Read bahnar Lu 20 Bible Online

Lu 20 - bahnar bible

Lu 20

¹Đơ̆ng 'noh đĭ-đăng lu bơngai Isơrael akŭm băl, đơ̆ng Đan truh tơ Bêrsêba păng đơ̆ng dêh Gileat. Akŭm băl minh jơhngơ̆m đon thoi minh 'nu 'bơ̆t anăp Kră Yang tơ pơlei Mispa.

²Lu yŏng pơgơ̆r kon pơlei đơ̆ng mơjĭt-'bar adrĕch bơngai Isơrael, đĭ-đăng lu sư đei măt tơm lăm năr akŭm tih lu kon pơlei Kră Yang. Đei puăn-hrĕng rơbâu 'nu linh chĕp đao gưm akŭm băl.

³Lu bơngai Bênjamin kư̆m kơtơ̆ng khan: Kon pơlei Isơrael đei năm akŭm băl boih tơ Mispa. Na kon pơlei Isơrael khan: Roi ăn bĕ kơ lu nhôn băt tơdrong truh âu thoi yơ?

⁴Thoi noh bơngai Lêwi klo bơngai drŏ-kăn mă lôch tơl: Inh mơ̆t lăm pơlei Gibêah lăm char Bênjamin, inh hăm akăn kơnhŏng inh; nhôn wă 'bĭch tep tơ noh.

⁵Lu drŏ-nglo pơlei Gibêah wă pơm kơ inh, lu sư wang hnam inh 'bĭch; lu sư wă pơlôch inh ră, na pơm pơ'brơh kơ akăn kơnhŏng inh dĭng sư lôch.

⁶Đơ̆ng noh, inh chơ iŏk akâu akăn inh, chơ̆ng hơjăl, na ăn kơ đe năm ba tơ jơ̆p kơ teh đak Isơrael yua kơ lu sư đei pơm boih tơdrong kơnê̆ dêh thoi noh pơm pơ'brơh 'mê̆-'mach lăm char Isơrael.

⁷Dang ei, ơ đĭ-đăng bơngai Isơrael, lu 'nhŏng oh athei khan bĕ lu bơ̆n wă pơm thoi yơ kơ tơdrong âu.

⁸Đĭ-đăng kon pơlei hiơ̆r minh jơhngơ̆m iung thoi lĕ kơ minh 'nu bơngai, lu sư khan: Lu nhôn ưh pă wơ̆t brŏk tơ hnam, thoi noh lăm lu nhôn ưh kơ đei bu wă wih brŏk tơ hnam sư kơdih ôh,

⁹mă-lei 'nâu tơdrong lu bơ̆n athei pơm kơ pơlei Gibêah: Lu bơ̆n athei tŏk blah pơlei 'noh kiơ̆ kơ đei hlang lăng.

¹⁰Lu bơ̆n athei rơih iŏk mơjĭt 'nu drŏ-nglo lăm minh-hrĕng đơ̆ng đĭ-đăng lăm adrĕch bơngai Isơrael; lăm minh-rơbâu klah rơih iŏk minh-hrĕng 'nu, lăm mơjĭt-rơbâu rơih iŏk minh-rơbâu; lê̆ lu sư chă ba tơmam sa ăn kơ lu kon pơlei pơla mưh lu linh bơ̆n truh tơ noh lu bơ̆n gô pơm kơ pơlei Gibêah lăm char Bênjamin kiơ̆ thoi sư pơm kơnê̆ pơ'brơh lăm char Isơrael.

¹¹Thoi noh lu bơngai Isơrael akŭm băl đĭ-đăng minh jơhngơ̆m đon thoi minh 'nu năm blah pơlei 'noh.

¹²Dôm lu adrĕch Isơrael wơh lu bơngai năm jơ̆p tơ rim tơring bơngai Bênjamin, na khan: Tơdrong kơnê̆ krưp dêh lăm lu iĕm noh liơ?

¹³Jao bĕ kơ lu nhôn lu bơngai kơnê̆ pơm kư̆ kă krưp dêh noh đơ̆ng lăm pơlei Gibêah, lê̆ lu nhôn pơlôch lu sư wă sŭt pơgoh đĭ tơdrong kơnê̆ noh đơ̆ng lăm bơngai Isơrael. Mă-lei lu bơngai Bênjamin ưh kơ đei wă mơ̆ng nơ̆r lu 'nhŏng lu sư, bơngai Isơrael athei.

¹⁴Lu bơngai Bênjamin lĕch đơ̆ng pơlei lu sư păng năm akŭm băl tơ pơlei Gibêah wă tơblah bơngai Isơrael.

¹⁵Lăm năr 'noh, lu bơngai Bênjamin pơtơm băl đơ̆ng lu pơlei truh tơ noh, đĭ-đăng đei 'bar-jĭt tơdrâu-rơbâu 'nu bơngai drŏ-nglo gơh hơgei chĕp khêl đao gưm thim đơ̆ng pơlei Gibêah đei tơpơh-hrĕng 'nu lu linh hơgei kơ chĕp khêl đao đe rơih boih.

