Read bahnar I Tim 6 Bible Online

I Tim 6 - bahnar bible

I Tim 6

¹Đĭ-đăng lu bơngai lui, lu mơ'nah đĭch đe, sư athei lui yom kơ yŏng tơ'ngla sư wă kơ lu bơngai tam mă lui 'bôh sư pơm 'lơ̆ng kơ yŏng tơ'ngla sư na sư huay kơ pơjăm 'Bok Kei-Dei păng huay kơ pơjăm nơ̆r bơ̆n bơtho tơdrong 'nao 'lơ̆ng.

²Đei bơngai đĭch păng yŏng, bre sư jing 'nhŏng oh yua kơ bre sư lui kơ Kră Yang boih, na bơngai đĭch ei athei lui yom kơ yŏng sư, sư jang kơ yŏng sư 'lơ̆ng hloh kơ sư tam mă lui sơ̆. 'Noh yua kơ sư đei đon 'mêm tơpă kơ yŏng sư, yua kơ yŏng sư bôl bơngai lui. Ih athei bơtho kơ đe dôm tơdrong inh ată wă kơ đe pơm kiơ̆.

³Bơngai bu bơtho chroih tơ nai ưh kơ 'blep trŏ thoi Kră Yang bơ̆n Yêsu Krist bơtho, tơdrong sĭt tơpă na bơ̆n lui âu, bơngai 'noh sư chă pơang akâu kơdih sư đĕch. Sư kơkal 'bơ̆r rơkah, sư ưh kơ pơwao akâu kơdih wă pơma thoi yơ. Sư 'maih chă pơjah pơjăng đĕch, sư chă pơma kơ bôl buăl sư, sư pơjah pơjăng dih băl păng che bơle, tơgar nơ̆r pơma, bu kư̆m wă kơ jei bu. Păng sư chă đăk đon kơdih khan đe wă pơm kơnê̆ kơ sư.

⁵Đon lu sư jing ưh pă 'lơ̆ng boih, na lu sư pơjah pơjăng ling-lang. Lu sư ưh kơ hlôh tơdrong 'Bok Kei-Dei. Lu sư ưh kơ lui mă-lei lu sư pơma dih băl khan: “Bơ̆n pơm thoi bơngai lui, đơ̆ng noh na bơ̆n chă bơtho pơgŏ đe na gơh mơdrŏng.”

⁶Dah bơ̆n lui tơpă hăm đĭ jơhngơ̆m, noh kư̆m dang bơ̆n mơdrŏng mơ̆n yua kơ jơhngơ̆m bơ̆n hiôk 'lơ̆ng păng Sư boih.

⁷Kơplah lăm mĕ bơ̆n tơpŭ kơ bơ̆n oei nge sơ̆, bơ̆n ưh kơ đei chĕp tơmam kiơ tơlĕch tơ teh âu. 'Noh thoi lĕ bơ̆n lôch ning-mônh, bơ̆n ưh kơ gơh chĕp ba tơmam kiơ ôh.

⁸Kơplah bơ̆n oei arih, đei tơmam sa păng hơbĕn ao hrŭk, dôm noh đĕch 'lơ̆ng boih.

⁹Lu bơngai wă chă mơdrŏng, yang Satan gô pơhlŭ sư, na sư 'maih chă tơdrong âu, tơdrong to, tơdrong kư̆ kă, tơdrong ưh kơ 'lơ̆ng kơ sư, na sư gô đei răm 'Bok Kei-Dei phak.

¹⁰Bơngai bu hăt kơ chă jên, sư gô pơm tôm tơdrong kơnê̆. Đei bơngai lu mơ'nah hăt kơ chă jên ling-lang na sư jing achăng tơdrong lui sư păng sư đei lơ tơdrong ơh sơ'ngon.

¹¹Ơ Timôthê, ih bơngai kiơ̆ 'Bok Kei-Dei, ih athei weh ataih đơ̆ng tơdrong kơnê̆ 'noh, ih adrin pơm đon 'lơ̆ng tơpăt, lui mă kơjăp, 'mêm kơ 'Bok Kei-Dei păng pơm jơhngơ̆m dim 'mêm kơ bôl buăl mơ̆n. Đei tơdrong gleh truh tơ ih ră, mă-lei ih athei adrin pơm kiơ̆ 'Bok Kei-Dei khŏm khŏm.

