Read bahnar Heb 4 Bible Online

Heb 4 - bahnar bible

Heb 4

¹'Bok Kei-Dei kư̆m pơkă kơ bơ̆n gơh mơ̆t pơdơh tơ dêh char Sư, thoi noh na bơ̆n athei kơchăng tơpă hli kơ bơ̆n lê̆ tơdrong lui, Sư ưh kơ ăn mơ̆t.

²Yua kơ bơ̆n kơtơ̆ng boih đe bơtho tơdrong 'nao 'lơ̆ng, thoi lu bơngai noh kơtơ̆ng sơ̆, mă ưh kơ yua kiơ kơ lu bơngai noh, kơlih kơ lu sư ưh kơ wă lui.

³Pôm bơ̆n bơngai lui gô mơ̆t pơdơh hăm Sư tơpă, yua kơ bơ̆n băt kơ Sư khan kơ lu bơngai noh sơ̆ khan: “Inh hil kơ lu sư thoi âu: ‘Iĕm pơm thoi noh, iĕm ưh kơ gơh layơ wă mơ̆t pơdơh tơ dêh char Inh.’ ” Lu bơngai noh ưh kơ gơh mơ̆t pơdơh hăm Sư, ưh kơ sĭ yua kơ anih hnam ưh kơ mah dah ưh kơ đei. Ưh ôh. Anih hnam hăm tôm tơdrong nai Sư hơmet lê̆ đơ̆ng blŭng-a Sư pơjing plĕnh păng teh sơ̆ boih.

⁴Yua kơ lăm hla bơar Sư kư̆m đei khan gah năr tơpơh noh sơ̆ thoi âu: “Truh năr tơpơh, 'Bok Kei-Dei pơdơh tôm kơ tơdrong jang Sư.”

⁵Na 'Bok Kei-Dei khan lu bơngai noh ưh kơ layơ gơh mơ̆t pơdơh hăm Sư tơ dêh char Sư, bơ̆n băt kơ Sư pơdơh boih gô kon bơngai pơdơh hơdai hăm Sư.

⁶Lu bơngai noh sơ̆ kơtơ̆ng boih đe bơtho tơdrong 'nao 'lơ̆ng, mă lu sư ưh kơ chu kuă kơ lui, noh na lu sư ưh kơ gơh mơ̆t pơdơh hăm Sư. Lu sư kuă lê̆, 'Bok Kei-Dei ăn kơ bơngai nai mơ̆t.

⁷Thoi noh đunh tơpă đơ̆ng rŏng kơ noh Sư athei Đawit pơma thoi nơ̆r inh roi kơ iĕm tơ kơpal noh hei, Sư khan: “Đơ̆ng âu tơ anăp mưh iĕm kơtơ̆ng nơ̆r Inh pơma, iĕm 'nĕ pă arăng kơ̆l.” Thoi noh na ahrei Sư ăn kơ kon bơngai mơ̆t pơdơh hăm Sư boih.

⁸Sơ̆ 'bok Jôsuê anhăk lu bôl sư bơngai Isơrael năm oei tơ minh pôm dêh 'Bok Kei-Dei ăn. Mă ưh kơ sĭ 'Bok Kei-Dei wă ăn kơ lu bơngai chăl Đawit sơ̆ oei pơdơh hơdai hăm Sư tơ dêh char noh ôh. Sư khan noh oei đunh tơpă ưh kơ băt dôm jơhnơr, Sư khan lê̆ kơ lu bơngai chăl Đawit wă kơ lu bơngai noh chu kơ Sư, Sư wă ăn mơ̆t oei tơ dêh char Sư tơ plĕnh.

⁹'Noh na ahrei Sư wă ăn kơ lu kon Sư mơ̆t pơdơh tơ Sư ling-lang, kư̆m thoi Sư pơdơh kơ tơdrong jang Sư năr tơpơh 'noh sơ̆.

¹⁰Bơngai bu pơdơh hăm 'Bok Kei-Dei, bơngai noh sư pơdơh kơ tơdrong jang Sư, thoi 'Bok Kei-Dei pơdơh kơ tơdrong jang Sư sơ̆.

¹¹Kơlih kơ thoi noh na bơ̆n athei adrin lui mă tơpă wă kơ gơh mơ̆t pơdơh tơ 'Bok Kei-Dei păng wă kơ bơ̆n huay kơ đei bu hiong kơ tơdrong 'noh thoi lu bơngai arăng kơ̆l kuă kơ lui sơ̆.

¹²Yua kơ nơ̆r 'Bok Kei-Dei arih ling-lang, jăng dêh păng han hloh kơ đao 'bar pah măt, 'bet han klĕch tơ sĕch huan kơting, hrĕch kơtĕch jơhngơ̆m đơ̆ng bơhngol. Tơdrong Sư sek tơlang bơ̆n thoi noh. Sư băt tôm tơdrong đon tơchĕng kon bơngai 'maih pơm.

¹³Ưh kơ đei tơdrong kiơ mă hlơp kơ 'Bok Kei-Dei tơ'ngla mă sek tơlang bơ̆n, Sư 'bôh nhên tôm tơdrong kon bơngai pơm.

¹⁴Bơ̆n đei minh 'nu 'bok soi tih wei-lăng bơ̆n, Sư tŏk ưh kơ băt hơdôm tăl plĕnh, anăn Sư Yêsu Kon 'Bok Kei-Dei; noh na bơ̆n athei lui kơ Sư khŏm khŏm.

¹⁵Sư ưh kơ sĭ 'bok soi mă ưh kơ băt mơnat kơ kon bơngai rơdu tơrăn ôh. Sư mơnat kơ bơ̆n tơpă, yua kơ Sư mơn kơdih hơdai đei tơdrong pơhlŭ thoi kon bơngai bơ̆n. Gah tơdrong pơm yoch, Sư ưh kơ đei pơm yoch kiơ ôh.

¹⁶Thoi noh na bĕ bơ̆n năm jê̆ tơ anăp Sư. Huay kơ hli ôh, Sư mơnat kơ bơ̆n tơpă, Sư wă tơgŭm bơ̆n lơ̆m dôm tơdrong bơ̆n kăl yua.