Read bahnar Jos 13 Bible Online

Jos 13 - bahnar bible

Jos 13

¹Jôsuê kră boih, arih sot lơ sơnăm Kră Yang khan kơ sư: Ih kră boih, oei đei lơ dêh char ưh tam mă blah iŏk.

²'Nâu char tam mă blah iŏk: Đĭ-đăng tơring char bơngai Philistin păng teh đak kon pơlei Gêsur,

³Đơ̆ng đak Krong Sihôr gah hơlĕch kơ char Êyiptơ, truh tơ teh đak Ekrôn gah yă-nơ̆m, noh krao char bơngai Kanaan; đei pơđăm 'nu pơtao char Philistin pơgơ̆r tơ Gasa, Asdôt, Askalon, Gat păng Ekrôn păng pơtao kon pơlei Awim;

⁴Tơ gah gơal, đĭ-đăng kơ char bơngai Kanaan, đơ̆ng Ara, noh lăm kon pơlei Siđôn, noh tơring Aphek, truh tơ teh đak kon pơlei Amôrit;

⁵Char Gêbilit păng đĭ char Liban tơ gah măt 'năr lĕch, đơ̆ng Baal Gat ala kơ jơ̆ng kông Hermôn, truh Hamat,

⁶oei đei kon pơlei oei tơ char tơring kơpal kông, đơ̆ng Liban truh tơ Misrêpôtmaim, noh lu kon pơlei Siđôn. Inh gô puh tơweh lu sư, đơ̆ng anăp măt lu bơngai Isơrael. Ăn teh noh kơ Isơrael jang sa, kiơ̆ thoi inh đei tơtă boih kơ ih.

⁷Păng klah asong bĕ char âu kơ tơsĭn tŏ adrĕch, minh puăt lê̆ kơ adrĕch Manase.

⁸Lu adrĕch Rubên, Gat păng minh puăt lăm adrĕch adrung Manase, đei iŏk boih teh đơ̆ng Môis đĭch đam Kră Yang đei asong ăn kơ lu sư, wă jang sa gah hơlĕch kơ đak Krong Jôrđăn.

⁹Teh đak să iŏk đơ̆ng char Arôe, tơ'bưh 'bơ̆t jih thong Arnôn păng pơlei oei tŏk-bŏk pŭng-lŭng noh păng đĭ kơpal groi kông đơ̆ng Mêđêba truh tơ Đibôn;

¹⁰păng đĭ kơ pơlei tih Sihôn, pơtao đe Amôrit, đei pơgơ̆r tơ pơlei Hesbôn, truh tôch hơdral kon pơlei bơngai Ammôn;

¹¹teh đak noh đĭ đơ̆ng dêh Char Gileat, dêh char kon pơlei Gêsur păng kon pơlei Makatit, đĭ kơ kông Hermôn păng đĭ-đăng kơ char Basan truh tơ Salêka,

¹²đĭ kơ teh đak Ok, pơtao char Basan, sư pơgơ̆r tơ Astarôt păng Êdrei, oei pă minh 'nu sư oei arih lăm kon pơlei Rêphaim, Môis đei blah iŏk đĭ boih lu sư păng iŏk đĭ teh đak lu sư.

¹³Mă-lei kon pơlei Isơrael ưh kơ pơpuh ôh kon pơlei Gêsur păng kon pơlei Makatit, thoi noh lu sư oei hơdai bơngai Isơrael truh tơ dang ei.

¹⁴Mă-lei Môis ưh kơ đei asong ăn teh jang sa kơ lu adrĕch adrung bơngai Lêwi ôh: Yua kơ lu tơmam soi 'buh hăm ŭnh pơyơ̆r ăn kơ Kră Yang 'Bok Kei-Dei Isơrael, noh jing tơdrong jang sa lu sư, đơ̆ng Kră Yang pơkă khan kơ lu sư.

¹⁵Môis ăn boih kơ adrĕch adrung Rubên kiơ̆ kơ adrĕch adrung lu sư.

