Read bahnar Jos 9 Bible Online

Jos 9 - bahnar bible

Jos 9

¹Đĭ-đăng lu pơtao gah bơmơ̆t kơ đak Krong Jôrđăn đei kơtơ̆ng tơdrong âu, lu pơtao oei lăm bri kông, lăm thŭng dơnă, ala jơ̆ng kông gah bơmơ̆t păng tơring rok tơter đak Dơsĭ Tih truh tơ Liban, noh lu pơtao kon pơlei Hêtit, kon pơlei Amôrit, kon pơlei Kanaan, kon pơlei Perêsit, kon pơlei Hêwit, kon pơlei Jêbus,

²hơdai minh jơhngơ̆m đon wă blah Jôsuê hăm kon pơlei Isơrael.

³Lăp kon pơlei Gibeôn kơtơ̆ng khan Jôsuê blah pơlei Jêrikô păng pơlei Ahi,

⁴lu sư chă đon hơlĕnh, lu sư hơmet hao aseh iĕ, iŏk 'bi so chơ hơtŏk tơ kơdŭ aseh păng iŏk get akar mong sik hơmu đĭ hiah, sĭt hơmet.

⁵Jơ̆ng lu sư 'bot chơkhŏ so, sĭt klĕp hrŭk ao so hiah hiot, đĭ-đăng tơmam sa lu sư đĭ kro krĕnh đĭ phơ̆k,

⁶Lu sư năm truh tơ Jôsuê lăm anih tơ Gilgal. Lu sư khan pơma hăm Jôsuê păng lu bơngai Isơrael: Lu nhôn bơngai đơ̆ng dêh ataih, na dang ei apinh lu iĕm hăm bơ̆n pơgơ̆p băl.

⁷Mă-lei kon pơlei Isơrael tơl lu bơngai Hêwit: Băt lu iĕm oei jê̆ lu nhôn. Pơm liơ bơ̆n gơh pơgơ̆p băl?

⁸Mă-lei lu sư khan kơ Jôsuê: “Lu nhôn đĭch đam ih,” Jôsuê jet, “Lu iĕm bu? Đơ̆ng yơ?”

⁹Lu sư tơl, lu đĭch đam ih âu đơ̆ng dêh ataih kơtơ̆ng ang kơ anăn Kră Yang 'Bok Kei-Dei ih, yua kơ lu nhôn đei kơtơ̆ng boih đe roi gah Kră Yang păng tôm tơdrong Kră Yang hlôi pơm boih lăm char Êyiptơ.

¹⁰Păng kơtơ̆ng dôm tơdrong Kră Yang pơm boih kơ 'bar 'nu pơtao Amôrit, oei gah hơlĕch kơ đak Krong Jôrđăn, Sihôn pơtao Hesbôn păng Ok pơtao char Basan pơgơ̆r tơ Astarôt.

¹¹Lu kră pơlei nhôn hăm đĭ-đăng lu kon pơlei mă oei lăm char nhôn khan kơ lu nhôn. Iŏk hơmet ba bĕ tơmam sa yak kơ trong, năm tơ'bơ̆p lu sư păng khan: Lu nhôn jing đĭch đam iĕm, dang ei bĕ bơ̆n pơm tơdrong pơgơ̆p băl.

¹²Âu lăng 'bĕng mi lu nhôn, chĕp đơ̆ng hnam oei tơtŏ wă năm tơ âu, dang ei đĭ kro krĕnh đĭ phơ̆k phok.

¹³Lu get akar kơplah nhôn mong sik hơmu oei 'nao oei hơnĭl, lăng âu đĭ pơchah păng hơbĕn ao, chơkhŏ lu nhôn đĭ so hiah, yua kơ năm trong ataih.

¹⁴Lu bơngai Isơrael iŏk tơmam sa lu sư, mă-lei ưh kơ đei krao apinh Kră Yang.

¹⁵Jôsuê pơm tơdrong hiôk păng pơgơ̆p hăm lu sư păng lê̆ lu sư oei arih. Lu kră pơgơ̆r lăm khŭl akŭm pơkă pơkăm hăm lu sư.

¹⁶Đơ̆ng rŏng kơ pêng năr, wă đang pơgơ̆p hăm bơngai Gibeôn, kon pơlei Isơrael băt, kơ lu bơngai âu tơring kơdih oei jê̆ lu sư.

¹⁷Kon pơlei Isơrael yak năm năr mă pêng truh tơ pơlei lu sư, pơlei Gibeôn, Kêphira, Bêrôt păng Kiriat, Jêrim.

¹⁸Mă-lei kon pơlei Isơrael ưh kơ đei blah lu sư ôh, yua kơ lu kră pơlei wei-lăng khŭl akŭm lu sư đei pơkă pơkăm boih hăm lu sư krao anăn Kră Yang 'Bok Kei-Dei Isơrael. Đĭ lu khŭl akŭm lu sư jŏk hil kơ lu kră wei-lăng.

¹⁹Mă-lei lu kră tơl khan: Lu bơ̆n pơkă pơkăm hăm lu sư pao anăn Kră Yang 'Bok Kei-Dei Isơrael, na dang ei lu bơ̆n ưh kơ gơh hơtŭt pơrăm lu sư.

²⁰'Nâu lu bơ̆n athei pơm kơ lu sư thoi âu: Ăn kơ lu sư oei arih, lei Kră Yang huay kơ hil mĭl kơ bơ̆n. Yua kơ lu bơ̆n đei pơkă pơkăm hăm lu sư boih.

²¹Lu kră wei-lăng Isơrael khan dơ̆ng lê̆ lu sư arih, mă-lei lê̆ lu sư chă kăl 'long ŭnh, chhŏ đak ăn kơ lu khŭl tơpôl. Thoi noh lu sư wei răk nơ̆r lu kră pơgơ̆r khan.

²²Jôsuê krao kon pơlei Gibeôn khan kơ lu sư: Liơ lu iĕm hơlĕnh pơhlŭ lu nhôn khan: Lu nhôn oei ataih dêh đơ̆ng lu iĕm, mă-lei lu iĕm oei jê̆ lu nhôn.

²³Dang ei đe hiap pơtê̆ boih, đĭ-đăng lu iĕm gô pơm đĭch, mơ'nah lu iĕm chă kăl 'long ŭnh, tung đak, lăm hnam 'Bok Kei-Dei inh.

²⁴Lu sư tơl Jôsuê. Noh tơdrong mă lu đĭch đam ih băt hơđăl boih, Kră Yang 'Bok Kei-Dei iĕm đei khan kơ Môis, đĭch đam Sư gô ăn đĭ char âu kơ lu iĕm păng gô pơlôch đĭ-đăng kon pơlei 'bơ̆t anăp iĕm, na lu nhôn hli dêh, kơ iĕm pơrăm tơdrong arih lu nhôn, lei na lu nhôn pơm thoi noh.

²⁵Dang ei lu nhôn oei lăm tơpang ti iĕm, mơ̆ng kơ iĕm wă pơm kơ lu nhôn, kiơ̆ kơ iĕm lăng 'lơ̆ng dah trŏ.

²⁶Jôsuê pơm kiơ̆ thoi nơ̆r lu sư pơma, pơklaih lu sư đơ̆ng ti lu bơngai Isơrael wă pơlôch.

²⁷Đơ̆ng năr noh chă wơh ăn lu sư chă kăl 'long ŭnh, chhŏ đak kơ khŭl tơpôl păng kơ chơnang soi Kră Yang kiơ̆ kơ anih mă Kră Yang đei rơih iŏk, noh tơdrong jang kơ lu sư noh dĭng truh tơ dang ei.