Read bahnar Ya 2 Bible Online

Ya 2 - bahnar bible

Ya 2

¹Ơ lu 'nhŏng oh inh, iĕm lui boih kơ Kră Yang Yêsu Krist, Kră Yang mơsêh mơyang lu bơ̆n, iĕm 'nĕ kơ lăng bơngai phara yua kơ sư mơdrŏng dah dơnuh hŏ.

²Pơtih gia đei minh 'nu bơngai mơdrŏng 'bot tơkhiĕn maih, hrŭk hơbĕn ao 'lơ̆ng rŏ mơ̆t tơ hnam akŭm iĕm. Đei minh 'nu bơngai dơnuh iĕm 'bôh sư hrŭk hơbĕn ao hiah, sư kư̆m mơ̆t akŭm.

³Na iĕm lăp đon kơ bơngai mơdrŏng mă hrŭk hơbĕn ao 'lơ̆ng rŏ na iĕm khan kơ sư khan: “Apinh ih ngôi tơ anih 'lơ̆ng âu bĕ.” Mă gah bơngai dơnuh iĕm khan: “Dơ̆ng 'bơ̆t e noh, dah tơoei 'bơ̆t hơdrơh noh.”

⁴Dah iĕm pơma kơ đe thoi noh, iĕm yoch tơpă boih, iĕm ưh kơ 'mêm kơ 'nhŏng oh lei-lăi. Iĕm pơm thoi noh iĕm wă kơ yua akâu kơdih đĕch.

⁵Ơ lu 'nhŏng oh mă inh 'mêm, mơ̆ng bĕ: 'Bok Kei-Dei rơih lu bơngai dơnuh hin mă oei tơ ala teh âu, wă kơ lu sư mơdrŏng kơ tơdrong lui gơh oei tơ dêh char Sư, kư̆m thoi Sư wă ăn kơ dôm lu bơngai mă 'mêm kơ Sư.

⁶Mă-lei iĕm pơjăm pơjuă lu bơngai dơnuh hin, ưh kơ băt mơnat kơ lu sư. Bu pơjăm pơjuă wă kơtĭt sa iĕm păng dui anhăk iĕm tơ lu kră sek tơlang? Lu bơngai mơdrŏng boih pơm kơ iĕm kơnê̆ thoi noh.

⁷Lu sư kư̆m pơma kơnê̆ kơ Yêsu Krist Kră Yang bơ̆n mă 'lơ̆ng tơpăt.

⁸Dah iĕm rok kiơ̆ tơdrong juăt 'Bok Kei-Dei mă đe chih tơ lăm sơ̆p hla bơar Sư, Sư athei bơ̆n 'mêm kơ bôl buăl thoi bơ̆n 'mêm kơ akâu kơdih, tơ̆ng iĕm pơm thoi noh tơpă lei 'lơ̆ng boih.

⁹Mă inh hli kơ iĕm ưh kơ pơm thoi noh tơpă ôh. Tơ̆ng iĕm lăng bơngai phara, mơ'nah iĕm 'mêm mơ'nah iĕm ưh, iĕm pơm thoi noh yoch tơpă; păng 'Bok Kei-Dei jô̆ iĕm bơngai pơhloh kơ tơdrong juăt Sư.

¹⁰Yua kơ Sư athei bơ̆n kiơ̆ tôm kơ tơdrong juăt Sư pơkă, mă-lei tơ̆ng bu tŭk minh nơ̆r đĕch Sư kư̆m jô̆ yoch boih, lei-lăi thoi lu bơngai mă tŭk đĭ dôm nơ̆r Sư pơkă.

¹¹Yua kơ 'Bok Kei-Dei khan boih: “Iĕm 'nĕ kơ plah klo kăn đe.” Sư khan dơ̆ng: “Iĕm 'nĕ kơ pơlôch bơngai.” Mă bơ̆n ưh kơ plah klo kăn đe, tơ̆ng bơ̆n pơlôch bơngai, Sư kư̆m jô̆ kơ bơ̆n pơm yoch kơ tơdrong juăt Sư boih.

¹²Tôm tơdrong juăt 'Bok Kei-Dei pơkă wă kơ bơ̆n kiơ̆, Sư wă kơ bơ̆n klaih đơ̆ng tơdrong yoch jing rơngei. Yua kơ thoi noh na bơ̆n athei pơma rĕng đon păng pơm kiơ̆ tôm tơdrong Sư pơkă noh ling-lang, yua kơ ning-mônh Sư wă sek tơlang lu bơ̆n kiơ̆ kơ tơdrong Sư pơkă noh tơpă.

¹³Truh năr 'Bok Kei-Dei sek tơlang ning-mônh, Sư sek tơlang tơpăt, Sư ưh kơ mơnat ôh kơ lu bơngai mă ưh kơ băt mơnat kơ đe. Bơngai bu mơnat kơ đe, 'Bok Kei-Dei kư̆m mơnat kơ sư mơ̆n, kơplah năr Sư sek tơlang ning-mônh.

¹⁴Ơ lu 'nhŏng oh inh, bơngai bu khan sư lui boih, mă-lei sư ưh kơ pơm kiơ̆ tơdrong 'lơ̆ng tơdrong trŏ, lui thoi sư noh ưh kơ yua kiơ ôh, sư ưh kơ klaih đơ̆ng tơdrong yoch 'Bok Kei-Dei wă phak ning-mônh ôh.

