Read bahnar Jos 8 Bible Online

Jos 8 - bahnar bible

Jos 8

¹Kơplah noh, Kră Yang khan kơ Jôsuê: Ih 'nĕ kơ hli tơrơ, chông ba đĭ-đăng lu linh hơdai ih, iung năm blah bĕ pơlei Ahi, to Inh jao sư lăm tơpang ti ih, pơtao Ahi, kon pơlei sư, pơlei hăm tơring noh.

²Ih blah pơm bĕ kơ pơlei Ahi, hăm pơtao, sư thoi ih pơm boih kơ pơlei Jêrikô păng pơtao sư, pha 'biơ̆ minh tơdrong, lu iĕm gơh iŏk yua kơdih sem dơrong lu sư, hăm dôm tơmam iĕm blah iŏk. Răp bĕ tơ gah rŏng kơ pơlei.

³Thoi noh Jôsuê iung hơdai hăm lu linh năm tŏk blah pơlei Ahi, Jôsuê rơih iŏk pêng-jĭt rơbâu 'nu bơngai nuih kơtang, athei lu sư yak năm kơmăng,

⁴Sư pơkă khan: Lu iĕm răp tơ gah rŏng kơ pơlei, 'nĕ kơ răp ataih kơ pơlei ôh, lu iĕm răp mă kơchăng hơmăt ling-lang.

⁵Inh hăm lu bơngai kiơ̆ inh, năm jê̆ tơ anăp pơlei noh, tơdah lu sư năm blah lu nhôn thoi adrol ki, lu nhôn pơm kơdâu kơ lu sư,

⁶lê̆ lu sư druh lu nhôn, lu nhôn pơm kơdâu dĭng mă ataih đơ̆ng pơlei boih, lu sư gô khan: Lu sư kơdâu kơ lu bơ̆n thoi ki mơ̆n, thoi noh nhôn pơm kơdâu kơ lu sư,

⁷lu iĕm lĕch đơ̆ng anih iĕm răp iung kơdâu năm mơ̆t blah iŏk pơlei; Kră Yang 'Bok Kei-Dei lu bơ̆n gô ăn pơlei noh tơ lăm tơpang ti lu bơ̆n.

⁸Mưh lu iĕm đei iŏk boih pơlei, lu iĕm athei soh pơlei noh, athei pơm kiơ̆ thoi Kră Yang đei ată, lăng hŏ inh pơkă boih kơ lu iĕm,

⁹Jôsuê athei lu linh năm răp sơlam pơlei Bethel păng pơlei Ahi, gah bơmơ̆t kơ pơlei Ahi, Jôsuê măng noh oei hơdai hăm kon pơlei,

¹⁰Pơgê đơ̆ng rŏng Jôsuê iung đơ̆ng hrôih, jô̆ lu linh sư, sư păng lu kră pơgơ̆r năm adrol kơ lu linh truh tơ pơlei Ahi,

¹¹Đĭ-đăng lu linh kiơ̆ Jôsuê năm jê̆ tơ tơklă anăp pơlei păng pơm anih gah yă-nơ̆m kơ pơlei Ahi, tơ pŭng-lŭng thŭng să sơlam lu sư hăm pơlei Ahi,

¹²Jôsuê ăn boih linh dang pơđăm-rơbâu 'nu drŏ-nglo răp găn sơlam pơlei Bethel hăm pơlei Ahi, gah bơmơ̆t kơ pơlei.

¹³Đang kơ dan lê̆ lu linh răp gah yă-nơ̆m, kơ pơlei tih păng ăn lê̆ lu linh găn răp gah bơmơ̆t. Lăm măng noh, Jôsuê năm jur tơ lăm thŭng,

¹⁴Wă pơtao Ahi 'bôh tơdrong noh, lu sư hăt hot iung đơ̆ng hrôih, pơtao hăm kon pơlei sư sơng blah Isơrael, tơ anih tơmang 'bôh Araba. Mă-lei pơtao ưh kơ băt, đei minh khŭl linh răp tơ gah rŏng kơ pơlei,

¹⁵Jôsuê păng đĭ-đăng kon pơlei Isơrael, lê̆ lu ayăt năm blah, pơm thuơ, na kơdâu tơklă tơ lăm thŭng glă.

¹⁶Krao đĭ-đăng lu bơngai drŏ-nglo lăm pơlei Ahi, wă druh lu ayăt. Lu sư druh Jôsuê pơrơi lu sư ataih đơ̆ng pơlei,

¹⁷ưh pă đei minh 'nu drŏ-nglo bu oei lăm pơlei Ahi hăm pơlei Bethel. Đĭ-đăng hăt kơ druh lu linh Isơrael, lu sư achăng lê̆ pơlei.

¹⁸Kơplah noh Kră Yang khan kơ Jôsuê: Yơ̆r tơju ih, tơ gah pơlei Ahi, Inh jao ăn pơlei noh lăm tơpang ti ih, Jôsuê hiŏng yơ̆r tơju sư tơklă pơlei Ahi.

¹⁹Lăp Jôsuê yơ̆r ti sư lu linh răp noh iung, kơdâu năm blah iŏk hloi pơlei păng soh hloi pơlei noh.

