Read bahnar Jos 11 Bible Online

Jos 11 - bahnar bible

Jos 11

¹Kơplah Jabin, pơtao pơlei Hasor, kơtơ̆ng tơdrong noh, sư athei bơngai năm tơ Jôbap, pơtao Madon, lu pơtao pơlei Simrôn păng pơtao Aksap.

²Hăm lu pơtao oei tơ kơpal kông lăm char gah yă-nơ̆m păng oei lăm thŭng dơnă Araba gah gơal kơ đak Dơsĭ Kinêrot, tơring thŭng jơ̆ng kông gah bơmơ̆t păng tơ tơring kông groi kơjung tơ Naphot Đôr gah bơmơ̆t.

³Đei wơh dơ̆ng năm tơ kon pơlei Kanaan gah hơlĕch păng gah bơmơ̆t, tơ kon pơlei Amôrit, Hêtit, Phêrêsit păng kon pơlei Jêbus, oei kơpal kông groi; păng năm truh tơ kon pơlei Hêwit, jê̆ jơ̆ng kông Hermôn, lăm tơring Mispa.

⁴Lu pơtao păng đĭ-đăng lu linh sư lĕch năm hơdai hăm kon pơlei lơ dêh đei aseh păng gre aseh lơ dêh tơpă nhen thoi chuơh cheng đak dơsĭ,

⁵đĭ-đăng lu pơtao noh akŭm lu linh sư năm pơm anih hơdai tơ jê̆ đak dơnâu Mêrôm wă blah hăm kon pơlei Isơrael.

⁶Mă-lei Kră Yang khan kơ Jôsuê: Ih 'nĕ kơ hli dơning trŏ kơ jơ âu, Inh gô pơjao lu sư kơ kon pơlei Isơrael pơlôch, ih gô rôp aseh koh huan jon păng soh lê̆ đĭ gre aseh lu sư.

⁷Thoi noh Jôsuê păng đĭ-đăng lu linh năm tơblah, blah drŭt lu sư jê̆ đak dơnâu Mêrôm.

⁸Kră Yang jao lu sư lăm tơpang ti bơngai Isơrael. Jôsuê păng đĭ-đăng lu linh blah drŭt lu sư truh tơ pơlei tih Siđôn, Mitrêphôt-Maim păng tơ pŭng-lŭng Mispa tơ gah hơlĕch, na pơlôch lu sư, ưh pă đei lê̆ bu oei arih.

⁹Jôsuê blah lu sư pơm kiơ̆ kơ nơ̆r Kră Yang đei pơkă kơ sư, koh huan jon aseh păng soh gre aseh lu sư.

¹⁰Đơ̆ng noh Jôsuê wih brŏk, blah iŏk pơlei Hasor păng pơlôch pơtao lu sư hăm đao gưm, Yua kơ sơ̆ pơlei Hasor tih jing kơ̆l lăm char ei.

¹¹Jôsuê păng lu linh sư yua đao gưm koh pơlôch đĭ lu bơngai lăm pơlei ei, pă đei bu oei arih, Jôsuê soh pơđĭ pơlei Hasor.

¹²Jôsuê rôp đĭ lu pơtao, koh pơlôch lu sư hăm đao gưm, blah iŏk đĭ pơlei tih lăm char âu kiơ̆ thoi Môis đĭch đam Kră Yang đei tơtă.

¹³Mă-lei lu bơngai Isơrael, ưh kơ soh ôh pơlei oei tơ kơpal groi, Jôsuê đei soh pơlei Hasor đĕch.

¹⁴Kon pơlei Isơrael iŏk kơdih lu tơmam păng sem dơrong mă lu sư đei blah iŏk đơ̆ng lăm pơlei noh, pơlôch pơrăm đĭ lu bơngai hăm đao gưm, pă đei lê̆ minh sem dơrong oei kiơ arih.

¹⁵Kiơ̆ thoi Kră Yang tơtă ăn kơ Môis đĭch đam sư, Môis kư̆m tơtă ăn kơ Jôsuê păng Jôsuê pơm kiơ̆ ưh kơ đei glăi minh tơdrong kiơ, pơm kiơ̆ rim tơdrong Kră Yang tơtă kơ Môis,

¹⁶Thoi noh Jôsuê blah iŏk đĭ tơring, char âu, mă tơring gah kông groi, mă tơring gah gơal, mă tơring Gôsen, mă tơring kông groi gah bơmơ̆t. Lăm teh thŭng dơnă, mă tơring thŭng dơnă Araba tơring kông char Isơrael hăm teh thŭng jơ̆ng kông.

¹⁷Đơ̆ng kông Halak lĕch tơklă pơlei Sêir truh tơ pơlei Baal Gat lăm pŭng-lŭng Liban, tơ jơ̆ng kông Hermôn sư rôp pơđĭ lu pơtao char noh păng pơlôch đĭ lu sư.

¹⁸Jôsuê blah lu pơtao âu đunh tơpă.

¹⁹'Nguaih kơ lu bơngai Hêwit oei tơ lăm pơlei Gibeôn đĕch, ưh kơ đei kon pơlei ayơ wă pơgơ̆p hơdai hăm kon pơlei Isơrael, kon pơlei Isơrael yua tơdrong tơblah 'mơ̆i na gơh rôp lu sư.

²⁰Yua kơ Kră Yang ăn lăm jơhngơ̆m lu pơtao arăng kơ̆l 'maih wă tơblah hăm lu bơngai Isơrael, wă kơ lu sư jing hiong răm đĭ, ưh pă đei bu mơnat, kiơ̆ thoi Kră Yang đei tơtă pơkă boih kơ Môis.

²¹Kơplah noh Jôsuê năm blah kon pơlei Anakim, oei tơ kơpal groi kông, tơ pơlei Hêbrôn, Đêbir, Anap, đơ̆ng jơ̆p kơpal kông groi Juđa, hăm kông groi Isơrael, Jôsuê blah pơlôch pơrăm lu sư, hăm lu pơlei tih lu sư hloi.

²²Ưh pă đei minh 'nu bu bơngai Anakim oei hơdai lăm char lu bơngai Isơrael; oei đei đăi arih lăp lu bơngai lăm pơlei Gasa, pơlei Gat păng lăm pơlei Asdôt.

²³Jôsuê blah iŏk đĭ-đăng tơring char 'nâu, kiơ̆ tôm tơdrong thoi Kră Yang khan pơkă kơ Môis păng Jôsuê asong ăn teh kơ lu bơngai Isơrael jang sa mir 'ba păng klah asong kiơ̆ rim kơ khŭl adrĕch adrung lu sư. Kơplah noh tơring char 'nao đei rơngei hiôk-hian pă đei tơdrong tơblah dơ̆ng.