Read bahnar Lu 19 Bible Online

Lu 19 - bahnar bible

Lu 19

¹Kơplah noh lu bơngai Isơrael ưh kơ đei pơtao. Đei minh 'nu bơngai Lêwi oei tơ anih kueng chơngue tơ groi kông Êphraim iŏk akăn kơnhŏng đơ̆ng pơlei Betlehem, lăm dêh Juđa.

²Akăn kơnhŏng noh sư pơm pơyô kư̆ kă, achăng lê̆ klo, na sư brŏk tơ hnam 'bă sư tơ pơlei Betlehem lăm dêh Juđa. Đơ̆ng rŏng kơ sư brŏk tơ noh 'nao puăn khei,

³klo sư năm 'moi sư pơma pơlung pơ'lơ̆ng jơhngơ̆m sư, wă iŏk sư brŏk klo sư chông ba minh 'nu đĭch đam sư păng 'bar tŏ aseh iĕ. Drŏ-kăn ei sơng klo sư mơ̆t lăm hnam 'bă sư; wă 'bă sư 'bôh ŏng sư truh, 'bă sư kư̆m sơng chơt hiôk.

⁴Tơnei sư 'bă bơngai drŏ-kăn noh gơ̆t ŏng sư tep tơ noh, na ŏng sư 'bĭch hloi tơ noh hăm bơ̆n kră sư lăm pêng năr, sŏng sa hơdai 'bĭch tep tơ noh hloi.

⁵Truh năr mă puăn lu sư iung đơ̆ng hrôih hơmet wă yak brŏk. Mă-lei 'bă drŏ-kăn noh khan kơ ŏng sư; Gô sŏng sa nhă đak 'mơ̆i na iĕm huay kơ pơngot, na măr iĕm yak.

⁶Thoi noh klo kăn bre sư hơ-oei sŏng sa hơdai, na 'bă bơngai drŏ-kăn noh khan dơ̆ng: Ơ dăm, apinh ih oei tơ âu pă minh măng âu dơ̆ng wă kơ jơhngơ̆m ih hiôk chơt.

⁷Bơngai Lêwi iung wă năm ră, mă-lei bơ̆n kră sư pơlung, apinh sư jing sư wơ̆t 'bĭch lăm măng 'noh dơ̆ng.

⁸Truh năr mă pơđăm, sư iung đơ̆ng hrôih wă brŏk, mă-lei 'bă bơngai drŏ-kăn noh pơma dơnuh hăm sư: “Apinh ih ngôi tơ âu dơ̆ng hơya truh tơ kơsơ̆, gô sŏng sa chơt hiôk 'mơ̆i.” Na lu sư sŏng sa hơdai.

⁹Lăp bơngai Lêwi, hăm akăn kơnhŏng păng đĭch đam sư wă iung yak, wă tơklah đơ̆ng bơ̆n kră sư, tơnei sư khan dơ̆ng: “Bre kon lăng 'năr kơsơ̆ wă măng boih, inh wă kơ măr iĕm oei 'bĭch ngôi tơ âu pă minh măng âu dơ̆ng. Yua kơ 'năr kơsơ̆ măng boih wă jơhngơ̆m măr iĕm hiôk chơt; pơgê dơning măr iĕm iung dơ̆ng hrôih drôih brŏk.”

¹⁰Mă-lei ŏng sư ưh kơ wă 'bĭch măng noh dơ̆ng, sư iung brŏk hăm akăn kơnhŏng sư kư̆m kiơ̆ mơ̆n păng bơngai buăl sư hloi mơ̆n, anhăk ba 'bar tŏ aseh iĕ tah an, sư năm truh tơ pơlei Jêbus.a

¹¹Lăp lu sư năm truh jê̆ tơ pơlei Jêbus 'năr wă mơ̆t boih, na đĭch đam sư khan; ơ 'bok bĕ bơ̆n mơ̆t lăm pơlei Jêbus âu 'bĭch tơ âu minh măng.

¹²'Bok tơ'ngla sư tơl: Lu bơ̆n ưh kơ gơh mơ̆t ôh lăm minh pôm pơlei tơmoi, mă ưh kơ trŏ kon pơlei bơngai Isơrael. Lu bơ̆n khŏm năm truh tơ pơlei Gibêah.

¹³Yŏng tơ'ngla khan kơ sư dơ̆ng: Bĕ bơ̆n adrin năm truh tơ pơlei Gibêah dah pơlei Rama, bơ̆n 'bĭch tơ pơlei 'noh.

¹⁴Thoi noh na lu sư kư̆ kơ năm; lăp truh pơlei Gibêah, lăm char Bênjamin, năr mơ̆t hloi boih.

¹⁵Lu sư weh tơ pơlei Gibêah; wă mơ̆t 'bĭch ră, lu sư mơ̆t lăm pơlei boih, ngôi 'bơ̆t cham, đe juăt akŭm ưh kơ đei bu sơng iŏk lu sư mơ̆t 'bĭch tơ lăm hnam lăm măng 'noh.

¹⁶Đei tơ'bơ̆p hĭ minh 'nu kră sư 'nao wih đơ̆ng jang kơsơ̆; kră ei sư bơngai đơ̆ng tơring groi kông Êphraim, mă-lei sư oei tơ pơlei Gibêah. Pơlei lu bơngai Bênjamin.

