Read bahnar Jos 10 Bible Online

Jos 10 - bahnar bible

Jos 10

¹Adônisêdek, pơtao pơlei Jêrusalem, kơtơ̆ng khan Jôsuê blah iŏk boih pơlei Ahi păng pơrăm pơlôch đĭ, pơm kơ pơlei păng pơtao sư, thoi sư đei pơm kơ pơlei Jêrikô păng kơ pơtao sư păng kư̆m kơtơ̆ng kon pơlei Gibeôn pơgơ̆p hiôk-hian hăm kon pơlei Isơrael boih păng oei hơdai lu sư.

²Pơtao păng đĭ kon pơlei hli dêh, yua kơ pơlei Gibeôn pơlei tih, pơlei pơtao yŏng mơng tih hloh kơ pơlei Ahi, lu kon drŏ-nglo kon pơlei lu sư nuih pran kơtang.

³Thoi noh Adônisêdek, pơtao pơlei Jêrusalem, krao pơtơm Hôham pơtao pơlei Hêbrôn, Phiram pơtao pơlei Jarmut, Japhia pơtao pơlei Lakis păng Đêbir pơtao Eglôn na khan:

⁴Lu iĕm tŏk dŏng inh bĕ, bơ̆n năm tơblah pơlei Gibeôn, yua kơ lu sư đei pơgơ̆p hơdai hăm Jôsuê păng kon pơlei Isơrael.

⁵Thoi noh pơđăm 'nu pơtao bơngai Amôrit, wă khan pơtao pơlei Jêrusalem, pơtao pơlei Hêbrôn, pơtao Jarmut, pơtao Lakis păng pơtao pơlei Eglôn, akŭm đĭ-đăng lu linh sư tŏk năm hơdai wă năm blah Gibeôn,

⁶Kon pơlei bơngai Gibeôn wơh bơngai năm tơ Jôsuê lăm anih lu sư oei pơdơh tơ Gilgal: Apinh ih 'nĕ kơ achăng lê̆ đĭch đam ih, jah năm mă tĕnh bĕ dŏng pơklaih lu nhôn. Tơgŭm lu nhôn, yua kơ đĭ-đăng pơtao Amôrit oei lăm char groi kông wă năm blah lu nhôn.

⁷Thoi noh Jôsuê hăm đĭ-đăng lu linh tơblah sư năm đơ̆ng Gilgal, lu linh noh nuih pran kơtang.

⁸Kră Yang khan kơ Jôsuê: 'Nĕ kơ hli kơ lu sư, yua kơ Inh jao ăn boih lu sư lăm tơpang ti ih, ưh kơ đei bu kĕ tơblah hăm ih ôh.

⁹Jôsuê đơ̆ng Gilgal yak prăt măng truh tơblah pơm kơ lu ayăt kơdrăt.

¹⁰Kră Yang pơm ăn kơ lu linh ayăt hli rŭng răng kơdâu tơklah tơklang 'bơ̆t anăp linh Isơrael, lu bơngai Isơrael tơblah ayăt jei jơnei tih jê̆ pơlei Gibeôn, lu linh Isơrael druh lu ayăt tŏk tơ trong suăn kơ pơlei Bêt Hôrôn, blah drŭt lu sư truh tơ pơlei Asêka păng pơlei Makkêđa.

¹¹Kơplah lu linh ayăt kơdâu ôn kơ lu linh Isơrael, lu sư jur tơ krang đơ̆ng pơlei Bêt Hôrôn, truh tơ Asêka, Kră Yang ăn 'mi prĕl tih thoi tơmo đơ̆ng plĕnh, jur păng lu linh ayăt lôch kơ 'mi prĕl tih noh lơ hloh, kơ lu linh Isơrael pơlôch hăm đao gưm.

¹²Lăm năr Kră Yang jao kon pơlei Amôrit lăm ti bơngai Isơrael, Jôsuê pơma dơnuh hăm Kră Yang 'bơ̆t anăp lu kon pơlei Isơrael: Ơ Măt 'năr, dơ̆ng bĕ 'bơ̆t pơlei Gibeôn; Ơ Măt khei, dơ̆ng bĕ 'bơ̆t Thŭng Aijalôn!