¹⁶Lăm lu Bênjamin 'nâu đei tơpơh-hrĕng 'nu gơh yua ti 'ngiĕo, đĭ-đăng lu bơngai 'noh hơgei kơ klơ̆m tơmo. Lu sư gơh klơ̆m rĕng kơ minh ioi sŏk kư̆m oei 'bơm, ưh kơ bloih.

¹⁷Lu bơngai Isơrael, ưh kơ đei jơ̆ lu bơngai Bênjamin, akŭm băl đĭ-đăng đei puăn-hrĕng rơbâu 'nu lu bơngai gơh hơgei kơ chĕp khêl đao, đĭ-đăng 'noh tă kơ linh hơgei tơblah ngăl.

¹⁸Bơngai Isơrael tŏk tơ pơlei Bethel krao khan apinh Kră Yang 'Bok Kei-Dei: Lăm lu nhôn bu wă năm blah bơngai Bênjamin adrol? Kră Yang tơl: Bơngai Juđa tŏk tơblah adrol.

¹⁹Pơgê đơ̆ng rŏng lu bơngai Isơrael iung đơ̆ng hrôih pơm kơđông jê̆ pơlei Gibêah.

²⁰Bơngai Isơrael năm blah bơngai Bênjamin; săp lu linh wă năm blah pơlei Gibêah,

²¹lu bơngai Bênjamin lĕch đơ̆ng pơlei Gibêah 'bet pơlôch 'bar-jĭt 'bar-rơbâu 'nu lu bơngai Isơrael lăm năr noh.

²²Mă-lei lu bơngai Isơrael pơlung tơiung jơhngơ̆m dih băl klah song, lu sư săp wă blah tơ anih đêl lu sư tơblah băl năr adrol noh.

²³Lu bơngai Isơrael tŏk nhơ̆m hmoi 'bơ̆t anăp Kră Yang, truh tơ kơmăng hloi. Lu sư krao apinh Kră Yang: Lu nhôn wă tơblah dơ̆ng ưh hăm lu 'nhŏng oh nhôn bơngai Bênjamin? Kră Yang tơl: Lu iĕm năm blah lu sư bĕ.

²⁴Thoi noh wơ̆t mă 'bar lu bơngai Isơrael pơtơm băl năm blah lu bơngai Bênjamin.

²⁵Lu bơngai Bênjamin lĕch đơ̆ng pơlei Gibêah, lu sư năm blah lu bơngai Isơrael, pơlôch mơjĭt-tơhngam rơbâu 'nu kon pơlei Isơrael dŏng, 'noh tă tơ lu bơngai gơh hơgei kơ chĕp khêl đao gưm ngăl.

²⁶Đĭ-đăng lu bơngai Isơrael, tŏk năm truh tơ pơlei Bethel, nhơ̆m dơ̆ng 'bơ̆t anăp Kră Yang ơ̆t kơ sŏng sa năr noh dĭng truh kơmăng, păng lu sư pơyơ̆r tơmam soi 'buh, pơyơ̆r tơmam soi apinh mơnat đơ̆ng Kră Yang.

²⁷Lu kon pơlei Isơrael krao apinh Kră Yang, yua kơ lăm kơplah 'noh hom pơgơ̆p Kră Yang 'Bok Kei-Dei oei lê̆ tơ noh.

²⁸Đei Phinêhas, kon drŏ-nglo Êlêasar sâu Arôn, bơ̆jang 'bơ̆t anăp hom pơgơ̆p noh. Lu sư krao apinh Kră Yang khan: Lu nhôn hăm wă năm tơblah hăm lu 'nhŏng oh nhôn Bênjamin dơ̆ng ưh; dah mă lu nhôn pơdơh 'mơ̆i? Kră Yang tơl: Năm bĕ, yua kơ lăm năr dơning Inh gô pơjao lu sư lăm tơpang ti iĕm,

²⁹Lu bơngai Isơrael wang tăp dăr kơ pơlei Gibêah.

³⁰Truh năr mă pêng kon pơlei Isơrael tŏk wă blah hăm bơngai Bênjamin păng klah asong lu linh năm blah pơlei Gibêah thoi lĕ năr adrol ki.

³¹Lu bơngai Bênjamin lĕch năm tơblah hăm lu bơngai Isơrael, lu sư druh bơngai Isơrael kơdâu ataih đơ̆ng pơlei ưh kơ băt lu linh Isơrael wă kơ lu sư lĕch ataih đơ̆ng pơlei sư thoi noh. Lei-lăi thoi adrol ki, lu sư pơlôch lu bơngai Isơrael dang pêng-jĭt 'nu tơ rok trong tih năm tơ pơlei Bethel, hăm trong năm tơ pơlei Gibêah tơ lăm bri tơmăn.

³²Lu bơngai Bênjamin khan tơduă: To lu bơ̆n blah lu sư kơdâu kơ bơ̆n lei-lăi thoi adrol ki mơ̆n, mă-lei lu bơngai Isơrael khan: Dang ei lu bơ̆n kơdâu rok trong wă pơhlŭ lu sư lĕch ataih đơ̆ng pơlei.

