Read bahnar Jos 14 Bible Online

Jos 14 - bahnar bible

Jos 14

¹Âu boih teh lê̆ kơ kon pơlei Isơrael jang sa lăm dêh char Kanaan, kiơ̆ thoi 'bok soi Êlêasar, Jôsuê kon drŏ-nglo Nun hăm lu kơdră lu adrĕch kon pơlei Isơrael đei asong kơ lu sư.

²Đe hlang iŏk klah asong kơ tơsĭn adrĕch minh puăt, kiơ̆ kơ Kră Yang mă Môis đei khan pơkă.

³Yua kơ Môis đei asong ăn boih teh jang sa kơ 'bar adrĕch, minh puăt tơ hơlĕch gah kơ đak Krong Jôrđăn, mă-lei sư ưh kơ đei klah asong ăn ôh teh jang sa kơ adrĕch bơngai Lêwi.

⁴Adrĕch adrung Jôsep klah asong kơ 'bar, adrĕch Manase păng Êphraim, lu sư ưh kơ đei asong ôh teh wă jang sa kơ lu adrĕch bơngai Lêwi, mă-lei ăn kơ lu sư teh pơm hnam, pơm pơlei oei păng lu teh tơmăn 'nhĕt jih pơlei wă kơ rong lu sem dơrong lu sư.

⁵Kon pơlei Isơrael pơm kiơ̆ kơ Kră Yang hlôi khan pơkă kơ Môis na klah asong teh, chĕng asong dêh char.

⁶Kon sâu Juđa năm tơ Jôsuê tơ Gilgal păng Kalep kon drŏ-nglo Jêphunê, kon pơlei Kênisit khan: Ih băt tơdrong mă Kră Yang khan kơ Môis bơngai Kră Yang 'Bok Kei-Dei tơ char Kades Barnêa tơdrong ih hăm inh.

⁷Kơplah Môis đĭch đam Kră Yang wơh inh năm đơ̆ng char Kades Barnêa athei inh năm chă chop lăng char, inh hlôi puăn-jĭt sơnăm, inh roi kơ sư tơpă kiơ̆ thoi jơhngơ̆m inh.

⁸Mă-lei lu 'nhŏng oh tŏk năm kiơ̆ hơdai inh pơm kơ jơhngơ̆m kon pơlei hli jing rơdu, lei ră inh kiơ̆ boih Kră Yang 'Bok Kei-Dei inh đĭ jơhngơ̆m.

⁹Lăm năr ei Môis đei pơkăm pơkă khan: Tơpă teh mă ih đêl ih juă noh jing teh ih hăm kon sâu ih jang sa ling-lang, yua kơ ih chu kiơ̆ Kră Yang 'Bok Kei-Dei inh đĭ jơhngơ̆m.

¹⁰Lăm puăn-jĭt sơnăm kơ 'nâu, đơ̆ng Kră Yang khan kơ Môis nơ̆r 'nâu kơplah Isơrael oei năm lăm char glă sơ̆, Kră Yang mă wei-lăng tơdrong arih inh truh tơ dang ei, na 'nâu inh đĭ đei tơhngam-jĭt pơđăm sơnăm boih.

¹¹Inh kư̆m oei đei jơhngơ̆m pran thoi kơplah Môis wơh inh năm sơ̆, inh oei đei jơhngơ̆m pran năm tơblah, thoi kơplah noh sơ̆,

¹²Hrei âu ăn bĕ kơ inh teh kông groi âu, mă Kră Yang pơkă boih wă ăn kơ inh lăm năr noh sơ̆, ih kư̆m kơtơ̆ng băt boih năr noh sơ̆ đei kon pơlei Anakim oei tơ noh păng đei pơlei tih să kơjăp, mă-lei đei Kră Yang tơgŭm inh, na inh gô pơpuh lu sư, kiơ̆ thoi Kră Yang khan boih.

¹³Jôsuê hơpơi ăn hloi pŭn hiôk kơ Kalep, kon drŏ-nglo Jêphunê ăn teh Hêbrôn kơ Kalep, jang sa.

¹⁴Thoi noh na Hêbrôn jing teh ăn kơ Kalep jang sa kon drŏ-nglo Jêphunê, đơ̆ng bơngai Kênisit ăn kơ Kalep jang sa mă truh dang ei, yua kơ sư chu păng pơm kiơ̆ Kră Yang 'Bok Kei-Dei Isơrael đĭ jơhngơ̆m.

¹⁵Sơ̆ Hêbrôn đe krao Kiriat Arba, Arba bơngai nuih pran tih kơjung lăm kon pơlei Anakim. Đơ̆ng noh, char đei hiôk-hian ưh pă đei tơdrong tơblah dơ̆ng.