¹³Thoi noh Măt 'năr oei dơ̆ng minh 'bôt hăm măt khei dơ̆ng hloi, dĭng truh kơ kon pơlei Isơrael blah tơwih lu ayăt kơ lu sư, đang boih tơdrong noh đei chih lăm sơ̆p hla bơar Jashar. Măt 'năr oei dơ̆ng hloi tơ plĕnh, ưh kơ mơ̆t, lăm minh năr noh.

¹⁴Đơ̆ng sơ̆ ưh tam biơh khơ̆ ning-mônh ưh kơ đei layơ thoi năr noh, 'noh jing năr Kră Yang mơ̆ng nơ̆r kon bơngai. Tơpă Kră Yang tơblah dŏng kon pơlei Isơrael.

¹⁵Jôsuê hăm lu linh Isơrael wih brŏk dơ̆ng tơ anih tơ Gilgal.

¹⁶Pơđăm 'nu pơtao noh kơdâu ôn, lăm hơgơp tơmo tơ pơlei Makkêđa.

¹⁷Đei bơngai roi kơ Jôsuê: Đe đei 'bôh pơđăm 'nu pơtao ôn lăm hơgơp tơmo tơ Makkêđa.

¹⁸Jôsuê athei: Đe tơlơ̆ tơmo tih klơ̆p lê̆ 'măng hơgơp tơmo păng ăn hloi kơ bơngai răp 'bơ̆t 'măng tơmo noh.

¹⁹Mă-lei lu iĕm 'nĕ kơ gô, druh blah lu linh ayăt, blah lu linh sư đơ̆ng gah rŏng, 'nĕ ăn kơ lu sư brŏk mơ̆t tơ pơlei lu sư, yua kơ Kră Yang 'Bok Kei-Dei iĕm jao ăn boih lu sư lăm tơpang ti lu iĕm.

²⁰Thoi noh Jôsuê păng kon pơlei Isơrael blah pơlôch lơ tơpă mah wă goh, lu bơngai mă oei klaih, chă kơdâu ôn tơ lăm lu pơlei kơjăp.

²¹Khŭl linh wih brŏk hơdai hăm Jôsuê hiôk-hian tơ lăm anih kơđông Makkêđa, ưh kơ đei bơngai bu pơ̆n wă pơma kơnê̆ kơ kon pơlei Isơrael dơ̆ng.

²²Jôsuê khan kơ lu sư: Pơih bĕ 'măng tơmo noh chông ba pơđăm 'nu pơtao noh năm tơ inh.

²³Thoi noh lu sư chông ba pơđăm 'nu pơtao noh lĕch đơ̆ng hơgơp tơmo, noh pơtao pơlei Jêrusalem, pơtao pơlei Hêbrôn, pơtao pơlei Jarmut, pơtao pơlei Lakis păng pơtao pơlei Eglôn.

²⁴Lu sư chông ba pơđăm 'nu pơtao ei truh tơ Jôsuê, Jôsuê krao đĭ-đăng drŏ-nglo Isơrael khan hăm yŏng pơgơ̆r linh tơblah mă năm hơdai sư: Năm juă hơko lu pơtao âu, na lu sư năm juă hloi hơko lu pơtao noh.

²⁵Jôsuê khan kơ lu sư, athei chơ̆n jơhngơ̆m nuih pran. 'Nâu boih Kră Yang wă pơm kơ đĭ-đăng bơngai ayăt kơ lu iĕm, mă lu iĕm wă blah.

²⁶Đơ̆ng noh Jôsuê pơlôch đĭ pơtao, athei đe hơtol kâu pơđăm 'nu pơtao noh tơ kơpal 'long, hơtol pơđăm 'nu pơtao noh truh kơsơ̆.

²⁷'Bơ̆t năr wă mơ̆t, Jôsuê athei đe tơjur akâu lu pơtao lôch đơ̆ng 'long na klơ̆m lê̆ lu sư tơ lăm hơgơp tơmo mă đêl lu sư ôn noh, iŏk tơmo tih klơ̆p lê̆ 'măng, truh tơ dang ei oei đei.