¹⁵Pơtih gia iĕm 'bôh 'nhŏng oh bơngai lui bơ̆n hrŭk hơbĕn ao hiah, tơmam sa ưh kơ đei.

¹⁶Mă-lei iĕm khan kơ sư: “Brŏk mă 'lơ̆ng, sŏng sa mă phĭ, hrŭk hơbĕn ao mă 'lơ̆ng bĕ wă kơ tơnŏ.” Iĕm khan kơ sư thoi noh mă-lei iĕm ưh kơ tơgŭm sư minh tơdrong kiơ, tơmam sa dah hơbĕn ao hrŭk, wă kơ sư hiôk; iĕm khan kơ sư 'bơ̆r hoh đĕch, noh ưh kơ 'lơ̆ng ôh, sư ưh kơ đei yua kiơ đơ̆ng iĕm.

¹⁷Kư̆m thoi noh mơ̆n, bơngai bu khan sư lui boih, mă-lei sư ưh kơ pơm 'lơ̆ng pơm trŏ, sư lui thoi noh ưh kơ yua kiơ kơ sư.

¹⁸Pơtih gia đei 'bar 'nu bơngai pơma dih băl khan: “Ih khan ih klaih yua kơ ih lui. Inh klaih yua kơ inh kư̆m pơm 'lơ̆ng kơ tơdrong juăt 'Bok Kei-Dei.” 'Bar tơdrong noh, tơdrong ayơ wă kơ đe băt kơ bơ̆n lui tơpă? Bơ̆n athei pơm 'lơ̆ng tôm tơdrong na đe băt kơ bơ̆n lui tơpă.

¹⁹Lu iĕm mơ'nah khan lui đĕch kư̆m klaih mơ̆n hă? Iĕm kư̆ kơ lui đei minh pôm Kră Yang 'Bok Kei-Dei đĕch, trŏ boih, lu yang kơnê̆ kư̆m lui thoi noh mơ̆n, lu sư hli tơrơ kơ 'Bok Kei-Dei tơpă.

²⁰Ơ lu bơngai kơhlôh, iĕm ưh tam băt 'mơ̆i hă, tơdrong bơngai mă khan sư lui boih mă sư ưh kơ pơm kiơ̆, na iĕm wă kơ inh tơ'bôh kơ iĕm tơdrong bơngai mă lui ưh kơ yua noh hă?

²¹Sơ̆ 'bok kơdră bơ̆n Abraham chu 'Bok Kei-Dei athei sư 'măn kon sư Isăk kơpal chơnang soi, wă soi kơ 'Bok Kei-Dei tơpă. Mă 'Bok Kei-Dei khă dơ̆ng na ưh kơ yĕng. Na 'Bok Kei-Dei 'bôh tơpă tơdrong lui sư pơm kiơ̆. Iĕm băt thoi noh boih, noh 'Bok Kei-Dei jô̆ sư bơngai 'lơ̆ng yua kơ sư lui đĕch, dah yua kơ sư pơm kiơ̆ kơ nơ̆r 'Bok Kei-Dei akhan?

²²Tơdrong 'noh bơ̆n băt boih, ưh kơ sĭ yua kơ sư lui đĕch ôh, yua kơ sư pơm kiơ̆ kơ nơ̆r 'Bok Kei-Dei akhan. Yua kơ sư pơm kiơ̆ na bơ̆n băt kơ sư bơngai lui kơjăp tơpă.

²³Na tơdrong noh trŏ thoi lăm sơ̆p hla bơar 'Bok Kei-Dei đei khan thoi âu: “Abraham đei đon lui păng gơnang kơ 'Bok Kei-Dei na 'Bok Kei-Dei jô̆ sư bơngai 'lơ̆ng tơpăt. Păng 'Bok Kei-Dei krao Abraham bôl juăt Sư.”

²⁴Thoi noh iĕm kư̆m băt mơ̆n 'Bok Kei-Dei jô̆ bơ̆n bơngai 'lơ̆ng tơpăt yua kơ bơ̆n lui păng pơm kiơ̆ hloi dôm tơdrong Sư pơkă, ưh kơ sĭ khan yua kơ bơ̆n lui đĕch ôh.

²⁵Na tơdrong yă Rahap sơ̆ kư̆m lei-lăi, sư bơngai đi mă-lei đơ̆ng rŏng 'Bok Kei-Dei kư̆m jô̆ sư bơngai 'lơ̆ng, yua kơ sư kiơ̆ tơdrong lui, sư sơng iŏk lu bơngai Isơrael đơ̆ng Jôsuê wơh năm dăr kơleng teh đak sư păng bơtho tơ'bôh kơ lu sư brŏk trong nai wă kơ lu buăl sư huay kơ rôp lu bơngai noh.

²⁶Na tơdrong lui bơ̆n, tơ̆ng bơ̆n ưh kơ pơm kiơ̆ kơ nơ̆r 'Bok Kei-Dei pơkă, ưh kơ yua kiơ ôh; bơ̆n kư̆m thoi akâu kon bơngai bơ̆n, ưh pă đei bơhngol, jing kơtĕch jơhngơ̆m lôch.