Read bahnar Jos 22 Bible Online

Jos 22 - bahnar bible

Jos 22

¹Jôsuê krao adrĕch Rubên, adrĕch Gat păng minh puăt adrĕch Manase,

²na khan: Lu iĕm đei pơm boih dôm tơdrong đơ̆ng Môis đĭch đam Kră Yang bơtho tơtă. Păng kư̆m chu kiơ̆ dôm nơ̆r inh tơtă pơkă kơ lu iĕm.

³Đơ̆ng sơ̆ khơ̆ dang ei, lu iĕm ưh kơ đei lê̆ ôh 'nhŏng oh lu iĕm, mă-lei kư̆m oei pơm kiơ̆ dôm tơdrong jang đơ̆ng Kră Yang 'Bok Kei-Dei đei pơjao kơ lu iĕm.

⁴Dang ei Kră Yang 'Bok Kei-Dei ăn boih kơ lu 'nhŏng oh iĕm pơdơh hiôk-hian kiơ̆ thoi nơ̆r Kră Yang đei pơkă boih, thoi noh wih brŏk bĕ tơ hnam tơ teh jang sa lăm char lu iĕm mă Môis đĭch đam Kră Yang hlôi ăn boih kơ lu iĕm gah hơlĕch kơ đak Krong Jôrđăn.

⁵Mă-lei athei kơchăng pơm kiơ̆ nơ̆r pơkă păng khôi juăt Môis đĭch đam Kră Yang bơtho pơkă boih kơ lu iĕm 'mêm bĕ kơ Kră Yang 'Bok Kei-Dei lu iĕm păng rok kiơ̆ trong Sư, wei răk nơ̆r Sư tơtă pơgơ̆p hăm Sư păng đĭ jơhngơ̆m đon bơ̆jang kơ Sư.

⁶Jôsuê sơkat ăn pŭn hiôk kơ lu sư, na ăn kơ lu sư wih brŏk tơ anih hnam lu sư kơdih.

⁷Môis ăn boih kơ minh puăt adrĕch Manase, teh jang sa mir 'ba tơ char Basan; Jôsuê ăn kơ minh puăt adrĕch Manase nai teh jang sa tơ gah bơmơ̆t kơ đak Krong Jôrđăn, kơplah Jôsuê ăn kơ lu sư wih brŏk tơ anih hnam kơdih na kư̆m đei sơkat ăn tơdrong pŭn hiôk

⁸păng khan: “Lu iĕm wih brŏk tơ anih kơdih đei chĕp ba tơmam lơ, kon sem dơrong, hăm maih, hu, kong, bơsei păng ao, lơ tơpă athei klah asong ăn kơ 'nhŏng oh iĕm tơmam blah iŏk đơ̆ng lu ayăt kơ lu iĕm.”

⁹Thoi noh lu bơngai Rubên, bơngai Gat păng minh puăt kơ adrĕch Manase weh đơ̆ng kon pơlei Isơrael tơ Silô lăm char Kanaan, wih brŏk tơ char Gileat teh jang sa mir 'ba kơdih, mă lu sư đei blah iŏk boih kiơ̆ kơ nơ̆r Kră Yang pơkă ăn kơ Môis.

¹⁰Kơplah lu sư truh tơ pơlei Geliôt jê̆ Krong Jôrđăn lăm char Kanaan, lu bơngai Rubên, bơngai Gat păng minh puăt adrĕch Manase pơm chơnang soi tih tơ jê̆ đak Krong Jôrđăn;

¹¹wă kon pơlei Isơrael kơtơ̆ng khan lu bơngai Rubên, bơngai Gat păng minh puăt adrĕch Manase, pơm chơnang soi tơ Krong Jôrđăn lăm char Kanaan lăm teh kon pơlei Isơrael gah bơmơ̆t,

¹²đĭ-đăng khŭl akŭm kon pơlei Isơrael, đei akŭm băl tơ Silô pơđâu wă blah lu adrĕch 'nâu.

