Read bahnar Jos 5 Bible Online

Jos 5 - bahnar bible

Jos 5

¹Kơplah pơtao đe Amôrit gah bơmơ̆t kơ đak Krong Jôrđăn păng đĭ-đăng lu pơtao đe Kanaan, oei jê̆ đak dơsĭ 'nao kơtơ̆ng khan Kră Yang đei pơm kơ Krong Jôrđăn hrơ̆ hrĕng, 'bơ̆t anăp lu kon pơlei Isơrael, dĭng mă lu sư yak tŏk hlôi kơ đak krong, na jơhngơ̆m lu pơtao hli tơtơ̆, mah pă pơ̆n tơ'bơ̆p hăm lu kon pơlei Isơrael.

²Kơplah noh Kră Yang khan kơ Jôsuê: Pơm săng păng tơmo mă han na kăt tơdra akar tăl mă 'bar dơ̆ng kơ adrĕch adrung Isơrael.

³Thoi noh Jôsuê chă hơmet săng pơm păng tơmo kăt tơdra akar ăn kơ kon pơlei Isơrael tơ groi Gibêah Haralôt.

⁴Jôsuê kăt tơdra akar kơ lu sư yua kơ lu kon tơdăm trŏ kơ pơm linh lei, kơplah lu sư lĕch đơ̆ng dêh Êyiptơ, lôch rah rok trong lăm char glă đơ̆ng rŏng kơ lu sư lĕch hlôi đơ̆ng char Êyiptơ.

⁵Đĭ-đăng lu kon drŏ-nglo mă lĕch hlôi đơ̆ng dêh Êyiptơ, chu kăt tơdra akar ngăl, mă-lei lu bơngai mă tơpŭ kơplah lu sư oei rok trong tơ lăm char glă ưh tam kăt tơdra akar đơ̆ng rŏng kơ lu sư lĕch đơ̆ng Êyiptơ.

⁶Kon pơlei Isơrael hlôi yak năm wih wơ̆t lăm char glă puăn-jĭt sơnăm, dĭng mah truh tơ kon drŏ-nglo lôch đĭ noh lu bơngai trŏ kơ pơm linh kơplah lu sư 'nao lĕch đơ̆ng char Êyiptơ, yua kơ ưh kơ chu kiơ̆ kơ nơ̆r Kră Yang. Yua kơ Kră Yang đei pơkă khan lu sư ưh kơ gơh 'bôh dêh char mă Kră Yang đei pơkă wă ăn kơ lu 'bok sư păng wă ăn kơ lu sư teh, đak sut đak toh.

⁷Thoi noh Kră Yang tơiung lu kon drŏ-nglo lu sư tơplih lu sư, 'noh kon drŏ-nglo mă Jôsuê kăt tơdra akar kơ lu sư, lu sư ưh tam mă kăt tơdra akar yua kơ tơ rok trong ưh tam đei pơm giĕng kăt tơdra akar.

⁸Kơplah đe kăt tơdra akar ăn kơ đĭ-đăng lu drŏ-nglo đang boih, na lu sư oei tơ bơsŭn lu sư kơdih dĭng rơka lu sư klaih.

⁹Kơplah noh Kră Yang khan kơ Jôsuê: Năr âu Inh hŭt lê̆ boih tơdrong mơlâu lu iĕm đơ̆ng lu bơngai dêh Êyiptơ, lei na đe krao anăn anih âu Gilgal, mă truh dang ei.

¹⁰Kon pơlei Isơrael pơm anih tơ Gilgal lăm Thŭng dơnă pơlei Jêrikô păng pơm giĕng Năm Brih kơplah drơ̆m kơsơ̆, trŏ kơ năr mơjĭt-puăn khei noh.

¹¹Đơ̆ng rŏng kơ năr pơm giĕng Năm Brih, năr noh boih kon pơlei sa tơmam đơ̆ng mir chŭn dêh noh, sa 'bĕng ưh kơ đei 'buih pông, păng sa găr 'ba hơdrĕng.

¹²Năr mă lu sư đei tơmam sa đơ̆ng mir chŭn dêh noh, truh pơgê năr đơ̆ng rŏng 'bĕng mana ưh pă jur; kon pơlei Isơrael ưh pă đei mana dơ̆ng, lei kơplah sơnăm noh lu sư sa tơmam đơ̆ng mir chŭn lăm teh tơring Kanaan.

¹³Kơplah Jôsuê năm jê̆ pơlei Jêrikô, wă sư ngơk lăng, blư 'bôh hloi minh 'nu bơngai chĕp đao dơ̆ng tơklă 'bơ̆t anăp sư, Jôsuê năm tơ sư păng jet: Ih bơngai gah nhôn dah gah bơngai ayăt kơ nhôn?

¹⁴Sư tơl: Ưh, Inh Yŏng Linh Kră Yang. Jôsuê drap tơ teh kŭp kơ̆l kơkuh: Jet “Kră Yang athei đĭch đam Ih 'nâu pơm kiơ?”

¹⁵Yŏng pơgơ̆r linh Kră Yang khan kơ Jôsuê: “Ih athei plôh chơkhŏ đơ̆ng jơ̆ng ih yua kơ anih ih oei dơ̆ng 'nâu anih rơgoh.” Jôsuê pơm kiơ̆ thoi noh.