¹⁶Teh mă adrĕch Rubên iŏk đơ̆ng Arôe truh tơ thong Arnôn, iŏk đơ̆ng pơlei lăm thŭng noh dĭng truh tơ char groi kông hlôi kơ Mêđêba;

¹⁷truh tơ pơlei Hesbôn păng đĭ-đăng lu pơlei oei tơ lăm char kông groi Đibôn, Bamôt Baal, Bêt Baal Mêôn.

¹⁸Jahas, Kêđêmôt, Nêphat,

¹⁹Kêriataim, Sipma, Sêrêt Sahar oei tơ kơpal kông lăm thŭng.

²⁰Bêt Pêôr pơlei oei tơ jơ̆ng kông Pisga, Bêt Jêsamôt,

²¹đĭ-đăng lu pơlei char teh kơpal kông groi đĭ pơlei tih Sihôn, pơtao Amôrit, bơngai mă đei pơgơ̆r tơ Hesbôn, Môis blah iŏk boih pơtao 'nâu, hăm lu kră pơgơ̆r pơlei char Miđian, noh Êwi, Rêkem, Sur, Hur păng Rêba, lu kon pơtao char Sihôn, bơngai mă oei lăm char noh.

²²'Nguaih kơ lu bơngai lôch lăm anih tơblah bơih kon pơlei Isơrael iŏk đao gưm pơlôch Balaam kon drŏ-nglo Bêôr 'bok pơjâu tơwir.

²³Đak Krong Jôrđăn jing hơdral teh lu bơngai Rubên noh boih teh jang lu sư, kiơ̆ kơ adrĕch lu sư pơlei tih, pơlei iĕ jê̆ lu sư.

²⁴Môis đei asong kơ adrĕch Gat, kiơ̆ kơ adrĕch adrung lu sư.

²⁵Teh lu adrĕch Jaser, đĭ-đăng pơlei char Gileat păng minh puăt char kon pơlei Ammôn, truh tơ pơlei Arôe jê̆ pơlei Rapba;

²⁶păng đơ̆ng Hesbôn truh tơ Ramat Mispa, hăm Bêtônim, iŏk đơ̆ng pơlei Mahanaim truh tơ teh đak Đêbir,

²⁷păng tơ lăm thŭng Bêt Haram, Bêt Nimra, Sukôt păng Saphôn noh jing teh oei lê̆ lăm char Sihôn, pơtao Hesbôn gah hơlĕch kơ đak Krong Jôrđăn să truh tơ tôch đak Dơsĭ Kinêret.

²⁸Noh boih teh lu bơngai Gat jang sa, kiơ̆ kơ adrĕch adrung lu sư, hăm pơlei tih pơlei iĕ lu sư.

²⁹Môis đei klah asong ăn minh puăt kơ adrĕch Manase, (wă khan mă minh puăt kơ adrĕch Manase kiơ̆ kơ adrĕch adrung lu sư).

³⁰Teh đak lu sư iŏk đơ̆ng Mahanaim, truh tơ tơring Basan đĭ char Ok pơtao Basan păng đĭ lu pơlei iĕ Jair lăm tơring Basan đei tơdrâu-jĭt tŏ pơlei tih.

³¹Minh puăt char Gileat, pơlei Astarôt, pơlei Êdrei, ('bar tŏ pơlei noh lăm char Ok lăm tơring Basan), pơlei âu đei asong ăn kơ kon sâu Makir, kon drŏ-nglo Manase, wă khan minh puăt lu kon drŏ-nglo Makir kiơ̆ kơ adrĕch adrung lu sư.

³²Noh jing teh jang mă Môis asong ăn teh lăm thŭng dơnă Môap, gah tơklă kơ đak Krong Jôrđăn, pah hơlĕch pơlei Jêrikô.

³³Mă-lei Môis ưh kơ đei asong ăn teh jang kơ lu adrĕch Lêwi, yua kơ Kră Yang 'Bok Kei-Dei Isơrael boih jing teh lu sư jang sa kiơ̆ thoi Kră Yang đei pơkă hăm lu sư.