Read bahnar Heb 3 Bible Online

Heb 3 - bahnar bible

Heb 3

¹Ơ lu 'nhŏng oh, iĕm jing bơngai 'lơ̆ng tơpăt boih păng iĕm đei anăn 'Bok Kei-Dei wă krao tơmơ̆t tơ Pơlei 'Lơ̆ng Sư ning-mônh. Na inh wă kơ iĕm tơchĕng 'biơ̆ gah tơdrong Yêsu mă tơpă, yua kơ 'Bok Kei-Dei pôk Sư pơm jơ̆ng 'bang wă tơbăt ăn kơ bơ̆n tơdrong 'Bok Kei-Dei. Păng 'Bok Kei-Dei kư̆m pôk Sư pơm 'bok soi tơm jang tơdrong 'Bok Kei-Dei gah tơdrong lui bơ̆n.

²Na Yêsu jang 'lơ̆ng tơpă dôm tơdrong 'Bok Kei-Dei pơkă kơ Sư, kư̆m thoi Môis jang tơgŭm hnam dơnŏ 'Bok Kei-Dei sơ̆, sư jang kiơ̆ thoi 'Bok Kei-Dei pơkă tơpă.

³Mă-lei gah Yêsu đe ư-ang hloh kơ Môis, yua kơ Sư tơ'ngla mă pơjing hnam dơnŏ noh. Gah Môis sư minh 'nu bơngai lơ̆m hnam noh đĕch.

⁴Kơlih kơ rim hnam đei tơ'ngla pơm ngăl. Tơ'ngla mă pơm noh wă khan 'Bok Kei-Dei boih, yua kơ Sư pơjing tôm tơdrong.

⁵Môis sư pơm đĭch đam 'Bok Kei-Dei jang tơgŭm kơ đĭ-đăng hnam dơnŏ 'Bok Kei-Dei sơ̆. Sư jang tơnen dêh, sư jang kiơ̆ kơ 'Bok Kei-Dei pơkă hloi. Sư 'bok khan lê̆ hơdrol bơtho tơbăt kơ kon bơngai gah tơdrong ning-mônh.

⁶Mă Yêsu Krist Sư kư̆m jang trŏ thoi 'Bok Kei-Dei pơkă mơ̆n, mă Sư jang wei-lăng đĭ-đăng kơ hnam dơnŏ 'Bok Kei-Dei hloi, yua kơ Sư Kon 'Bok Kei-Dei. Lu bơ̆n, tơ̆ng bơ̆n oei lui kơjăp, bơ̆n kư̆m hnam dơnŏ Sư mơ̆n, dah bơ̆n oei gơnang kơ Sư tơgŭm bơ̆n khŏm khŏm.

⁷Thoi noh na iĕm athei kiơ̆ kơ nơ̆r Yang Bơhngol 'Lơ̆ng khan sơ̆ thoi âu: “Đơ̆ng âu tơ anăp mưh iĕm kơtơ̆ng nơ̆r Inh pơma,

⁸iĕm 'nĕ pă arăng kơ̆l thoi lu yă 'bok iĕm mă oei tơ dêh glă sơ̆, lu sư kơchu dêh păng pơlong Inh lơ tơdrong tăm.

⁹Tơ anih âu boih lu yă 'bok iĕm pơlong Inh păng kơchu kơ Inh sơ̆. Lu sư 'bôh ră mơ̆n tơdrong Inh pơm 'lơ̆ng kơ lu sư kơplah lơ̆m puăn-jĭt sơnăm sơ̆.

¹⁰Kơlih kơ thoi noh na Inh hil kơ lu sư mah khan thoi âu: ‘Lơ̆m jơhngơ̆m đon iĕm ngăl 'maih chă tơdrong hơwơ̆l kuă kơ chu tơdrong Inh.’

¹¹Thoi noh na Inh hil kơ lu sư thoi âu: ‘Iĕm pơm thoi noh, iĕm ưh kơ gơh layơ wă mơ̆t pơdơh tơ dêh char Inh.’ ”

¹²Ơ 'nhŏng oh, iĕm athei kơchăng hli kơ iĕm đei jơhngơ̆m kơnê̆ jing kuă kơ lui, achăng lê̆ 'Bok Kei-Dei Kră Yang mă arih ling-lang.

¹³Kơplah ahrei brei drâu oei tam mơ̆n, na rim năr iĕm athei pơlung dih băl, wă kơ đĭ-đăng kơ iĕm huay kơ lui kơ đe pơhlŭ pơlung iĕm pơm yoch jing arăng kơ̆l.

¹⁴Tơdah bơ̆n lui kơjăp khŏm khŏm truh năr tôch, bơ̆n gô oei hơdai hăm Yêsu Krist ling-lang. Tơdah bơ̆n ưh kơ kiơ̆ Sư khŏm khŏm, bơ̆n ưh kơ gơh oei hơdai hăm Sư ôh.

¹⁵Thoi noh na 'Bok Kei-Dei khan sơ̆ thoi âu: “Đơ̆ng âu tơ anăp mưh iĕm kơtơ̆ng nơ̆r Inh pơma, iĕm 'nĕ pă arăng kơ̆l thoi lu yă 'bok iĕm mă oei tơ dêh glă sơ̆, lu sư kơchu dêh.”

¹⁶Kơplah noh sơ̆ đei lơ bơngai kơtơ̆ng nơ̆r 'Bok Kei-Dei boih, mă-lei lu sư ưh kơ chu. Lu bơngai noh boih Môis anhăk đơ̆ng dêh Êyiptơ.

¹⁷Kơplah puăn-jĭt sơnăm noh sơ̆ 'Bok Kei-Dei hil kơ đe bu? Sư hil kơ lu bơngai Isơrael pơm yoch. 'Noh na lu sư lôch kơtă hloi tơ dêh glă.

¹⁸Bĭ Sư khan: Iĕm ưh kơ gơh layơ wă mơ̆t pơdơh tơ dêh char Inh, noh Sư hil kơ đe bu? Sư hil kơ lu bơngai mă ưh kơ chu Sư.

¹⁹'Noh bơ̆n băt nhên boih, lu sư ưh kơ gơh mơ̆t pơdơh tơ dêh char Sư, yua kơ lu bơngai noh ưh kơ đei đon lui.