Read bahnar Jos 6 Bible Online

Jos 6 - bahnar bible

Jos 6

¹Kơplah noh pơlei Jêrikô tang chơkăl đĭ-đăng 'măng jang boih, yua kơ lu bơngai Isơrael truh ưh pă đei bu mơ̆t dah lĕch.

²Kră Yang khan kơ Jôsuê: Âu Inh jao boih pơlei Jêrikô, pơtao sư păng lu linh nuih pran sư lăm tơpang ti ih.

³Lei ih hăm đĭ-đăng lu linh athei yak dăr tăp kơ pơlei âu minh wơ̆t, athei pơm thoi noh lăm tơdrâu năr.

⁴Tơpơh 'nu 'bok soi năm adrol kơ Hom Pơgơ̆p chĕp tơpơh tŏ tơgiĕp hơke bơbe bram, truh năr mă tơpơh, lu iĕm athei dăr jum dăr kơ pơlei noh tơpơh wơ̆t, hơdai hăm tơpơh 'nu 'bok soi hlôm tơgiĕp,

⁵Mưh lu 'bok soi hlôm tơgiĕp re, lu iĕm kơtơ̆ng tơgiĕp hlôm re, đĭ-đăng kon pơlei pơla 'bơ̆r ôr jreo, na dur gô păk pơchah, kon pơlei gô tŏk hao mơ̆t rok tơklă anăp lu sư.

⁶Thoi noh Jôsuê kon drŏ-nglo Nun, krao lu 'bok soi na khan: Tung bĕ Hom Pơgơ̆p păng tơpơh 'nu 'bok soi năm adrol kơ Hom Pơgơ̆p Kră Yang, chĕp tơpơh tŏ tơgiĕp.

⁷Sư khan dơ̆ng kơ kon pơlei: Năm bĕ! Dăr tăp kơ pơlei hơdai păng lu bơngai chĕp khêl đao năm adrol kơ Hom Kră Yang.

⁸Lăp Jôsuê khan kơ kon pơlei đang boih, tơpơh 'nu 'bok soi chĕp tơpơh tŏ tơgiĕp năm tơ anăp Kră Yang, năm rah hlôm rah tơgiĕp Hom Pơgơ̆p Kră Yang kiơ̆ đơ̆ng rŏng,

⁹Lu bơngai chĕp đao kơtuang, năm adrol kơ lu 'bok soi hlôm tơgiĕp, khŭl linh kiơ̆ đơ̆ng rŏng Hom tơdrong pơgơ̆p, kơplah lu sư oei dăr năm rah hlôm rah tơgiĕp.

¹⁰Mă-lei Jôsuê khan dơ̆ng kơ kon pơlei: Lu iĕm lê̆ kơ ôr jreo, 'nĕ kơ pơma, 'nĕ kơ pơma dơnuh tơduă lu iĕm dĭng truh layơ mă inh athei: Ôr jreo bĕ 'bơ̆t noh kơnh lu iĕm ôr jreo.

¹¹Thoi noh Jôsuê athei đe tung Hom Pơgơ̆p Kră Yang dăr kơ pơlei minh wơ̆t, đơ̆ng noh lu sư mơ̆t pơdơh tep kơmăng tơ anih.

¹²Pơgê đơ̆ng rŏng Jôsuê iung đơ̆ng hrôih păng lu 'bok soi tung Hom Pơgơ̆p Kră Yang.

¹³Tơpơh 'nu 'bok soi chĕp tơpơh tŏ tơgiĕp năm tơ anăp yak adrol kơ Hom Pơgơ̆p Kră Yang hlôm rah; lu chĕp khêl đao kơtuang năm adrol kơ đĭ-đăng lu sư păng đei, khŭl linh năm kiơ̆ đơ̆ng rŏng Hom Kră Yang, 'bok soi yak rah hlôm rah tơgiĕp hơnơ̆ng.

¹⁴Năr mă 'bar lu sư năm yak tăp dăr kơ pơlei minh wơ̆t wih brŏk tơ anih, lu sư pơm thoi noh lăm tơdrâu năr.

