Read bahnar Ya 1 Bible Online

Ya 1 - bahnar bible

Ya 1

¹Inh Yakơ đĭch đam 'Bok Kei-Dei hăm đĭch đam Kră Yang bơ̆n Yêsu Krist chih hơpong kơ mơjĭt-'bar khŭl bơngai Isơrael đĭ tơklah tơklang, tơ kông minh hlak tơ đak minh găr jơ̆p kơ teh đak, kơkuh hmach tôm kơ iĕm.

²Ơ lu 'nhŏng oh inh, mă iĕm đei tơdrong gleh kiơ truh kơ iĕm, iĕm athei hiôk đĕch hŏ,

³yua kơ iĕm băt boih, tơ̆ng bơ̆n đei lơ tơdrong gleh, tơdrong gleh noh wă pơlong lăng tơdrong lui bơ̆n, kư̆m bưh mơ̆n, wă kơ bơ̆n lui kơjăp.

⁴Păng bơ̆n athei adrin lui kơjăp khŏm khŏm wă kơ bơ̆n jing bơngai tơpăt huay kơ'bah tơdrong kiơ.

⁵Tơ̆ng đei lăm lu iĕm bơngai bu ưh tam gan hlôh tơdrong 'Bok Kei-Dei, bơngai noh athei apinh 'Bok Kei-Dei ăn kơ sư hlôh. Na 'Bok Kei-Dei gô ăn kơ sư hlôh tơpă, yua kơ 'Bok Kei-Dei hơlăng dêh, Sư ưh kơ kret ôh kơ lu bơngai mă apinh Sư păng Sư huay kơ hil kơ lu bơngai mă apinh Sư noh.

⁶Mă-lei bơ̆n athei lui kơ tơdrong bơ̆n krao khan noh gô đei tơpă, na Sư 'maih tơgŭm. Tơ̆ng bơ̆n tơchĕng ưh kơ ngêh kơ đei, thoi noh 'Bok Kei-Dei ưh kơ wă tơgŭm bơ̆n ôh. Bơngai tơchĕng thoi noh sư dang lĕ kơ đak dơsĭ kial dơhlu,

⁷mă pơm tơdrong kiơ kiơ sư kư̆m ưh kơ hơnơ̆ng 'mơ̆i, yua kơ sư tơchĕng đon 'bar pah, na 'Bok Kei-Dei ưh kơ wă tơgŭm ôh.

⁹Lăm lu 'nhŏng oh bơ̆n bơngai bu dơnuh hin, sư kư̆m hiôk bĕ yua kơ 'Bok Kei-Dei jô̆ jing kon Sư.

¹⁰Bơngai bu mơdrŏng jing dơnuh hin sư kư̆m hiôk bĕ, yua kơ tơdrong mơdrŏng sư ưh kơ kăl ôh. Lu bơngai mơdrŏng gô hiong hiach thoi pơkao 'long bri brah.

¹¹Pơkao 'long bri brah, mưh truh kơ 'năr tŏ dêh, hla sư jing jô, pơkao sư hơlŭng hơliĕng, lăng sư ưh pă 'lơ̆ng rŏ thoi 'năr rơngơp boih. Bơngai mơdrŏng kư̆m lei-lăi, sư hăt dêh kơ chă mŭk tơmam wă kơ mơdrŏng, mă sư gô lôch hiong hloi.

¹²Bơngai bu đei tơdrong đe pơlong lăng sư, tơdrong gleh truh kơ sư mă sư oei lui kơ 'Bok Kei-Dei kơjăp, bơngai noh hiôk rai loi; 'Bok Kei-Dei gô ăn kơ sư arih hiôk-hian ling-lang tơpă. Tơdrong 'noh Sư pơkă kơ rim 'nu bơngai, bơngai bu mă 'mêm kơ Sư.

¹³Tơ̆ng bơ̆n đei tơdrong pơhlŭ, pơm kơ bơ̆n yoch boih, bơ̆n 'nĕ khan 'Bok Kei-Dei pơhlŭ. Yua kơ ưh kơ đei bu gơh pơhlŭ 'Bok Kei-Dei pơm yoch păng 'Bok Kei-Dei ưh kơ đei layơ wă pơhlŭ kon bơngai pơm yoch.

