Read bahnar Jos 1 Bible Online

Jos 1 - bahnar bible

Jos 1

¹Đơ̆ng rŏng kơ Môis đĭch đam Kră Yang lôch boih, Kră Yang bơtho khan kơ Jôsuê đam kơiĕng Môis, kon drŏ-nglo Nun.

²Môis đĭch đam Inh hlôi lôch, dang ei kon pơlei pơla ih iung bĕ, năm tŏk găn kơ đak Krong Jôrđăn, truh tơ teh đak mă Inh gô ăn kơ lu adrĕch adrung Isơrael.

³Anih ayơ tơpang jơ̆ng lu iĕm juă, Inh gô ăn kơ lu iĕm, thoi Inh đei pơkă bơih hăm Môis.

⁴Teh lu iĕm să iŏk đơ̆ng tơmăn glă păng kông Liban âu truh tơ đak Krong Tih, noh krong Ơphrat păng đĭ kơ dêh char kon pơlei Hêtit, truh tơ đak Dơsĭ Tih tơ gah 'năr mơ̆t.

⁵Đĭ lăm chăl arih ih, ưh kơ đei bu kĕ blah ih, Inh gô oei hơdai hăm ih thoi Inh oei hơdai hăm Môis, Inh ưh kơ achăng ih păng ưh kơ lê̆ ih ôh.

⁶Ih Athei chơ̆n jơhngơ̆m nuih pran yua kơ ih gô chông ba lu kon pơlei pơla năm iŏk dêh char mă Inh đei pơkă boih wă ăn kơ lu 'bok iĕm.

⁷Ih athei chơ̆n jơhngơ̆m nuih pran păng pơm kiơ̆ kơ khôi juăt Môis đĭch đam Inh, mă tơbăt kơ ih, 'nĕ kơ weh gah 'ma gah 'ngiĕo, lei na mă năm tơ yơ gô đei tơdrong kĕ jei ih.

⁸Sơ̆p hla bơar khôi juăt âu 'nĕ kơ ataih đơ̆ng 'bơ̆r ih, athei tơchĕng măng năr, lei athei pơ'lơ̆ng pơm kiơ̆ kơ nơ̆r đei chih lăm noh, thoi noh na lăm trong ih năm gô đei tơdrong pŭn hiôk.

⁹Hăm trŏ kơ Inh đei khan bơih kơ ih? Athei ih nuih kơtang păng chơ̆n jơhngơ̆m, nuih pran, 'nĕ kơ rơdu, yua kơ Kră Yang 'Bok Kei-Dei ih oei hơdai hăm ih lăm rim trong ih năm.

¹⁰Thoi noh Jôsuê athei lu bơngai mă wei-lăng lu kon pơlei pơla

¹¹“Lu iĕm athei năm jơ̆p tơ rim anih tơbăt ăn kơ kon pơlei: Hơmet bĕ tơmam sa lu iĕm, yua kơ pă pêng năr boih lu iĕm gô yak tŏk găn kơ đak Krong Jôrđăn, wă năm blah iŏk teh đak mă Kră Yang 'Bok Kei-Dei gô ăn kơ lu iĕm.”

¹²Jôsuê khan kơ adrĕch Rubên adrĕch Gat păng minh puăt adrĕch Manase.

¹³'Blŏk bĕ kơ nơ̆r Môis, đĭch đam Kră Yang đei pơkă kơ lu iĕm, sư khan: Kră Yang 'Bok Kei-Dei gô ăn kơ lu iĕm hiôk-hian păng đei pơkă ăn boih kơ lu iĕm teh đak âu.

¹⁴Lu akăn iĕm, kon hơ'lơ̆p iĕm păng sem dơrong lu iĕm gô oei lăm teh mă Môis đei ăn boih kơ lu iĕm, tơ gah hơlĕch kơ đak Krong Jôrđăn, mă-lei đĭ-đăng lu drŏ-nglo nuih kơtang, chĕp tơmam tơblah, đao kơtuang hơlă, tŏk năm adrol kơ lu 'nhŏng oh lu iĕm păng tơgŭm lu sư,

¹⁵dĭng dang yơ mă Kră Yang ăn tơdrong hiôk-hian kơ lu 'nhŏng oh iĕm thoi đei ăn boih kơ lu iĕm păng dĭng lu sư đei iŏk asong băl dêh char mă Kră Yang 'Bok Kei-Dei đei ăn kơ lu sư. Đơ̆ng noh lu iĕm gô wih tơ char lu iĕm kơdih, dêh char mă Môis đĭch đam Kră Yang đei ăn kơ lu iĕm gah âu kơ đak Krong Jôrđăn, gah măt 'năr lĕch, na lu iĕm gô iŏk teh noh pơm anih lu iĕm jang sa.

¹⁶Lu bơngai noh đei tơl Jôsuê: “Lu nhôn gô pơm kiơ̆ kơ ih pơkă athei păng năm jơ̆p-jang anih ayơ mă ih đei wơh.

¹⁷Lu nhôn chu kiơ̆ ih lăm tôm tơdrong jang, thoi chu kiơ̆ Môis, apinh Kră Yang 'Bok Kei-Dei oei hơdai ih, thoi Kră Yang oei hơdai Môis.

¹⁸Bơngai bu ưh kơ chu pơm kiơ̆ nơ̆r ih bơtho pơkă păng dôm tơdrong jang kiơ ih athei, lu bơngai noh gô pơlôch sư, ih athei chơ̆n jơhngơ̆m nuih pran.”