³³Lu bơngai Isơrael lu sư iung đơ̆ng anih lu sư hơmet wă tơblah tơ pơlei Baal Tamar păng lu khŭl linh Isơrael nai kư̆m lĕch đơ̆ng anih lu sư răp tơblah gah bơmơ̆t kơ pơlei Gibêah.

³⁴Na mơjĭt-rơbâu 'nu lu linh Isơrael pran kơtang tơblah 'bơ̆t anăp pơlei Gibêah, lu sư blah drŭt tơ anăp, tơblah tih dêh tơpă. Mă-lei lu bơngai Bênjamin oei ưh kơ băt tơdrong răm wă truh tơ lu sư.

³⁵Kră Yang blah pơrăm lu bơngai Bênjamin 'bơ̆t anăp lu bơngai Isơrael; lăm năr 'noh lu bơngai Isơrael pơlôch 'bar-jĭt pơđăm-rơbâu minh-hrĕng 'nu lu bơngai Bênjamin, đĭ-đăng lu sư bơngai hơgei chĕp khêl đao gưm ngăl.

³⁶Na lu bơngai Bênjamin băt 'bôh thuơ boih Lu bơngai Isơrael pơm kơdŭn tơ rŏng đơ̆ng anăp lu bơngai Bênjamin; yua kơ lu sư hơmĕng kơ đei bơngai răp tơ jê̆ pơlei Gibêah 'noh dai.

³⁷Lu linh mă răp gô tơ pơlei Gibêah lu sư kơdâu mơ̆t blah lăm pơlei Gibêah blah pơlôch pơrăm đĭ-đăng lu bơngai oei lăm pơlei 'noh hăm đao gưm.

³⁸Lu linh bơngai Isơrael đei pơkă băl boih hăm lu linh răp noh, dah đei mơ̆t blah pơlei boih athei soh 'nhui ŭnh găm tŏk tơ kơpal wă pơm tơdra,

³⁹Na lu linh Isơrael mă kơdâu lu sư gô wih tơ rŏng tơblah. Mă gah lu bơngai Bênjamin 'bơ̆t lu sư blah păng pơlôch dang pêng-jĭt 'nu lu bơngai Isơrael lu sư khan: Tơpă lu sư gô kơdâu kơ lu bơ̆n thoi adrol ki.

⁴⁰Mă-lei lăp 'bôh 'nhui 'noh păr tŏk đông tơ kơpal hloh kơ pơlei thoi jrăng 'nhui ŭnh, lu bơngai Bênjamin hue lăng tơ rŏng, 'bôh jơ̆p kơ lăm pơlei 'noh tă kơ 'bôh 'nhui ŭnh ngăl đông tŏk tơ plĕnh.

⁴¹Kơplah noh, lu bơngai Isơrael sư wơ̆t tơ rŏng tơblah mă gah lu bơngai Bênjamin lu sư rai hli tơrơ, yua kơ lu 'bôh tơdrong gleh răm wă truh tơ lu sư.

⁴²Na lu sư tơwih rŏng kơdâu ôn đơ̆ng lu bơngai Isơrael, kơdâu tơ lăm char glă, mă-lei lu linh Isơrael druh blah lu sư, lu bơngai Isơrael mă lĕch đơ̆ng lăm pơlei 'noh kư̆m blah pơlôch đĭ lu sư.

⁴³Bơngai Bênjamin, ling-lang lu bơngai Isơrael wang druh chă lu sư păng pơlôch lu sư lăm tơring jê̆ pơlei Gibêah, gah măt 'năr lĕch.

⁴⁴Mơjĭt-tơhngam rơbâu 'nu bơngai Bênjamin pơ̆k lôch, noh tă kơ lu bơngai nuih kơtang ngăl.

⁴⁵Mă lăm lu bơngai kơdâu wơ̆t tơ rŏng ôn tơ lăm char glă, năm tơ gah hơgơp tơmo Rimôn, bơngai Isơrael kư̆m pơlôch tơ rok trong pơđăm-rơbâu 'nu bơngai dơ̆ng. Lu sư druh truh tơ pơlei Gidôm păng lu sư đei pơlôch 'bar-rơbâu 'nu dơ̆ng.

⁴⁶Akŭm đĭ-đăng lu bơngai Bênjamin lôch lăm năr 'noh đei 'bar-jĭt pơđăm-rơbâu 'nu lu bơngai tă kơ gơh hơgei chĕp khêl đao, nuih kơtang ngăl,

⁴⁷Đei lu mơ'nah kơdâu ôn lăm char glă tơ hơgơp tơmo Rimôn, oei ôn tơ noh truh tơ puăn khei.

⁴⁸Lu bơngai Isơrael wơ̆t năm blah dơ̆ng lu bơngai Bênjamin koh pơlôch hăm đao gưm đĭ-đăng lu kon pơlei, pơrăm đĭ tơmam, sem dơrong, mơ̆ng kơ tơ'bơ̆p, soh rơng chhơng pơlei đĭ-đăng.