Read bahnar Heb 8 Bible Online

Heb 8 - bahnar bible

Heb 8

¹Dôm tơdrong inh pơma kơ iĕm dang ei, tơdrong âu kăl tơpă, thoi inh roi kơ iĕm tơ kơpal noh hei: Bơ̆n đei minh 'nu 'bok soi tih, Sư oei gah 'ma kơ 'Bok Kei-Dei tơ plĕnh ti.

²Sư jang tơ lăm hnam 'Bok Kei-Dei tơ plĕnh ti, tơ lăm anih mă 'Bok Kei-Dei oei hloi. Hnam noh 'Bok Kei-Dei pơjing 'lơ̆ng tơpă, 'lơ̆ng hloh kơ hnam 'Bok Kei-Dei mă kon bơngai pơm tơ teh âu.

³Rim kơ đe pôk pơm 'bok soi tih, đe wă kơ lu 'bok soi noh soi tơmam kơ 'Bok Kei-Dei; thoi noh na Yêsu kư̆m đei tơmam Sư wă soi kơ 'Bok Kei-Dei mơ̆n.

⁴Tơ̆ng Yêsu oei tơ teh, đe ưh kơ ăn Sư pơm 'bok soi ôh, kơlih kơ Sư adrĕch adrung kon sâu bơngai nai, ưh kơ trŏ kơ adrĕch adrung lu bơngai noh. Lu bơngai noh lu sư adrĕch adrung 'bok Lêwi, lu sư soi kiơ̆ kơ tơdrong juăt 'Bok Kei-Dei pơkă sơ̆.

⁵Lu sư jang awih tơ lăm hnam 'Bok Kei-Dei tơ teh âu. Hnam lu sư pơm pơtrŏ thoi hnam 'Bok Kei-Dei tơ kơpal plĕnh ti. Hnam tơ plĕnh ti 'Bok Kei-Dei oei tơpă. 'Noh thoi 'Bok Kei-Dei khan boih kơ Môis, kơplah mă Môis wă pơtơm pơm hnam 'Bok Kei-Dei păng tua-la-tăng sơ̆. 'Bok Kei-Dei khan thoi âu: “Ih athei kơchăng pơm mă trŏ kiơ̆ thoi Inh tơ'bôh kơ ih tơ kông ki.”

⁶Mă-lei 'Bok Kei-Dei ăn kơ Yêsu đei tơdrong jang tih hloh kơ tơdrong jang lu 'bok soi noh. Rai pơthim dơ̆ng kơ Sư pơm 'long sơlam pơgơ̆p kon bơngai kơ 'Bok Kei-Dei. Tơdrong pơgơ̆p noh 'lơ̆ng hloh kơ tơdrong pơgơ̆p so, yua kơ Sư pơkă wă tơgŭm bơ̆n dang ei 'lơ̆ng hloh.

⁷Tơ̆ng tơdrong pơgơ̆p so pơyua kon bơngai tơpă, lei ưh kơ kăl kơ pơjing tơdrong pơgơ̆p 'nao ôh.

⁸Kơlih kơ thoi noh na Kră Yang hil kơ lu bơngai Isơrael ưh kơ pơm kiơ̆ tơdrong pơgơ̆p so: Kră Yang khan thoi âu: “Ning-mônh Inh gô pơjing tơdrong pơgơ̆p 'nao kơ lu bơngai Juđê hăm đĭ kơ lu bơngai Isơrael nai.

⁹Tơdrong pơgơ̆p 'nao ei ưh pă thoi tơdrong pơgơ̆p mă Inh pơjing ăn kơ lu yă 'bok iĕm kơplah mă Inh chông ba lu sư jăk đơ̆ng dêh Êyiptơ sơ̆ ôh. Tơdrong pơgơ̆p noh sơ̆ lu sư kuă kơ kiơ̆. Thoi noh na Inh achăng lê̆ lu sư, Kră Yang khan.

¹⁰Păng ning-mônh Inh wă pơjing tơdrong pơgơ̆p 'nao kơ lu bơngai Isơrael thoi âu: Inh wă tah tơdrong juăt Inh pơkă tơ lăm đon tơchĕng lu sư, Inh wă chih tơ'băk tơdrong juăt Inh tơ lăm jơhngơ̆m lu sư, Inh pơm Kră Yang lu sư, lu sư gô jing kon pơlei pơla Inh.

¹¹Ning-mônh lu sư ưh pă kăl kơ pơtơm băl lui kơ Inh boih, yua kơ đĭ-đăng lu sư đơ̆ng 'lơ̆p truh tơ kră băt kơ Inh ngăl boih.

¹²Inh gô mơnat kơ tơdrong yoch lu sư đêl pơm, Inh ưh pă tơchĕng boih kơ dôm tơdrong kơnê̆ noh.”

¹³'Bok Kei-Dei pơma dơ̆ng gah tơdrong pơgơ̆p 'nao, Sư jô̆ kơ tơdrong pơgơ̆p hơdrol sơ̆ thoi lĕ kơ so boih. Tơdrong kiơ so, tơdrong noh wă jê̆ hiong tôch boih.