¹⁵Lăm năr mă tơpơh lu sư iung đơ̆ng hrôih, măt 'năr 'nao 'brưch hơdah, năm tăp dăr kơ pơlei tơpơh wơ̆t kư̆m thoi ki, lăp lăm năr noh đĕch lu sư năm tăp dăr kơ pơlei tơpơh wơ̆t,

¹⁶Dăr wơ̆t mă tơpơh, lu 'bok soi hlôm tơgiĕp re pơhioi na Jôsuê khan kơ kon pơlei: Ôr jreo pơret bĕ, yua kơ Kră Yang jao ăn pơlei âu kơ lu iĕm boih.

¹⁷Pơlei păng tôm tơmam lăm noh, athei pơyơ̆r kơ Kră Yang nhen thoi tơmam trŏ kơ pơlôch pơrăm; lăp minh 'nu Rahap drŏ-kăn đi păng đĭ-đăng bơngai oei lăm hnam sư đĕch gô arih, yua kơ sư đei ôn boih bre 'bar 'nu bơngai năm chop lăng mă inh đei wơh.

¹⁸Mă-lei iĕm athei kơchăng kơ tơmam lu iĕm hlôi pơrăm, wă kơ lu iĕm huay kơ lôch răm yua kơ iŏk lu tơmam noh, tơdah kon pơlei ưh kơ chu pơm kiơ̆ lei lu iĕm pơm kơđông linh Isơrael kư̆m lôch răm, pŭ iŏk tơdrong răm.

¹⁹Hu, maih păng đĭ-đăng tơmam pơm hăm kong mam 'măn lê̆ pha kơ Kră Yang, tơmam noh rơgoh gô tah tơmơ̆t lăm hnam mong tơmam Kră Yang.

²⁰Kon pơlei ôr păng lu 'bok soi hlôm tơgiĕp re pơhioi. Kơplah lu sư kơtơ̆ng tơgiĕp đe hlôm re pơhioi na lu sư ôr jreo rơ̆n, dur pơlei păk pơchah đĭ, rim 'nu năm mơ̆t tơklă anăp kơdih. Kon pơlei đei blah iŏk pơlei noh.

²¹Iŏk đao pơlôch đĭ bơngai lăm pơlei noh, drŏ-nglo, kră, hơ'lơ̆p, truh tơ sem dơrong: Rơmo, triu păng aseh iĕ.

²²Jôsuê khan kơ bre 'bar 'nu bơngai mă chop lăng pơlei noh: Măr iĕm năm mơ̆t bĕ tơ hnam Rahap drŏ-kăn đi athei lu sư lĕch, thoi măr iĕm mă đei pơkă hăm sư.

²³Thoi noh bre 'bar 'nu bơngai chop lăng noh mơ̆t athei Rahap, mĕ 'bă sư, 'nhŏng oh, lĕch chông ba lu sư đĭ, bre 'bar 'nu bơngai noh chông ba đĭ hnam dơnŏ hăm sư păng ba lu sư oei gah 'nguaih kơ kơđông linh Isơrael.

²⁴Đơ̆ng noh lu sư soh rông chhông đĭ hnam lăm pơlei păng đĭ lu tơmam lăm noh, Hu, Maih, kong, mam đĕch tah lăm hnam mong tơmam Kră Yang.

²⁵Thoi noh Jôsuê wei-lăng tơdrong arih Rahap bơngai drŏ-kăn đi, hăm đĭ-đăng lu bơngai lăm hnam dơnŏ 'bă sư, lu sư oei hơdai hăm lu bơngai Isơrael, truh tơ dang ei, yua kơ sư đei ôn bre bơngai chop lăng, mă Jôsuê wơh năm chop lăng pơlei Jêrikô.

²⁶Kơplah noh Jôsuê pơma pơkă pơkăm thoi âu: Bơngai bu man pơdơ̆ng ming pơlei Jêrikô, đe gô hiap pơtê̆ 'bơ̆t anăp Kră Yang! Bu man pơdơ̆ng ming hơnă sư, kon drŏ-nglo kơdră sư gô lôch, bu man pơdơ̆ng ming măng jang pơlei, kon hơdruch sư gô lôch.

²⁷Kră Yang oei hơdai Jôsuê, đe ư-ang anăn sư jơ̆p-jang lăm char sư.