Read bahnar Lu 12 Bible Online

Lu 12 - bahnar bible

Lu 12

¹Lu bơngai Êphraim akŭm đĭ-đăng năm tŏk đak Krong truh tơ pơlei Saphôn năm khan kơ Jeptha: Yua kơ kiơ ih năm tơblah hăm kon pơlei Ammôn mă ưh kơ krao lu nhôn wang năm hơdai? Lu nhôn gô soh hnam ih păng akâu ih hloi.

²Jeptha tơl lu sư: Inh hăm kon pơlei inh đei pơjah băl tih dêh hăm lu kon pơlei Ammôn; mă inh krao lu iĕm dŏng tơgŭm, lu iĕm kư̆m ưh kơ dŏng pơklaih nhôn đơ̆ng ti lu sư.

³'Bôh iĕm ưh kơ đei dŏng pơklaih inh ôh, na inh ăn akâu inh lôch năm blah kon pơlei Ammôn, na Kră Yang pơjao lu sư lăm tơpang ti inh. Thoi noh, liơ mă năr 'nâu lu iĕm năm truh tơ âu wă blah inh?

⁴Jeptha krao akŭm đĭ-đăng kon pơlei Gileat năm blah lu bơngai Êphraim jei kon pơlei Gileat. Bơngai drŏ-nglo char Gileat blah kon pơlei Êphraim yua kơ lu sư khan: Ơ kon pơlei Gileat, lu iĕm bơngai kơchu kư̆ kă weh đơ̆ng char Êphraim păng đŏng lu kon pơlei Manase đĕch.

⁵Lu bơngai Gileat blah iŏk dôm tŏ anih tơnŏk đơ̆ng tŏk kơ đak Krong Jôrđăn wă brŏk tơ Êphraim, tơdah đei lu bơngai Êphraim apinh khan: Apinh ăn kơ inh tŏk tơ pah to, đei lu bơngai Gileat apinh sư: “Ih hăm trŏ bơngai đơ̆ng Êphraim ưh?” Dah bơngai noh tơl: “Ưh ôh.”

⁶Lu bơngai Gileat khan kơ sư: “Pơma bĕ nơ̆r Sibôlêt;” Sư pơma nơ̆r: “Sibôlêt,” sư pơma ưh kơ hơđăl: Na lu sư rôp pơlôch hloi sư tơ anih tơnŏk tŏk kơ đak Krong Jôrđăn. Lăm chăl 'noh đei puăn-jĭt 'bar-rơbâu 'nu lu bơngai Êphraim đe pơlôch.

⁷Jeptha pơm 'bok kră sek tơlang kơ lu bơngai Isơrael tơdrâu sơnăm; na sư lôch, đe 'bŭ sư lăm pơlei tơ dêh Gileat.

⁸Đơ̆ng rŏng kơ Jeptha đei Ipsan đơ̆ng pơlei Betlehem pơm 'bok sek tơlang bơngai Isơrael.

⁹Sư đei pêng-jĭt 'nu kon drŏ-nglo păng pêng-jĭt 'nu kon drŏ-kăn; sư chă ăn kơ lu kon drŏ-kăn sư klo oei 'nguaih kơ adrĕch adrung sư păng kư̆m chă ăn kơ pêng-jĭt 'nu kon drŏ-nglo akăn đơ̆ng adrĕch nai. Sư pơm 'bok sek tơlang lăm Isơrael tơpơh sơnăm.

¹⁰Đang đơ̆ng noh Ipsan lôch đe 'bŭ sư tơ pơlei Betlehem.

¹¹Đơ̆ng rŏng kơ Ipsan đei Êlon, bơngai đơ̆ng Sebulun tơplih sư pơm 'bok sek tơlang lăm Isơrael lăm mơjĭt sơnăm.

¹²Đang kơ noh Êlon, bơngai Sebulun lôch; đe 'bŭ sư tơ pơlei Aijalôn lăm char Sebulun.

¹³Đơ̆ng rŏng kơ Êlon đei Apđôn kon drŏ-nglo Hilel bơngai đơ̆ng pơlei Pirathon tơplih sư pơm 'bok sek tơlang lăm Isơrael.

¹⁴Sư đei puăn-jĭt 'nu kon drŏ-nglo păng pêng-jĭt 'nu sâu drŏ-nglo mơ̆n; lu sư hao tơpơh-jĭt tŏ aseh iĕ. Sư pơm 'bok sek tơlang lăm Isơrael tơhngam sơnăm.

¹⁵Đang đơ̆ng rŏng kơ Apđôn, kon drŏ-nglo Hilel lôch; đe 'bŭ sư tơ pơlei Pirathon lăm dêh Êphraim, lăm char gah groi kông bơngai Amalek.