Read bahnar I Yo 2 Bible Online

I Yo 2 - bahnar bible

I Yo 2

¹Ơ lu kon hơ'lơ̆p, dang ei inh đei chih ăn kơ iĕm kơthơ âu wă kơ iĕm huay pă pơm yoch. Mă-lei bơngai bu yoch, sư đei minh 'nu Bơngai pơma kơ 'Bă bơ̆n 'Bok Kei-Dei wă dŏng bơ̆n. Bơngai 'noh anăn Sư Yêsu Krist mă 'lơ̆ng tơpăt.

²Sư lôch tang bơ̆n wă pơklaih bơ̆n đơ̆ng tơdrong yoch. Mă-lei ưh kơ sĭ Sư wă pơklaih kơdrô̆ yoch bơ̆n đĕch ôh, Sư pơklaih đĭ-đăng bơngai ala teh âu mơ̆n.

³Dah bơ̆n răk dôm tơdrong Sư pơkă lei noh bơ̆n lui kơ Sư tơpă.

⁴Dah bơngai bu khan: “Inh lui kơ Sư,” sơmă bơngai 'noh ưh kơ răk tơdrong Sư pơkă, bơngai 'noh hơlĕnh đĕch. Sư ưh kơ pơma tơpăt tŏ sĕt ôh.

⁵Sơmă dah bơngai bu răk dôm nơ̆r Sư pơkă, bơngai 'noh băt 'mêm kơ 'Bok Kei-Dei. Wă kơ bơ̆n băt tơdrong bơ̆n lui kơ Yêsu Krist, bơ̆n athei kiơ̆ thoi Sư oei tơ ala teh âu sơ̆.

⁷Ơ 'nhŏng oh mă juăt păng inh, tơdrong inh chih pơkă kơ iĕm âu ưh kơ sĭ tơdrong 'nao ôh. Tơdrong âu tơdrong so mơ̆n mă đêl pơkă kơ iĕm sơ̆. Tơdrong pơkă so âu tơdrong đe bơtho iĕm boih păng iĕm kơtơ̆ng boih.

⁸Mă tơdrong inh chih pơkă kơ iĕm âu 'nao mơ̆n. Yêsu Krist răk tơdrong pơkă âu păng iĕm kư̆m răk tơdrong pơkă âu mơ̆n. Yua kơ iĕm tơm hmơm đơ̆ng măng mu mă-lei dang ei 'brưch rai wă jê̆ hơdah măt 'năr boih păng hơdah jơ̆p hloi.

⁹Tơdrong pơkă 'noh thoi âu: Bơngai bu khan sư oei lăm tơdrong hơdah, sơmă oei hil areh kơ 'nhŏng oh sư ling-lang, bơngai 'noh oei lăm măng mu khơ̆ dang ei đĕch.

¹⁰Bơngai bu 'mêm kơ 'nhŏng oh sư, bơngai 'noh sư oei lăm tơdrong hơdah tơpă boih. Thoi noh bơ̆n băt kơ sư pơm 'lơ̆ng tơpă.

¹¹Na dah bơngai bu hil areh kơ 'nhŏng oh sư, bơngai 'noh sư oei lăm măng mu khŏm khŏm. Sư yak nơnăm lăm măng mu. Sư ưh kơ băt trong sư wă năm tơ yơ kơlih kơ măng mu klơ̆p măt sư.

¹²Ơ lu kon hơ'lơ̆p, inh chih ăn kơ iĕm kơthơ âu kơlih kơ iĕm klaih đơ̆ng tơdrong yoch yua kơ Yêsu lôch tang bơ̆n.

¹³Ơ lu mih ma duch nă, inh chih kơ iĕm kơthơ âu kơlih kơ iĕm băt kơ Yêsu Krist mă oei arih đơ̆ng blŭng-a sơ̆. Ơ lu adruh tơdăm, inh chih kơ iĕm kơthơ âu kơlih kơ yang Satan thuơ kơ iĕm boih.

¹⁴Ơ lu kon hơ'lơ̆p, inh chih kơ iĕm kơlih kơ iĕm băt kơ 'Bă bơ̆n 'Bok Kei-Dei. Ơ lu mih ma duch nă, inh chih kơ iĕm kơlih kơ iĕm băt kơ Yêsu Krist mă oei arih đơ̆ng blŭng-a sơ̆. Ơ lu adruh tơdăm, inh chih kơ iĕm kơlih kơ iĕm pran kơtang. Iĕm kiơ̆ tơpă dôm nơ̆r 'Bok Kei-Dei, na yang Satan thuơ kơ iĕm boih.

¹⁵Iĕm 'nĕ kơ 'mêm dôm tơdrong ala teh âu. Bơngai bu 'mêm kơ tơdrong ala teh âu, bơngai 'noh sư ưh kơ 'mêm kơ 'Bă bơ̆n 'Bok Kei-Dei ôh.

