Read bahnar Heb 12 Bible Online

Heb 12 - bahnar bible

Heb 12

¹Bơ̆n 'bôh lơlap lơlang lu bơngai noh sơ̆, lu sư đei đon lui kơjăp tơpă, na lu bơ̆n athei adrin kiơ̆ thoi lu sư. Bơ̆n adrin thoi lu bơngai kơdâu pơjei băl. Thoi noh na lu bơ̆n athei tŭk lê̆ dôm tơdrong mă pơm kơ akâu bơ̆n trăp păng tôm kơ tơdrong yoch mă oei chô̆ pơkơ̆ng bơ̆n. Bơ̆n athei adrin kơdih kơdih kơdâu rok trong mă 'Bok Kei-Dei đêl pơkă kơ bơ̆n boih.

²Bơ̆n athei lăng Yêsu ling-lang, yua kơ Sư pơih trong kơ bơ̆n lui kơ 'Bok Kei-Dei kơjăp truh tôch. Sơ̆ Sư băt tôm tơdrong 'Bok Kei-Dei wă ăn kơ Sư gô hiôk, na Sư chu iŏk đe pơ̆ng pơlôch Sư tơ 'long pơglang. Sư ưh kơ tơchĕng kơ đe pơm kơnê̆ pơ'brơh kơ Sư ôh. Na dang ei Sư oei gah 'ma kơ 'Bok Kei-Dei.

³Iĕm athei pơwao kơ Yêsu, Sư iŏk dôm tơdrong lu bơngai yoch pơm kơnê̆ pơ'brơh kơ Sư; thoi noh na iĕm kư̆m lei-lăi 'nĕ kơ klai, 'nĕ kơ lao đon; athei adrin hăt hăi thoi Sư ling-lang.

⁴Gah tơdrong lu bơngai yoch tơblah păng iĕm, iĕm ưh tam mă mah adrin truh kơ pham lĕch sĕch huŏng ôh.

⁵Iĕm hiơt boih hă tơdrong 'Bok Kei-Dei pơlung bơ̆n wă kơ bơ̆n huay kơ sơ'ngon? Lăm sơ̆p hla bơar Sư đei chih khan kơ bơ̆n thoi âu: “Ơ dăm, e 'nĕ kơ hli ôh 'Bok Kei-Dei bơtho pơjĭ 'biơ̆ e. E 'nĕ kơ rai pơhơi 'bơ̆t Sư bơtho tơbral e.

⁶Yua kơ bơngai bu Sư 'mêm, Sư bơtho pơjĭ bơngai noh, wă kơ dôm lu bơngai wă jing kon Sư, sư gơh răk đon.”

⁷Thoi noh na bơ̆n athei chu iŏk dôm tơdrong gleh 'Bok Kei-Dei bơtho noh. Sư bơtho yua kơ bơ̆n jing kon Sư. Hăm đei bu lơ̆m lu iĕm 'bă sư ưh kơ đei bơtho pơjĭ? Ưh kơ đei bu ôh.

⁸Đĭ-đăng bơngai đei mĕ 'bă bơtho pơjĭ ngăl. Na dah 'Bok Kei-Dei ưh kơ đei bơtho pơjĭ iĕm, noh iĕm ưh kơ trŏ kơ kon Sư tơpă ôh.

⁹Mĕ 'bă pơjing bơ̆n tơ teh âu, sư kư̆m bơtho pơjĭ bơ̆n na bơ̆n băt chu yom kơ sư. Na 'nei 'Bă Tơm tơdrong arih bơhngol bơ̆n; bơ̆n athei chu yom kơ Sư rai loi, na bơ̆n gơh arih ling-lang.

¹⁰Mĕ 'bă, sư bơtho pơjĭ bơ̆n gô mơ̆ng kơ sư wă, kơplah bơ̆n oei 'lơ̆p. Na 'Bok Kei-Dei bơtho pơjĭ bơ̆n Sư wă tơgŭm bơ̆n tơpă, wă kơ bơ̆n pơm 'lơ̆ng thoi Sư.

¹¹Kơplah bơ̆n đei tơdrong bơtho pơjĭ, bơ̆n mơn kơ chhŭr nuih ưh kơ hiôk ôh. Mă-lei tơ̆ng bơ̆n băt kơ chu yom, bơ̆n gô jing bơngai 'lơ̆ng tơpăt hiôk hơiă tơpă.

¹²Thoi noh na iĕm 'nĕ kơ pơhơi, athei iung mă tơpăt.

¹³Iĕm athei pơm trong iĕm yak mă tơpăt, wă kơ lu bơngai jĭ cho jo jăn yak huay kơ tơpling jơ̆ng, wă kơ lu sư jah klaih.

¹⁴Bơ̆n athei adrin pơm jơhngơ̆m đon dim hiôk hơiă kơ đĭ-đăng bơngai. Păng athei adrin pơm 'lơ̆ng tơpăt ling-lang. Tơ̆ng ưh, bơ̆n ưh kơ gơh 'bôh Kră Yang ôh.

¹⁵Đĭ-đăng kơ iĕm athei kơchăng, wă kơ lơ̆m lu iĕm huay kơ đei bu achăng lê̆ tơdrong 'Bok Kei-Dei đêl pơm kơ iĕm lui kơjăp boih; wă kơ lơ̆m lu iĕm huay kơ đei bu pơhlŭ bôl iĕm kiơ̆ sư pơm yoch.

¹⁶Iĕm athei kơchăng, wă kơ lơ̆m lu iĕm huay kơ đei bu ngôi pơyô kư̆ kă, dah pơhơi tơdrong 'Bok Kei-Dei thoi Êsâu sơ̆. Sư tĕch đĭ dôm mŭk tơmam mă 'bă sư wă ăn kơ sư yua kơ sư kon kơdră, mă sư tĕch pơđĭ kơ oh sư lăp minh 'măng sa đĕch.

