Read bahnar Lu 2 Bible Online

Lu 2 - bahnar bible

Lu 2

¹Linh jang 'lơ̆ng Kră Yang năm tŏk đơ̆ng pơlei Gilgal truh tơ Bôkim păng khan thoi âu: Inh chông ba lu iĕm hlôi đơ̆ng dêh Êyiptơ boih, ba iĕm mơ̆t tơ dêh char mă Inh đei pơkă hăm 'bok yă wă ăn kơ adrĕch adrung lu sư. Inh đei khan kơ iĕm. ‘Inh ưh kơ đei layơ hŭt lê̆ dôm tơdrong mă Inh pơkă hăm lu iĕm;

²Mă gah lu iĕm, 'nĕ kơ pơgơ̆p băl hăm lu bơngai mă oei tơ char âu; iĕm athei pơrăm lê̆ lu rup yang lu sư.’ Mă-lei iĕm ưh kơ mơ̆ng nơ̆r Inh khan. Yua kơ kiơ lu iĕm pơm tơdrong noh?

³Na kư̆m thoi Inh đei khan boih, Inh ưh kơ đei pơpuh tơweh kon pơlei noh ataih kơ lu iĕm, lu sư gô oei jê̆ lu iĕm păng tơdrong lu sư pơm yang nhen thoi poh-'năk wă đăk kơ lu iĕm.

⁴Lăp linh jang 'lơ̆ng Kră Yang pơma kơ kon pơlei Isơrael tôch boih, na lu kon pơlei pơla nhơ̆m ôr.

⁵Lu sư krao anăn anih noh Bôkim wă khan lu bơngai nhơ̆m păng pơyơ̆r kơ Kră Yang tơmam soi tơ anih noh.

⁶Đơ̆ng rŏng kơ Jôsuê ăn kơ kon pơlei brŏk, na đĭ rim 'nu bơngai Isơrael, năm iŏk dêh mă đei hlang lăng trŏ kơ sư.

⁷Kon pơlei pơla chu yom kơ Kră Yang ling-lang truh tơ Jôsuê păng bơngai đe kră arih đunh hloh kơ Jôsuê lôch, noh lu bơngai mă 'bôh tơdrong jang mơsêh tih dêh mă đêl Kră Yang pơm boih yua kơ lu bơngai Isơrael.

⁸Jôsuê kon drŏ-nglo Nun đĭch đam Kră Yang lôch, sư arih đei minh-hrĕng mơjĭt sơnăm;

⁹đe 'bŭ sư lăm teh hnam sư kơdih tơ Timnat Hêres kơpal groi kông Êphraim gah yă-nơ̆m kơ kông Gaas.

¹⁰Đĭ-đăng jơhnơr ei lĕch kiơ̆ yă 'bok lu sư; na đei minh jơhnơr nai iung dơ̆ng mă ưh kơ băt kơ Kră Yang păng kư̆m ưh kơ 'bôh dôm tơdrong mơsêh Kră Yang đei pơm yua kơ lu bơngai Isơrael.

¹¹Kơplah noh lu bơngai Isơrael pơm kơnê̆ 'bơ̆t anăp Kră Yang, kơkuh kơ lu rup yang Baal

¹²Hŭt lê̆ Kră Yang 'Bok Kei-Dei 'bok yă lu sư, Tơ'ngla mă chông lu sư lĕch đơ̆ng dêh Êyiptơ. Lu sư lui kiơ̆ kơ yang nai đơ̆ng lu adrĕch adrung jum dăr kơ lu sư, drap kơkuh kơ lu yang noh păng pơm kơ Kră Yang hil blĕk kơ lu sư.

¹³Thoi noh lu sư lê̆ Kră Yang drap kơkuh kơ yang Baal păng Astarôt.

¹⁴Kră Yang blĕk kơ bơngai Isơrael păng pơjao lu sư ăn kơ lu bơngai tơgar iŏk mŭk tơmam lu sư, na lu bơngai Isơrael ưh kơ gơh pơm kiơ kơ lu bơngai ayăt areh kơ lu sư.

¹⁵Mă lu sư năm tơ yơ yơ Kră Yang kư̆m ăn kơ lu sư đei tơdrong gleh pơmat 'blep thoi Kră Yang khan pơkă kơ lu sư. Lu sư đei tơdrong gleh pơmat tih dêh.

¹⁶Na Kră Yang rơih hơtŏk lu 'bok sek tơlang dŏng pơklaih lu sư đơ̆ng bơngai ayăt.

¹⁷Mă-lei lu sư kư̆m ưh kơ wă mơ̆ng lu 'bok sek tơlang lu sư kiơ̆ kơkuh kơ yang nai. Lu sư ưh kơ rok kiơ̆ trong mă đêl yă 'bok lu sư yak, ưh kơ rok kiơ̆ păng ưh kơ wei răk tơdrong juăt Kră Yang.

¹⁸Kơplah Kră Yang rơih lu 'bok sek tơlang ăn kơ lu bơngai Isơrael, Sư oei hơdai hăm lu 'bok sek tơlang noh păng yua lu sư pơklaih lu bơngai Isơrael đơ̆ng ti lu bơngai mă ayăt kơ lu sư Kră Yang mơnat kơ lu sư ôr krao yua kơ ayăt lu bơngai pơm kơnê̆ pơjuă pơđep lu sư.

¹⁹Mă-lei đơ̆ng rŏng kơ 'bok sek tơlang noh lôch na lu bơngai Isơrael pơm kơnê̆ hloh dơ̆ng kơ adrol, lui kiơ̆ kơkuh kơ lu yang nai; lu bơngai Isơrael ưh kơ chu hŭt lê̆ tơdrong kơnê̆, oei rok kiơ̆ trong kơnê̆ khŏm khŏm.

²⁰Yua kơ thoi noh Kră Yang blĕk kơ bơngai Isơrael păng Sư khan thoi âu: Yua kơ lu bơngai âu ưh kơ chu kiơ̆ nơ̆r Inh pơkă kơ yă 'bok lu sư păng lu sư kư̆m ưh kơ chu mơ̆ng kiơ̆ nơ̆r Inh khan,

²¹na gah Inh, kư̆m ưh kơ pơpuh lu bơngai ayăt kơ lu sư mă đêl oei kơplah Jôsuê oei arih, mă Jôsuê lôch boih.

²²Inh ăn kơ lu ayăt kơ lu sư oei tơ noh Inh wă pơlong lăng lu bơngai Isơrael, lu sư hăm oei đei wei păng rok kiơ̆ trong Kră Yang thoi lu 'bok yă lu sư mă đêl oei tơ noh ưh.

²³Yua kơ thoi noh na Kră Yang lê̆ lu bơngai ayăt 'nâu oei lăm dêh lu sư, ưh kơ hăt hot pơpuh tơlĕch lu sư năm tơ nai păng ưh kơ pơjao lu sư lăm ti Jôsuê.