Read bahnar Ya 3 Bible Online

Ya 3 - bahnar bible

Ya 3

¹Ơ lu 'nhŏng oh, iĕm 'nĕ ăn lu buăl bơ̆n pơm 'bok bơtho tơdrong 'Bok Kei-Dei lơ dêh hŏ. Iĕm băt boih lu nhôn 'bok bơtho iĕm, dah lu nhôn ưh kơ bơtho khan kơ iĕm pơm mă 'blep trŏ, ning-mônh 'Bok Kei-Dei sek tơlang lu nhôn hloh loi kơ lu bơngai nai.

²Đĭ-đăng kơ kon bơngai bơ̆n tă kơ bơngai yoch ngăl. Pơtih gia, dah bơngai bu ưh kơ đei yoch lăm tơdrong sư pơma, bơngai noh bơ̆n băt kơ sư bơngai 'lơ̆ng 'biơ̆ mơ̆n păng lăm akâu sư gơh găt hăm bôl buăl tơpă.

³Bĭ đe tah tơlei tơ lăm 'bơ̆r aseh, đe kư̆m wă kơ sư chu, gô mơ̆ng kơ tơ'ngla sư wă weh, tơ 'ma bưh tơ 'ngiĕo bưh.

⁴Duk đe wơ̆r tơ đak dơsĭ kư̆m lei-lăi. Akâu sư tih tơpă phŏ đei kial hơbŭt, bơ̆n lăng rŏ kơ kiơ̆ hloi kial, mă-lei ưh ôh, sư kư̆m kiơ̆ kơ tơ'ngla wơ̆r sư mơ̆n, mă khan 'long wơ̆r sư iĕ.

⁵Na 'bơ̆r kon bơngai bơ̆n pơma kư̆m lei-lăi. 'Bơ̆r bơ̆n iĕ đĕch, mă pơma kơ bôl buăl Jop, gơh pơjing tơdrong tih. Thoi lĕ kơ ŭnh, ŭnh sư iĕ đĕch, sư gơh sa jơ̆p kơ groi kông bri brah.

⁶'Bơ̆r kon bơngai bơ̆n kư̆m thoi ŭnh, pơma kơ đe mrĕp, gơh pơma tôm tơdrong kơnê̆; pơm kơ akâu bơ̆n kơdih kư̆m jing răm kơnê̆ 'mê̆-'mach; pơrăm akâu akar, pơrăm tơdrong arih jing hiong hiach. Ŭnh 'noh apoh iŏk đơ̆ng ŭnh khŭl sơmăt.

⁷Tôm kơ khŭl kon sem brem, mă sem păr, mă 'bih, mă ka oei lăm đak dơsĭ, kon bơngai kư̆m gơh pơjuăt pơđep. Kon bơngai bơ̆n đei pơjuăt pơđep lu sư thoi noh tơpă.

⁸Mă-lei 'bơ̆r kon bơngai bơ̆n ưh kơ đei bu gơh pơgơ̆r, yua kơ kơnê̆ dêh, pă đei layơ wă gơh oei sa tơnăp kăp iâu, dang lĕ kơ đe sa 'bơm tơmam bơnhŭl đĕch boih.

⁹'Bă tơm bơ̆n 'Bok Kei-Dei pơjing kon bơngai bơ̆n hơbŏ thoi Sư. Bơ̆n băt kơ ư-ang Sư, mă kư̆m băt kơ blei hiap bôl buăl tơduă kon bơngai. 'Noh kư̆m dang bơ̆n blei hiap 'Bok Kei-Dei yua kơ bơ̆n đơ̆ng 'Bok Kei-Dei pơjing.

¹⁰Lăp pôm 'bơ̆r đĕch băt kơ ư-ang 'Bok Kei-Dei, băt kơ blei hiap bôl buăl. Ơ lu 'nhŏng oh, bơ̆n pơma thoi noh ưh kơ trŏ boih.

¹¹Na iĕm mơ̆ng lăng tơdrong pơtih gia âu: Minh pôm tu đak hăm gơh jing phara, mơ'nah sơngiĕo 'lơ̆ng mơ'nah 'băt 'boh? Ưh ôh.

¹²Ơ 'nhŏng oh, bĭ 'long hơra hăm gơh pơjing plei hơmu, 'long hơmu hăm gơh pơjing plei hơra? Ưh ôh. Na tu đak kư̆m lei-lăi, đak 'băt 'boh ưh kơ gơh pơjing đak sơngiĕo 'lơ̆ng ôh. Na thoi yơ bơngai kơnê̆ gơh pơma tơdrong 'lơ̆ng?

¹³Lăm lu iĕm hăm đei bơngai bu đei đon hơgei, đon hlôh wao băt tôm tơdrong? Sư athei pơm mă 'lơ̆ng na đe băt kơ sư bơngai đon hlôh, băt kơ sư bơngai dim gơh găt hăm đe tơpă.

¹⁴Lu iĕm 'bok bơtho, dah iĕm oei 'nhĕng đe, iĕm jang tơgar băl 'maih pơm yŏng păng iĕm pơang kơ đe khan iĕm hơgei tơdrong 'Bok Kei-Dei hloh kơ lu bơngai nai, noh iĕm hơlĕnh đĕch boih, ưh kơ trŏ iĕm hơgei tơpă ôh.

¹⁵Bơngai bu khan sư hơgei tơdrong 'Bok Kei-Dei mă sư oei pơm thoi noh, tơdrong sư hơgei noh ưh kơ sĭ đơ̆ng 'Bok Kei-Dei ăn ôh; sư hơgei đơ̆ng khŭl yang kơnê̆, sư hơgei kiơ̆ tơdrong ala teh, kiơ̆ kơ sĕch akar.

¹⁶Anih ayơ đe 'nhĕng băl păng tơgar băl, anih noh đe pơjah pơjăng băl dêh păng pơm tôm tơdrong kơnê̆.

¹⁷Na gah tơdrong hơgei, bơngai bu hơgei đơ̆ng 'Bok Kei-Dei ăn, bơngai noh bơ̆n 'bôh sư pơm tôm tơdrong 'lơ̆ng, sư bơngai dim gơh găt hăm đe, băt chu yom kơ lu bơngai tih kơ sư, băt mơnat kơ đe, băt asong băl tơmam; sư bơngai tơpăt tơpă, ưh kơ sĭ sư chă pơm đĕch ôh.

¹⁸Lu bơngai ngôi đĕch adrĕch ngôi hiôk sư wă pơhiôk đe ling-lang, ưh kơ layơ areh kơ bôl buăl, sư pơm tôm tơdrong 'lơ̆ng bôl buăl 'beh kơ sư, thoi noh na đĭ-đăng kơ bôl buăl hơdai wang băt kơ pơm 'lơ̆ng dih băl.