Read bahnar Lu 16 Bible Online

Lu 16 - bahnar bible

Lu 16

¹Samsơn năm tơ pơlei Gasa, 'bôh minh 'nu adruh đi tơ noh. Sư mơ̆t tep hloi lăm hnam adruh ei.

²Lu kon pơlei Gasa: Chă tơroi dih băl Samsơn truh tơ âu boih. Lu sư wang tăp dăr kơ anih noh, lu sư răp prăt măng 'bơ̆t 'măng jang; lu sư oei hreh prăt măng, lu sư khan: Bĕ bơ̆n răp truh tơ hơdah na bơ̆n gô rôp pơlôch sư.

³Mă-lei Samsơn tep tơ noh truh tŏk-bŏk măng, sư iung, sư buch tôi ba tơ hơngiĕng sư hloi 'bar pah 'măng dur păng 'bar tŏ jrăng, chĕp ba tơ kơ̆l kông tơklă Hêbrôn.

⁴Đơ̆ng rŏng kơ 'noh sư hưch kơ minh 'nu adruh lăm thŭng Sôrek, anăn sư Đelila.

⁵Lu yŏng pơgơ̆r bơngai Philistin năm tơ hnam adruh 'noh khan: Ih athei lung sư, wă kơ băt sư đei jơhngơ̆m pran tih dêh 'noh đơ̆ng yơ păng lu bơ̆n athei pơm thoi yơ wă kơ kĕ rôp chô̆ sư gơh chu kơ nhôn, na rim 'nu kơ lu nhôn gô apah ih mơjĭt-pêng kĭ jên hu.

⁶Thoi noh Đelila khan kơ Samsơn: Apinh ih athei roi ăn kơ inh đơ̆ng yơ ih đei jơhngơ̆m pran tih dêh thoi noh, liơ gơh chô̆ ih, wă kơ kĕ pơm kơ ih chu.

⁷Samsơn tơl sư: “Tơdah đe chô̆ inh hăm tơpơh dăng tơlei dơhiĕng oei hơdrih, lei inh rơdu lei-lăi nhen thoi lu bơngai nai.”

⁸Thoi noh lu yŏng pơgơ̆r Philistin chĕp ba ăn kơ Đelila tơpơh dăng tơlei wă pơm dơhiĕng hră oei hơdrih, na drŏ-kăn ei chô̆ Samsơn.

⁹Na đei lu bơngai drŏ-nglo oei răp lăm hnam, drŏ-kăn ei krao: Ơ Samsơn, lu bơngai Philistin wă năm rôp ih. Mă-lei wă Samsơn tơdrŏ pơpơ̆ lu tơlei 'noh kơtĕch đĭ nhen thoi brai 'bơm ŭnh; thoi noh tơdrong pran sư 'noh ưh kơ đei bu băt đơ̆ng yơ.

¹⁰Đelila khan kơ Samsơn: Ih roi hơlĕnh kơ inh boih, dang ei apinh ih roi ăn kơ inh mă tơpăt dang ei pơm liơ wă kơ gơh chô̆ ih?

¹¹Samsơn khan: Tơdah đe chô̆ gơhret inh hăm tơlei giĕn 'nao kŭi ưh tam đei bu yua, lei inh gô jing rơdu, nhen thoi lu bơngai nai đĕch.

¹²Thoi noh Đelila iŏk tơlei giĕn 'nao kŭi tam đei bu yua chô̆ Samsơn sư krao: Ơ Samsơn, lu bơngai Philistin wă blah rôp ih! Kơplah 'noh đei lu bơngai răp lăm anih noh, mă-lei sư tơdrŏ tơlei 'noh kơtĕch đĭ đơ̆ng ti sư nhen thoi brai.

¹³Đelila khan Ih oei roi hơlĕnh kơ inh dơ̆ng; apinh ih roi ăn kơ inh băl. Pơm liơ wă kơ gơh kôp chô̆ ih? Samsơn khan: Dah ih 'monh tơpơh dăng monh sŏk kơ̆l inh tơ 'long wai na tanh kơjăp sư. Lei inh gô rơdu, nhen thoi lu bơngai nai.

¹⁴Đelila gô Samsơn tep iŏk tơpơh dăng 'monh sŏk Samsơn tanh kơjăp hơdai hăm 'long wai; đang kơ 'noh sư krao: Ơ Samsơn bơngai Philistin wă blah rôp ih, mă-lei sư iung râp hloi 'long wai hăm pơdŭng kơtĕch hloi brai mă tanh hăm sŏk.

¹⁵Na Đelila khan kơ Samsơn: Liơ mă ih khan, Inh hưch kơ ih, mă-lei lăm jơhngơ̆m ih ưh kơ tơpăt hăm inh Ih hơlĕnh kơ inh pêng wơ̆t kơ 'nâu boih, ưh kơ roi hơlăng tơpăt kơ inh jơhngơ̆m pran kơtang ih tih dêh 'noh đei đơ̆ng yơ.

¹⁶Rim năr hrăn lung pơm kơ Samsơn ưh kơ hiôk rŏ kơ 'maih lôch.

¹⁷Na sư roi tơpăt đĭ-đăng tơdrong. Sư khan: Săng hơkôih sŏk, ưh kơ đei layơ 'bơm kơ̆l inh, yua kơ đơ̆ng inh oei lăm klak mĕ inh. Inh bơngai Nasarit 'măn kơ Kră Yang 'Bok Kei-Dei boih. Tơdah iŏk săng hơkôih sŏk kơ̆l inh, lei jơhngơ̆m pran, gô tĕch đơ̆ng inh lei inh rơdu thoi bơngai nai đĕch mơ̆n.