¹³Thoi noh kon pơlei Isơrael wơh Phinêhas, kon drŏ-nglo 'Bok soi Êlêasar năm truh tơ adrĕch Rubên, adrĕch Gat păng minh puăt adrĕch Manase tơ char Gileat;

¹⁴đei mơjĭt 'nu kră kơdră kiơ̆, lăm minh adrĕch minh 'nu lăm adrĕch Isơrael.

¹⁵Lăp lu sư năm truh tơ adrĕch Rubên, adrĕch Gat păng minh puăt adrĕch Manase lăm char Gileat, khan:

¹⁶Đĭ-đăng tơpôl kon pơlei Kră Yang đei jet: Liơ na lu iĕm pơm glăi hăm Kră Yang 'Bok Kei-Dei Isơrael thoi noh? Yua kơ kiơ lu iĕm achăng lê̆ Kră Yang? Na pơm chơnang soi kơdih wă blah Kră Yang.

¹⁷Tơdrong yoch Phêô pơm kơ kon pơlei Kră Yang lôch hơbuh truh dang ei lu bơ̆n tam mă pơm rơgoh 'lơ̆ng tơdrong noh ưh tam mah hă?

¹⁸Na dang ei lu iĕm pơ̆n achăng lê̆ Kră Yang hă? Tơdah năr 'nâu lu iĕm hơyăt kơ Kră Yang, dơning Kră Yang gô hil mĭl kơ khŭl tơpôl Isơrael.

¹⁹Tơdah teh lu iĕm iŏk kơnê̆ ưh kơ 'lơ̆ng, năm bĕ tơ teh Kră Yang đei pơkă ăn, pơm bơsŭn anih akŭm Kră Yang, na chĕng iŏk teh noh oei păng 'nĕ pơjing chơnang soi kơdih ayăt kơ Kră Yang 'Bok Kei-Dei lu bơ̆n.

²⁰Kơplah Akan kon drŏ-nglo Sêra, đei pơm yoch glăi kơ tơmam trŏ kơ pơrăm păng pơyơ̆r kơ Kră Yang na tơdrong truh đơ̆ng Kră Yang hil mĭl hăm trŏ 'bơm kơ tơpôl lăm Isơrael păng bơngai noh ưh kơ sĭ lôch hơdrô̆ yua kơ yoch sư kơdih!

²¹Na lu bơngai Rubên, bơngai Gat păng minh puăt bơngai Manase tơl lu kră kơdră adrĕch bơngai Isơrael:

²²Kră Yang 'Bok Kei-Dei oei Tih Hloh, Kră Yang 'Bok Kei-Dei Tih Hloh mơsêh mơyang băt tơdrong noh păng Isơrael gô băt! Tơdah 'nâu minh tơdrong blah păng ưh kơ chu kiơ̆ nơ̆r Kră Yang noh lei dang ei apinh Kră Yang 'nĕ pă ăn lu nhôn arih.

²³Tơdah lu nhôn pơm chơnang soi kơdih wă weh đơ̆ng Kră Yang, đei pơyơ̆r tơmam soi 'buh, tơmam soi phe 'ba, pơyơ̆r tơmam soi 'blŏk bơnê hiôk-hian tơ noh, apinh Kră Yang sek tơlang kơ lu nhôn.

²⁴Ưh! Lu nhôn đei đon pơm thoi noh yua kơ lu nhôn hli kon sâu lu 'nhŏng oh ning-mônh pơma khan kơ lu kon sâu nhôn lu iĕm đei kiơ hăm Kră Yang 'Bok Kei-Dei Isơrael?

²⁵Ơ kon sâu Rubên, kon sâu Gat, Kră Yang ăn đak Krong Jôrđăn găn hơdral lu iĕm; hăm lu nhôn lu iĕm ưh kơ đei kiơ hăm Kră Yang! Lei kon sâu lu iĕm gô pơm kơ kon sâu lu nhôn ưh pă hli yom kơ Kră Yang.

