oei hiôk hơiă dih băl.

¹⁴Ơ 'nhŏng oh, nhôn pơkă kơ iĕm thoi âu: Iĕm athei bơtho bơngai alah wă kơ sư pơnam. Iĕm athei pơma dơnuh kơ bơngai sơ'ngon wă kơ sư hiơt kơ tơdrong sơ'ngon huay pă ơh klai dơ̆ng. Bơtho lu bơngai lui rơdu wă kơ sư lui kơjăp. Đe hơwĕng hil areh kơ iĕm, iĕm athei lê̆ đĕch.

¹⁵Iĕm 'nĕ kơ hil kơ sư. Iĕm ling-lang athei pơm 'lơ̆ng lăm tơduă iĕm hăm lu bôl buăl nai mơ̆n.

¹⁶Năr iĕm chơt hiôk, dah năr iĕm đei tơdrong gleh sơ'ngon iĕm kư̆m athei bơnê kơ 'Bok Kei-Dei mơ̆n, dui jơhngơ̆m mă tai wă kơ huay ơh sơ'ngon. Hăm 'nĕ hiơt krao khan kơ Sư ling-lang. Thoi noh boih 'Bok Kei-Dei wă kơ bơ̆n lui kơ Kon Sư Yêsu Krist.

¹⁹Na dang ei iĕm athei ăn kơ Yang Bơhngol 'Lơ̆ng pơgơ̆r iĕm kiơ̆ kơ Sư wă, iĕm 'nĕ pă pơgơ̆r akâu iĕm kơdih.

²⁰'Nĕ che bơle lu bơngai pơtruh nơ̆r 'Bok Kei-Dei, lu bơngai mă khan lê̆ hơdrol.

²¹Iĕm athei tơchĕng lăng tôm tơdrong, dôm tơdrong trŏ iĕm chhŏ iŏk.

²²Dah tơdrong glăi iĕm săi tŭk.

²³'Bok Kei-Dei ăn kơ bơ̆n hiôk-hian ling-lang. Na nhôn apinh Sư ăn kơ iĕm jing bơngai 'lơ̆ng tơpăt lăm tôm tơdrong thoi Sư wă. Păng nhôn apinh Sư wei-lăng bơhngol iĕm, jơhngơ̆m đon iĕm, akâu jăn iĕm, wă kơ iĕm huay kơ đei tơdrong yoch, truh Kră Yang Yêsu jur tơ teh ning-mônh.

²⁴'Bok Kei-Dei krao iŏk iĕm Sư wei-lăng iĕm tơpă kư̆m thoi Sư pơkă khan wă wei-lăng.

²⁵Ơ 'nhŏng oh păng iĕm kư̆m krao khan kơ 'Bok Kei-Dei tơgŭm lu nhôn mơ̆n hŏ.

²⁶Iĕm roi tơbăt kơ đĭ-đăng 'nhŏng oh bơngai lui nhôn rơnguơ̆ kơ iĕm tơpă.

²⁷Păng inh athei iĕm đŏk kơthơ âu kơ đĭ-đăng 'nhŏng oh bơngai lui hŏ. Iĕm athei đŏk ăn tơpă. Mă iĕm ưh kơ đŏk ăn mă iĕm khan đŏk ăn boih, kư̆m ưh kơ hlơp kơ Kră Yang ning-mônh.

²⁸Nhôn apinh Kră Yang Yêsu Krist wei-lăng iĕm tôm tơdrong.