¹⁸Đelila 'bôh Samsơn roi đĭ jơhngơ̆m tơpăt kơ sư boih, sư krao lu 'bok pơgơ̆r bơngai Philistin sư khan: Pă minh 'măng âu, iĕm năm tơ âu bĕ yua kơ sư roi tơpăt đĭ tơm tơdrong ăn kơ inh. Thoi noh lu yŏng pơgơ̆r Philistin năm dơ̆ng tơ hnam sư ei chĕp ba jên hu.

¹⁹Drŏ-kăn ei pơlung Samsơn tep hơgơn 'bơ̆t blu sư, krao bơngai hơkôih lê̆ tơpơh dăng 'monh sŏk đơ̆ng kơ̆l Samsơn; drŏ-kăn âu pơm kơ Samsơn gleh lap, tơdrong pran sư lĕch đơ̆ng lăm jơhngơ̆m sư.

²⁰Drŏ-kăn ei khan: Ơ Samsơn bơngai Philistin năm blah rôp ih. Sư iung khan: Inh gô lĕch klaih hlôi thoi brei mơsơ̆ păng inh gô klaih đơ̆ng ti lu sư. Mă-lei sư ưh kơ băt ôh Kră Yang lĕch jăk đơ̆ng sư boih.

²¹Lu bơngai Philistin rôp sư, kuek 'bar pah măt sư, chông ba sư năm tơ pơlei Gasa, chô̆ sư hăm tơlei glang kong 'bar pah, phak sư ot, tơpăl peh hơ'bo lăm hnam bơnă.

²²Lu sŏk sư đơ̆ng đe hơkôih bluh dơ̆ng boih.

²³Kơplah 'noh lu yŏng pơgơ̆r Philistin akŭm đĭ-đăng bơngai Philistin wă pơyơ̆r tơmam soi tih ăn kơ yang Dagôn, yang tih lu sư. Hiôk chơt dih băl, lu sư khan: Yang bơ̆n pơjao boih Samsơn lăm tơpang ti lu bơ̆n, sư bơngai ayăt kơ bơ̆n.

²⁴Wă kon pơlei 'bôh Samsơn, lu sư bơnê ư-ang kơ yang lu sư: Yang lu bơ̆n pơjao boih bơngai ayăt kơ bơ̆n, bơngai mă pơrăm chŭn mir lu bơ̆n păng đei pơlôch ưh kơ băt dôm yơ bơngai bơ̆n.

²⁵Wă jơhngơ̆m lu sư hiôk chơt, lu sư ôr re khan: Hơtŏk Samsơn tơ âu bĕ, wă kơ sư pơpơm pơchơt kơ lu bơ̆n. Lu sư dui Samsơn lĕch đơ̆ng lăm hnam bơnă, na Samsơn pơpơm pơchơt 'bơ̆t anăp kon pơlei pơla. Lu sư ăn kơ Samsơn dơ̆ng 'bơ̆t tŏk-bŏk lu jrăng hnam đe akŭm.

²⁶Samsơn khan kơ bơngai hơ'lơ̆p ba sư: Ba inh năm tơ jrăng tih mă pơjăng kơ hnam akŭm âu, wă kơ inh gơning kơ jrăng 'noh.

²⁷Lăm hnam 'noh đei lơ bơngai drŏ-nglo drŏ-kăn, 'lơ̆p 'lŏ; dôm lu yŏng pơgơ̆r bơngai Philistin ngôi đĭ tơ noh; tơ kơpal bơbŭng hnam noh đei dang pêng-rơbâu 'nu bơngai drŏ-nglo păng drŏ-kăn oei lăng Samsơn pơpơm pơchơt.

²⁸Samsơn krao khan: Ơ Kră Yang Tih Hloh, apinh Ih 'blŏk kơ inh. Ơ Kră Yang 'Bok Kei-Dei, inh apinh Ih ăn kơ inh đei jơhngơ̆m pran pă minh 'măng wă kơ inh pơm tơwih 'mong plơ̆ kơ lu bơngai Philistin yua kơ 'bar pah măt inh.

²⁹Samsơn rôp kơjăp 'bar tŏ jrăng tơm dŏl hnam akŭm tih sư rôp kơjăp; ti gah 'ngiĕo sư rôp jrăng minh pơm; ti gah 'ma sư kư̆m rôp jrăng nai

³⁰Sư khan thoi âu: “Apinh Ih ăn kơ inh lôch hơdai hăm lu kon pơlei bơngai Philistin!” Đơ̆ng noh sư tŭk đĭ jơhngơ̆m pran tŭn tơlơ̆ 'bar tŏ jrăng hơlih? Păk glơ̆m lu yŏng pơgơ̆r păng đĭ-đăng lu kon pơlei oei lăm noh. Kơplah Samsơn lôch, sư pơlôch lu bơngai Philistin lơ hloh kơplah sư oei arih.

³¹Đơ̆ng rŏng kơ noh, 'nhŏng oh sư păng đĭ-đăng hnam dơnŏ 'bă sư jur tơ noh, iŏk ba atâu sư brŏk 'bŭ tơ lăm bơsat Manôa 'bă sư, sơlam pơlei Sôra hăm pơlei Êstaôl Samsơn pơm 'bok sek tơlang kơ lu bơngai Isơrael lăm 'bar-jĭt sơnăm.