²⁶Yua kơ noh lu nhôn khan: Lu bơ̆n athei pơm chơnang soi ưh kơ trŏ wă pơyơ̆r tơmam soi 'buh dah pơyơ̆r tơmam soi nai.

²⁷Mă-lei chơnang soi âu boih gô pơm kơdranh tơ'bôh tŏk-bŏk lu nhôn păng 'nhŏng oh truh tơ kon sâu lu bơ̆n, lu nhôn gô kơkuh kơ Kră Yang tơ Hnam 'Lơ̆ng Rơgoh Sư. Hăm tơmam soi 'buh păng Tơmam soi 'blŏk bơnê hiôk-hian. Đơ̆ng âu tơ anăp, lu kon sâu 'nhŏng oh ưh pă pơma khan kơ lu kon sâu lu nhôn: Lu iĕm ưh kơ đei kiơ lăm Kră Yang ôh!

²⁸Păng lu nhôn đei khan: Dah layơ lu sư khan kơ lu bơ̆n, dah kơ adrĕch lu bơ̆n, thoi noh lu bơ̆n gô tơl: Lu iĕm lăng rup chơnang soi âu trŏ chơnang soi Kră Yang, mă 'bok lu bơ̆n đei pơm sơ̆, chơnang soi 'nâu ưh kơ trŏ wă pơyơ̆r tơmam soi 'buh dah pơyơ̆r tơmam soi nai, mă-lei pơm tơdra tơbăt tŏk-bŏk lu nhôn păng lu iĕm!

²⁹Dang ei lu nhôn ưh kơ đei layơ ayăt kơ Kră Yang păng ưh achăng lê̆ Kră Yang, na khan pơm chơnang soi plơ̆ng pha kơ chơnang soi Kră Yang 'Bok Kei-Dei lu bơ̆n, dan 'bơ̆t anăp bơsŭn anih akŭm wă pơyơ̆r tơmam soi 'buh, tơmam soi phe 'ba păng lu tơmam soi nai.

³⁰Kơplah 'bok soi Phinêhas păng lu kră pơgơ̆r lăm khŭl tơpôl, wă khan lu kră Yŏng kơdră kon pơlei bơngai Isơrael mơ̆ng nơ̆r bơngai Rubên, bơngai Gat păng minh puăt bơngai Manase pơma lu sư lăp đon.

³¹Thoi noh Phinêhas, kon drŏ-nglo 'bok soi Êlêasar, pơma khan hăm lu bơngai Rubên, bơngai Gat păng lu bơngai Manase: Năr âu lu bơ̆n băt boih Kră Yang oei hơdai hăm lu bơ̆n, yua kơ lu tơdrong lu iĕm ưh kơ pơm yoch hăm Kră Yang; dang ei lu iĕm pơklaih kon pơlei Isơrael đơ̆ng tơpang ti Kră Yang.

³²Phinêhas, kon drŏ-nglo 'bok soi Êlêasar, hăm lu kră pơgơ̆r kon pơlei tơklah đơ̆ng bơngai Rubên, bơngai Gat tơ char Gileat, wih brŏk tơ Kanaan; păng roi kơ kon pơlei Isơrael tơdrong noh.

³³Lu kon pơlei Isơrael hiôk kơtơ̆ng tơdrong âu lu sư bơnê kơ Kră Yang 'Bok Kei-Dei, lu sư ưh pă pơma 'bơm kơ tơblah hăm pơrăm lu bơngai Rubên păng bơngai Gat, dơ̆ng.

³⁴Thoi noh lu bơngai Rubên păng bơngai Gat anăn chơnang soi noh Êt wă khan tơbăt pơsĭt tŏk-bŏk lu bơ̆n noh Kră Yang 'Bok Kei-Dei tơpă.