¹⁶Dôm tơdrong chih roi tơ ala âu lĕch đơ̆ng ala teh: Tơdrong kư̆ kă jơhngơ̆m kon bơngai 'maih pơm, tơdrong kư̆ kă mơ̆n măt kon bơngai 'maih lăng, lơ tơdrong tơpă, mơ'nah đei tơmam yua wă pơang akâu sư kơdih. Dôm tơdrong noh ưh kơ lĕch đơ̆ng 'Bă bơ̆n 'Bok Kei-Dei ôh, lĕch đơ̆ng lu bơngai ala teh âu đĕch.

¹⁷Ala teh âu dôm tơdrong kon bơngai 'maih iŏk gô răm, mă-lei dah bơngai bu pơm trŏ thoi 'Bok Kei-Dei wă, bơngai 'noh gô arih ling-lang.

¹⁸Ơ lu kon hơ'lơ̆p, năr tôch wă jê̆ truh boih. Iĕm kơtơ̆ng đơ̆ng sơ̆ boih gah tơdrong bơngai ayăt kơ Yêsu Krist gô truh. Na dang ei đei lơ bơngai ayăt kơ Yêsu Krist truh boih, thoi noh bơih bơ̆n băt kơ năr tôch wă jê̆ truh.

¹⁹Lu bơngai ayăt kơ Yêsu Krist dang ei, tơm hmơm sơ̆ sư khan sư wă bôl lu bơngai lui tơpă, mă dang ei sư achăng tŭk lu bơ̆n bơngai lui. Dah sư bôl bơ̆n bơngai lui tơpă lei sư bôl bơ̆n ling-lang ưh kơ đei layơ tŭk. Na dang ei sư achăng tŭk bơ̆n tơpă boih, noh bơ̆n băt lơ̆m lu sư ưh kơ đei bu buăl bơ̆n.

²⁰Gah iĕm, Yêsu Krist mă 'lơ̆ng tơpăt, Sư ăn kơ iĕm Yang Bơhngol 'Lơ̆ng na đĭ dôm iĕm băt nhên tơpă gah tơdrong 'Bok Kei-Dei.

²¹Inh chih ăn kơ iĕm kơthơ âu ưh kơ sĭ khan iĕm ưh kơ băt tơdrong 'Bok Kei-Dei ôh. Inh chih ăn kơ iĕm kơthơ âu yua kơ iĕm băt tơdrong 'Bok Kei-Dei tơpă păng iĕm kư̆m băt tơdrong 'Bok Kei-Dei ưh kơ hơlĕnh ôh.

²²Lei bu hơlĕnh lĕ? Bơngai bu khan Yêsu ưh kơ sĭ 'Bok Krist, bơngai 'noh boih hơlĕnh păng bơngai 'noh boih ayăt kơ Yêsu Krist, bơngai 'noh boih achăng tŭk 'Bă Sư 'Bok Kei-Dei păng Kon Sư mơ̆n.

²³Bơngai bu achăng tŭk Kon Sư, bơngai 'noh kư̆m achăng tŭk 'Bă Sư mơ̆n. Bơngai bu lui kơ Yêsu Kon 'Bok Kei-Dei, bơngai 'noh kư̆m juăt păng 'Bok Kei-Dei mơ̆n.

²⁴Thoi noh na iĕm athei răk tơdrong 'Bok Kei-Dei lăm đon iĕm đơ̆ng iĕm kơtơ̆ng tơm hmơm sơ̆. Dah iĕm răk tơdrong 'Bok Kei-Dei lăm đon iĕm ling-lang lei 'noh iĕm pôm đon păng Kon Sư păng 'Bă Sư 'Bok Kei-Dei mơ̆n.

²⁵Thoi noh bơ̆n gô arih ling-lang, kư̆m thoi Yêsu Krist pơkă sơ̆.

²⁶Inh chih ăn kơ iĕm tơdrong âu wă bơtho ăn kơ lu iĕm gah lu bơngai mă juăt chă bơtho hơlĕnh kơ iĕm.

²⁷Gah iĕm Yêsu Krist ăn kơ iĕm Yang Bơhngol 'Lơ̆ng boih. Na lăp Yang Bơhngol 'Lơ̆ng oei lơ̆m jơhngơ̆m iĕm, iĕm ưh pă wă kơ lu đe noh bơtho iĕm dơ̆ng ôh, kơlih kơ Yang Bơhngol 'Lơ̆ng bơtho iĕm tôm tơdrong. Dôm tơdrong Sư bơtho tơpăt ngăl, ưh kơ sĭ Sư bơtho tơdrong hơlĕnh ôh. Thoi noh na iĕm athei răk dôm tơdrong Sư pơkă hŏ wă kơ iĕm lui kơjăp kơ Yêsu Krist.

²⁸Iĕm adrin lui kơ Sư khŏm khŏm hŏ, na Sư jur tơ ala teh âu ning-mônh iĕm huay kơ hli. Năr noh kơnh iĕm ưh kơ kăl kơ jăk ôn akâu iĕm tơ yơ yơ ôh yua kơ iĕm huay kơ mơlâu kơ Sư.

²⁹Iĕm băt kơ Yêsu Krist pơm 'lơ̆ng tơpăt. Thoi noh iĕm kư̆m băt bơngai bu pơm 'lơ̆ng tơpăt, bơngai 'noh boih kon 'Bok Kei-Dei.