¹⁴Tơdrong 'noh lăm jơhngơ̆m bơ̆n hưch hanh 'maih pơm tơdrong âu tơdrong to, na pơhlŭ bơ̆n

¹⁵jing pơm yoch. Tơdrong yoch bơ̆n rai tih rai lơ boih, na bơ̆n gô truh kơ tơdrong lôch.

¹⁶Ơ lu 'nhŏng oh mă inh 'mêm kơeng, dang ei iĕm băt boih tơdrong 'noh, na iĕm 'nĕ pă tơchĕng khan 'Bok Kei-Dei pơhlŭ bơ̆n pơm yoch.

¹⁷Yua kơ tơdrong hiôk tơdrong 'lơ̆ng ưh kơ lĕch đơ̆ng nai ôh, tă lĕch đơ̆ng 'Bok Kei-Dei ngăl. Sư boih pơjing ăn kơ bơ̆n tôm tơdrong hơdah, thoi kơ măt 'năr, măt khei, lu sơnglŏng. Sư pơchrang hơdah kơ bơ̆n ling-lang ưh kơ tơplih kiơ phara ôh.

¹⁸'Bok Kei-Dei ăn kơ bơ̆n jing bơngai 'nao Sư wă kơdih đĕch, na Sư ăn kơ bơ̆n kơtơ̆ng tơdrong Sư, lu bơ̆n jing thoi 'ba hrôih kơ lu bơngai nai yua kơ bơ̆n lui hơdrol.

¹⁹Ơ lu 'nhŏng oh mă inh 'mêm kơeng, bơ̆n băt kơ thoi noh boih, na đĭ-đăng kơ bơ̆n athei adrin mơ̆ng tơdrong đe bơtho, mơ̆ng mă tơpă, 'nĕ hăt kơ pơma hil kơ đe bơtho.

²⁰Bơngai bu hil kơ đe, bơngai noh ưh kơ băt pơm 'lơ̆ng tơpăt thoi 'Bok Kei-Dei wă ôh.

²¹Thoi noh na bơ̆n athei lê̆ đĭ dôm tơdrong kơnê̆ 'mê̆-'mach păng chu yom kơ 'Bok Kei-Dei. Bơ̆n athei lui kơ nơ̆r Sư na bơ̆n gơh klaih đơ̆ng tơdrong yoch.

²²Păng bơ̆n 'nĕ kơ mơ̆ng lăm đon đĕch, khan 'Bok Kei-Dei kư̆m iŏk. Ưh ôh, bơ̆n mơ̆ng păng pơm kiơ̆ hloi dôm tơdrong đe bơtho, noh na 'Bok Kei-Dei iŏk.

²³Bơngai bu mơ̆ng đe bơtho tơdrong 'Bok Kei-Dei, mă mơ̆ng đĕch ưh kơ pơm kiơ̆, bơngai noh dang bơ̆n lăng muh măt bơ̆n tơ lăm amĭl.

²⁴Kơplah bơ̆n lăng muh măt bơ̆n tơ lăm amĭl, bơ̆n 'bôh nhên đĭ; mưh bơ̆n năm tơ nai, bơ̆n hiơt boih kơ muh măt bơ̆n thoi yơ.

²⁵Na gah tơdrong mơ̆ng đe bơtho tơdrong 'Bok Kei-Dei pơkă, bơngai bu mơ̆ng hăm pơm kiơ̆, ưh kơ hiơt dôm tơdrong đe bơtho, bơngai noh hiôk tơpă boih, yua kơ tơdrong 'Bok Kei-Dei 'lơ̆ng tơpă ăn kơ kon bơngai bơ̆n klaih rơngei đơ̆ng tơdrong yoch.

²⁶Bơngai bu khan sư lui kơjăp, mă ưh kơ gơh gơ̆t 'bơ̆r, nŏng kơ chă hil kơ đe, pơang kơ đe lơ tơdrong mă sư pơngêh đon khan sư lui kơjăp, 'Bok Kei-Dei ưh kơ pơklaih sư ôh.

²⁷Bơngai lui bu băt kơ năm ngôi tơ lu kon mơti, lu bơngai adro apo pơmat-tat kơ'bah kơ'bôch păng sư ưh kơ kiơ̆ thoi lu bơngai tơ ala teh ưh kơ lui, bơngai noh boih 'Bă tơm bơ̆n 'Bok Kei-Dei jô̆ sư lui kơjăp hăm pơm tơpăt.