¹²Pơtih gia lu bơngai kơdâu pơjei, bơngai bu mă kơdâu adrin tơpă jei sư, bơngai 'noh sư gô đei apah. Mă ih kư̆m lei-lăi athei adrin mă tơpă, lui mă kơjăp na jei ih, na ih gô đei iŏk tơdrong arih tơ plĕnh ling-lang. Hơtai ih lui tơm hmơm sơ̆, đe krao khan kơ ih đang boih, na ih pơma 'bơ̆t anăp đe tơpôl lơ khan ih wă tơpă lui kơ Yêsu Krist. Đơ̆ng noh sơ̆ boih 'Bok Kei-Dei ăn kơ ih arih ling-lang.

¹³Đĭ-đăng khŭl arih tơ ala teh đơ̆ng 'Bok Kei-Dei ăn arih ngăl. Yêsu Krist pơma 'lơ̆ng tơpăt 'bơ̆t anăp 'bok pơtao Pilat. Na ih oei 'bơ̆t anăp 'Bok Kei-Dei păng Yŏng bơ̆n Yêsu Krist, ih athei kơchăng pơm kiơ̆ dôm tơdrong Sư pơkă kơ bơ̆n. 'Nĕ ăn đe tơplih tơdrong Sư pơkă kơ bơ̆n 'noh. Ih athei wei ling-lang tơ̆p truh năr Yŏng bơ̆n Yêsu Krist jur ning-mônh.

¹⁵Trŏ năr 'Bok Kei-Dei ăn Kon Sư Yêsu Krist jur tơ ala teh âu ning-mônh. 'Bok Kei-Dei boih hiôk-hian tơpă, pôm Sư boih pơgơ̆r tôm tơdrong. Sư pơm 'Bok Pơtao Sư tih hloh kơ đĭ-đăng lu pơtao nai, Sư pơm Yŏng Sư tih hloh kơ đĭ-đăng lu yŏng nai.

¹⁶Sư ưh kơ layơ lôch. Sư oei tơ anih rang mơnhal, ưh kơ đei bu gơh năm jê̆ Sư. Đơ̆ng sơ̆ khơ̆ ning-mônh kon bơngai ala teh ưh kơ đei bu 'bôh Sư. Na bĕ bơ̆n pơư pơang 'Bok Kei-Dei mă pơgơ̆r ling-lang. A-men.

¹⁷Ih khan kơ lu bơngai mơdrŏng 'nĕ pơang akâu kơdih păng khan kơ sư 'nĕ gơnang kơ mŭk măk sư mơdrŏng. Athei sư tơchĕng gơnang kơ 'Bok Kei-Dei đĕch gơh tơgŭm sư. Tơdrong mơdrŏng ưh kơ kơjăp nhoi ôh. 'Bok Kei-Dei hơlăng, Sư ăn kơ bơ̆n tôm tơdrong bơ̆n kăl yua wă kơ bơ̆n chơt hiôk.

¹⁸Ih khan kơ lu bơngai mơdrŏng athei pơm jơhngơ̆m 'lơ̆ng păng đe păng athei gơh tơgŭm mơnat kơ lu bơngai dơnuh hin tơmam.

¹⁹Dah sư hơlăng kơ đe thoi noh, mŭk măk sư huach 'biơ̆ mơ̆n, mă-lei sư mơdrŏng tôm tơdrong nơ̆r pơma đơ̆ng 'Bok Kei-Dei tơgŭm sư ling-lang păng sư gô iŏk tơdrong arih ning-mônh.

²⁰Ơ Timôthê, ih athei wei dôm lu nơ̆r inh pơkă kơ ih âu hŏ păng ih 'nĕ ăn kơ đe tơplih nơ̆r pơma âu. Păng ih 'nĕ kơ năm mơ̆ng lu bơngai năm bơtho tơdrong 'Bok Kei-Dei mơ̆n mă ưh kơ trŏ yua kơ sư bơtho ưh kơ trŏ thoi bơ̆n ôh. Lu sư bơtho ưh kơ lei-lăi, sư bơtho kư̆ kă đĕch, mă-lei sư khan sư bơtho trŏ tơpă.

²¹Thoi noh boih na đei bơngai lui kiơ̆ thoi gah bơ̆n, sư lui kiơ̆ gah đe bơtho dơ̆ng, sư mơ̆ng gah đe bơtho khan trŏ, na sư lui kiơ̆ đe ei na achăng hŭt gah tơdrong lui kơ Yêsu. Inh apinh 'Bok Kei-Dei wei-lăng rim 'nu kơ lu iĕm tôm tơdrong.