¹⁷Đơ̆ng rŏng iĕm kư̆m băt mơ̆n sư wă dơ̆ng ră, sư athei 'bă sư krao khan pơsĭt kơ 'Bok Kei-Dei ăn kơ sư jing kon kơdră dơ̆ng. Mă-lei 'bă sư ưh pă gơh boih, mă sư nhơ̆m hmoi lung 'bă sư dang yơ lap đĕch, ưh pă gơh tơwih băl boih, yua kơ 'nhŏng oh bre sư tơplih băl đang boih.

¹⁸Tơ̆ng bơ̆n gơnang kơ Yêsu Krist tơpă, bơ̆n huay kơ hli kơ 'Bok Kei-Dei thoi lu bơngai Isơrael sơ̆ ôh. Lu bơngai Isơrael sơ̆ lu sư hli kơ 'Bok Kei-Dei pơm tơ'bôh kơ lu sư đei ŭnh pla tih tơ kông Sinai păng đei 'nhui găm măng mu đei kial hơbŭt.

¹⁹Lu bơngai noh sơ̆ lu sư kơtơ̆ng jơwa đe hlôm keng, re dêh păng kơtơ̆ng 'bơ̆r 'Bok Kei-Dei pơma. Lu sư khan kơ 'Bok Kei-Dei 'nĕ pă pơma kơ lu sư,

²⁰yua kơ lu sư ưh kơ kĕ mơ̆ng tôm kơ nơ̆r 'Bok Kei-Dei pơma noh. 'Bok Kei-Dei khan kơ sư thoi âu: “Mă kiơ kiơ pel 'bơm dah nheh 'bơm kông âu, mă kon bơngai mă kon sem dơrong, athei klơ̆m pơlôch sư păng tơmo.”

²¹Tôm tơdrong ei krưp dêh, na Môis mah khan: “Inh hli tơrơ dêh.”

²²Mă-lei kông mă 'Bok Kei-Dei wă tơ'bôh kơ bơ̆n, ưh kơ sĭ kơ kông Sinai lu bơngai noh sơ̆ ôh. Bơ̆n gô tŏk truh tơ kông Siôn tơ plĕnh ti mă đe anăn Pơlei Jêrusalem, pơlei tơ'ngla 'Bok Kei-Dei mă arih ling-lang. Tơ ei ưh kơ băt dôm rơbâu rơngan 'nu lu linh jang 'lơ̆ng akŭm kơkuh kơ 'Bok Kei-Dei hiôk chơt.

²³Bơ̆n gô tŏk kiơ̆ truh tơ lu kon kơdră 'Bok Kei-Dei mă đe đei chih anăn lu sư tơ Pơlei 'Bok Kei-Dei. Păng bơ̆n gô mơ̆t truh tơ anih 'Bok Kei-Dei tơ'ngla mă sek tơlang đĭ rim 'nu bơngai. Păng bơ̆n gô năm truh tơ bơhngol lu bơngai 'lơ̆ng tơpăt mă 'Bok Kei-Dei ăn hiôk oei hơdai hăm Sư.

²⁴Bơ̆n gô năm truh tơ Yêsu tơ'ngla mă pơm 'long sơlam kơ bơ̆n kiơ̆ kơ tơdrong pơgơ̆p 'nao. Pham Sư pơklaih bơ̆n đơ̆ng tơdrong yoch. Pham Sư noh 'lơ̆ng hloh kơ pham Abel sơ̆ yua kơ pham Abel tơ'bôh kơ đe gah tơdrong pơm tơwih kơ 'nhŏng sư pơlôch sư đĕch.

²⁵Iĕm athei kơchăng, 'nĕ kơ sơngah kơ nơ̆r 'Bok Kei-Dei bơtho pơkă kơ iĕm. Tơ̆ng iĕm sơngah kuă kơ chu nơ̆r Sư pơma kơ iĕm, lei iĕm gô pŭ tơdrong phak thoi lu bơngai noh sơ̆ ưh kơ chu kơ nơ̆r Sư pơma kơ lu sư tơ ala teh âu, na 'Bok Kei-Dei phak lu sư. Na dang ei Sư pơma kơ bơ̆n đơ̆ng plĕnh, tơ̆ng bơ̆n sơngah kuă kơ chu kơ nơ̆r Sư, Sư wă phak lu bơ̆n tơpă.

²⁶Kơplah Sư pơma kơ lu bơngai noh sơ̆, nơ̆r Sư pơma pơm kơ teh adrŏ. Ahrei Sư khan thoi âu dơ̆ng: “Pă minh 'măng Inh pơm, ưh pă pơm kơdrô̆ teh boih; Inh wă pơm pơđĭ plĕnh păng teh hloi.”

²⁷Nơ̆r Sư pơkă, pă minh 'măng noh, wă khan, gô truh năr ei kơnh, Sư wă gơgŭ adrŏ plĕnh păng teh mă đêl Sư pơjing wă pơtôch boih, na dôm tơdrong mă ưh kơ gơh adrŏ, tơdrong noh oei ling-lang.

²⁸Thoi noh na bĕ bơ̆n bơnê kơ Sư, yua kơ Sư wă ăn kơ bơ̆n oei tơ minh pôm teh đak mă ưh kơ gơh pơchah răm. Bơ̆n athei kơkuh kơ Sư kiơ̆ thoi Sư lăp đon. Bơ̆n athei băt hli chu kơ Sư mă tơpă, hli kơ bơ̆n pơm ưh kơ trŏ thoi Sư lăp đon,

²⁹yua kơ Sư Kră Yang bơ̆n, thoi lĕ kơ ŭnh soh chhông.