¹⁷Wă bơngai kră âu sư tơmang lăng sư 'bôh bơngai tơmoi oei ngôi 'bơ̆t cham pơlei, sư apinh hloi: Lu iĕm đơ̆ng yơ wă năm tơ yơ?

¹⁸Lu bơngai tơmoi ei tơl: Lu nhôn năm đơ̆ng pơlei Betlehem dêh Juđa, lu nhôn weh tơ âu wă wih tơring kueng lăm tơring char groi kông Êphraim, inh oei; tơ noh inh năm tơ pơlei Betlehem dêh Juđa 'nâu lu nhôn năm mơ̆t tơ hnam Kră Yang, ưh kơ đei bơngai bu sơng iŏk nhôn mơ̆t tơ hnam sư.

¹⁹Lu nhôn kư̆m oei đei hơnong 'ba păng 'nhĕt kơ hiĕm aseh iĕ lu nhôn, 'bĕng sa păng đak hơmu oei tơm mah mơ̆n. Kơ inh đĭch đam ih păng đam drŏ-kăn ih păng bơngai đam tơdăm mă kiơ̆ inh âu đĭch đam ih, nhôn ưh kơ đei kơ'bah kiơ.

²⁰Bơngai kră ei khan: “Lu iĕm 'nĕ tơtăm kiơ! Inh gô hiơ̆k chă ăn kơ lu iĕm tơmam yua, mă-lei iĕm ưh kơ gơh 'bĭch tep tơ 'nguaih cham pơlei thoi âu.”

²¹Bơngai kră ei pơtơm lu sư mơ̆t lăm hnam sư, ăn kơ aseh iĕ sa, đang kơ noh lu sư ôp hơrao jơ̆ng ti, sŏng sa.

²²Kơplah lu sư oei sŏng sa hiôk chơt đei lu bơngai drŏ-nglo kơnê̆ lăm pơlei 'noh wang tăp kơ hnam 'noh gơgŭ 'măng; lu sư khan kơ 'bok kră tơ'ngla hnam 'noh: Athei ih tơlĕch bĕ bơngai 'noh đơ̆ng lăm hnam ih, lê̆ lu nhôn ngôi kư̆ kă lăm sư.

²³Tơ'ngla hnam 'noh lĕch tơ 'nguaih khan kơ lu sư: Ơ lu 'nhŏng oh inh, 'nĕ kơ pơm tơdrong kơnê̆ âu; inh sơng iŏk bơngai âu mơ̆t lăm hnam inh, iĕm 'nĕ kơ pơm yoch kơnê̆ kơ sư.

²⁴Âu kon adruh inh oei hơlai hơnĭl păng akăn kơnhŏng sư to, inh gô chông măr sư lĕch tơ 'nguaih; mơ̆ng kơ lu iĕm wă pơm kơ bre sư liơ kư̆m bưh mă-lei bơngai âu iĕm ưh kơ gơh pơm kơnê̆ kư̆ kă kơ sư ôh.

²⁵'Bok 'noh pơma thoi noh ră mă-lei lu sư ưh kơ mơ̆ng ôh; đơ̆ng noh bơngai tơmoi ei iŏk akăn kơnhŏng sư tơlơ̆ tơ 'nguaih ăn kơ lu sư; lu sư pơm kơnê̆ pơ'brơh kơ drŏ-kăn ei prăt măng truh tơ pơgê, kơplah 'năr wă lĕch lu sư achăng bơngai drŏ-kăn noh.

²⁶Wă jê̆ pơgê hơdah bơngai drŏ-kăn ei wih tơ hnam 'bok kră mă hnam klo sư 'bĭch, sư pơ̆k hraih đang 'bơ̆t 'măng 'bĭch tơ noh truh 'năr hơdah.

²⁷Pơgê hrôih 'noh klo sư iung, pơih 'măng wă brŏk 'bôh akăn kơnhŏng sư pơ̆k hraih đang 'bơ̆t anăp 'măng 'bar pah ti sư rôp kơtơ̆n.

²⁸Sư khan kơ drŏ-kăn: Adrin Iung bĕ, lu bơ̆n wă yak; mă-lei drŏ-kăn ei ưh kơ đei tơl sư lôch boih. Đơ̆ng noh sư hơtŏk drŏ-kăn ei kơpal aseh iĕ sư, yak brŏk wih tơ hnam sư.

²⁹Lăp truh tơ hnam boih, sư iŏk săng, chơ̆ng jơ̆ng ti akâu akăn kơnhŏng sư mơjĭt-'bar jăl chă ba tơ jơ̆p teh đak Isơrael.

³⁰Đĭ-đăng bơngai 'bôh tơdrong 'noh hlĭch hlăch păng khan: Đơ̆ng năr kon pơlei Isơrael lĕch đơ̆ng dêh char Êyiptơ truh tơ dang ei ưh tam đei bu pơm păng 'bôh tơdrong truh thoi âu! Bơ̆n athei tơchĕng lăng, pơma pơđâu băl lăng bơ̆n gô pơm thoi yơ?