²⁸Kơplah năr noh, Jôsuê đei blah iŏk pơlei Makkêđa, iŏk đao pơlôch pơtao, sư pơlôch đĭ lu bơngai lăm pơlei noh, ưh kơ đei bu oei arih, lu sư pơm kơ pơtao pơlei Makkêđa kư̆m thoi sư pơm kơ pơtao pơlei Jêrikô.

²⁹Jôsuê hăm đĭ-đăng lu linh Isơrael đơ̆ng pơlei Makkêđa năm tơblah hăm pơlei Lipna.

³⁰Kră Yang, jao ăn pơlei Lipna păng pơtao sư lăm ti lu bơngai Isơrael; na Jôsuê iŏk đao gưm pơrăm pơlôch lu bơngai lăm pơlei noh, sư ưh kơ đei rong bu arih, sư pơm kơ pơtao pơlei Lipna kư̆m thoi sư pơm kơ pơtao pơlei Jêrikô.

³¹Jôsuê hăm lu bơngai Isơrael năm kiơ̆ sư đơ̆ng pơlei Lipna, năm tơ pơlei Lakis, pơm anih hăm kơđông linh wă blah hăm pơlei noh.

³²Kră Yang jao pơlei Lakis lăm tơpang ti bơngai Isơrael, năr mă 'bar Jôsuê đei blah iŏk, yua đao gưm pơrăm păng pơlôch lu bơngai oei lăm pơlei noh kư̆m pơm lei-lăi thoi pơlei Lipna.

³³Kơplah noh, Hôram pơtao pơlei Geser, tŏk blah wă dŏng pơlei Lakis, Jôsuê blah pơrăm đĭ, dĭng mah ưh pă đei bu oei arih.

³⁴Jôsuê hăm kon pơlei Isơrael, weh đơ̆ng pơlei Lakis năm tơ pơlei Eglôn, lu sư pơm anih kơđông wă blah pơlei noh.

³⁵Lăm năr noh mơ̆n lu sư blah iŏk pơlei, pơlôch pơrăm kon pơlei oei lăm pơlei noh hăm đao gưm, kư̆m thoi lu sư pơm kơ pơlei Lakis.

³⁶Đơ̆ng noh, Jôsuê hăm lu linh Isơrael đơ̆ng pơlei Eglôn tŏk năm tơ pơlei Hêbrôn wă năm blah pơlei noh,

³⁷blah iŏk pơrăm pơlôch pơlei noh hăm đao gưm păng pơlôch pơtao, hăm lu pơlei jê̆ pơlôch đĭ-đăng kon pơlei kư̆m thoi pơrăm pơlei Eglôn ưh kơ đei bu gơh oei arih.

³⁸Jôsuê hăm lu linh Isơrael, weh tơ pơlei Đêbir păng kư̆m blah iŏk pơlei noh.

³⁹Lu sư blah iŏk pơlei noh păng lu pơlei jê̆, kư̆m rôp pơtao pơlôch hăm đao gưm păng pơlôch đĭ-đăng lu bơngai oei lăm pơlei noh ưh kơ đei lê̆ bu oei arih, sư pơm kơ kon pơlei Đêbir păng pơtao lu sư, kư̆m nhen thoi sư pơm kơ pơlei Hêbrôn pơlei Lipna hăm pơtao sư.

⁴⁰Thoi noh Jôsuê blah iŏk đĭ pơlei đĭ tơring char, tơ gah tơring groi kông, tơring gah gơal, tơring gah groi bơmơ̆t. Tơring tơter kông krang gah hơlĕch păng lu pơtao kơ tơring noh, ưh kơ đei lê̆ bu oei arih, kiơ̆ thoi đơ̆ng nơ̆r Kră Yang 'Bok Kei-Dei Isơrael đei pơkă.

⁴¹Jôsuê blah iŏk, đơ̆ng pơlei Kađes Barnê truh tơ pơlei Gasa păng jơ̆p kơ tơring char Gôsen truh tơ pơlei Gibeôn.

⁴²Lăm minh kơchon noh Jôsuê blah rôp lu pơtao păng blah iŏk pơlei tơring char 'nâu, yua kơ Kră Yang 'Bok Kei-Dei Isơrael, tơblah ăn kơ Isơrael.

⁴³Đơ̆ng noh Jôsuê păng đĭ-đăng linh Isơrael wih brŏk tơ Gilgal.