²⁰Lu bơngai drŏ-nglo pơlei Ahi wih lăng tơ rŏng 'bôh đei 'nhui ŭnh đe soh pơlei đông tơ kơpal plĕnh. Mă-lei lu sư đĭ pă gơh kơdâu gah yơ, yua kơ lu linh Isơrael mă kơdâu boih tơ lăm thŭng wih tơ rŏng blah lu bơngai mă druh lu sư.

²¹Jôsuê păng lu linh Isơrael, 'bôh lu linh răp noh đei iŏk boih pơlei Ahi păng 'bôh 'nhui ŭnh đông kơjung, lu sư wih tơ rŏng blah lu linh pơlei Ahi,

²²lu linh răp lĕch đơ̆ng pơlei kư̆m năm blah lu bơngai Ahi, thoi noh lu linh Ahi tŏk-bŏk, lu linh Isơrael, găn wang tăp 'bar pah. Lu linh Isơrael blah pơlôch lu sư ưh pă đei bu oei arih păng klaih hlôi.

²³Lu linh Isơrael rôp arih pơtao pơlei Ahi, chông ba sư tơ Jôsuê,

²⁴Đang kơ lu linh Isơrael pơlôch đĭ boih bơngai pơlei Ahi, lăm anih thŭng glă mă lu đei druh, lu sư pơlôch đĭ hăm đao gưm boih, lu linh Isơrael wih mơ̆t tơ pơlei Ahi păng pơlôch pơđĭ lu bơngai mă oei arih lăm pơlei.

²⁵Đe pơlôch lu bơngai Ahi lăm năr noh, đĭ-đăng lu bơngai drŏ-nglo păng drŏ-kăn đei mơjĭt-'bar rơbâu 'nu.

²⁶Jôsuê ưh kơ đei kơchôt chĕp tơju yơ̆r ti sư hơnơ̆ng, gô dĭng mă pơlôch pơrăm đĭ lu bơngai Ahi 'mơ̆i.

²⁷Kon pơlei Isơrael blah iŏk kơdih lu sem dơrong păng lu mŭk tơmam pơlei âu, trŏ thoi Kră Yang pơkă boih kơ Jôsuê:

²⁸Thoi noh Jôsuê prah ŭnh soh, pơm kơ pơlei Ahi pơchah răm jing juơ tơtŭng, dĭng truh tơ dang ei.

²⁹Jôsuê hrek hơtol lê̆ pơtao Ahi, 'bơ̆t tơm 'long truh kơsơ̆, truh 'năr wă mơ̆t, Jôsuê athei đe tơjur đơ̆ng tơm 'long, klơ̆m hơtat lê̆ 'bơ̆t 'măng jang mơ̆t tơ pơlei, đe dan tơmo kơpal akâu pơtao lôch minh pôi tih oei đei dĭng truh tơ dang ei.

³⁰Jôsuê đei pơdơ̆ng chơnang soi kơ Kră Yang 'Bok Kei-Dei adrĕch Isơrael, tơ kông Êbal.

³¹Kiơ̆ thoi Môis, đĭch đam Kră Yang, đei bơtho pơkă boih kơ kon pơlei Isơrael, Jôsuê man pơdơ̆ng chơnang soi noh kiơ̆ trŏ thoi đei chih lăm sơ̆p hla bơar khôi juăt Môis pơkă man hăm minh pôm tơmo tih, ưh kơ yua hăm bơsei ôh, lu sư pơyơ̆r tơmam soi 'buh kơ Kră Yang păng pơyơ̆r tơmam soi apinh hiôk-hian tơ noh.

³²Tơ noh Jôsuê rek chih khôi juăt lăm tơmo, mă kiơ̆ kơ Môis đei chih adrol sơ̆, 'bơ̆t anăp kon pơlei Isơrael.

³³Đĭ-đăng bơngai Isơrael, kon pơlei hăm lu bơngai tơmoi, hơdai hăm lu kră pơlei, lu kră pơgơ̆r, lu kră sek tơlang, dơ̆ng 'bar pah kơ Hom Pơgơ̆p Kră Yang 'bơ̆t anăp lu bơngai tung Hom tơdrong pơgơ̆p noh lu 'bok soi bơngai Lêwi, minh puăt kon pơlei dơ̆ng gah anăp kơ Kông Gêrasim, minh puăt gah anăp Kông Êbal kiơ̆ thoi Môis, đĭch đam Kră Yang, đei tơtă boih adrol sơ̆ kơplah sư sơkat ăn pŭn hiôk kơ kon pơlei Isơrael.

³⁴Jôsuê đŏk đĭ nơ̆r khôi juăt, tơdrong sơkat hơpơi pŭn hiôk dah tơdrong sơkat hiap pơtê̆, đei chih lăm sơ̆p hla bơar khôi juăt.

³⁵Ưh kơ đei nơ̆r ayơ Môis đei bơtho khan, mă Jôsuê ưh kơ đŏk ưh kơ roi tơbăt ăn kơ bơngai Isơrael, mă drŏ-kăn, hơ'lơ̆p păng mă tơmoi oei hơdai lu sư.