Read bahnar Lu 4 Bible Online

Lu 4 - bahnar bible

Lu 4

¹Đơ̆ng rŏng kơ Êhut lôch boih, na kon pơlei Isơrael pơm kơnê̆ dơ̆ng 'bơ̆t anăp Kră Yang.

²Kră Yang jao lu sư lăm ti Jabin pơtao Kanaan, pơgơ̆r tơ pơlei Hasor. Yŏng pơgơ̆r linh noh Sisêra sư oei tơ pơlei Harôsêt Hagôim.

³Yua kơ pơtao Jabin đei tơsĭn-hrĕng tŏ gre aseh đe pơm păng mam păng lăm 'bar-jĭt sơnăm sư pơgŏ pơđep pơm kơnê̆ kơ lu bơngai Isơrael, na kon pơlei Isơrael krao apinh Kră Yang tơgŭm.

⁴Lăm kơplah noh, Đêbôra bơngai drŏ-kăn khan lê̆ adrol, akăn Lapiđôt, yă sek tơlang kon pơlei Isơrael.

⁵Sư juăt kơ oei ngôi ala tơnơm 'long gol tơ kơpal groi kông Êphraim sơlam pơlei Rama păng Bethel, na lu kon pơlei Isơrael tŏk năm truh tơ sư, wă kơ sư sek tơlang ăn.

⁶Yă ei wơh athei đe krao Barak kon drŏ-nglo Abinôam đơ̆ng pơlei Kêđes lăm dêh char Naptali, na khan kơ sư: Kră Yang 'Bok Kei-Dei Isơrael tơtă kơ ih: Năm rơih akŭm minh-rơbâu 'nu bơngai đơ̆ng adrĕch Naptali păng lăm kon sâu Sebulun păng tŏk tơ kông Tabôr,

⁷Inh gô ba Sisêra, 'bok yŏng pơgơ̆r linh pơtao Jabin, hăm đĭ lu gre aseh sư păng đĭ lu linh sư năm tơ'bơ̆p iĕm tơ thong đak krong Kisôn; Inh gô pơjao sư lăm ti ih.

⁸Barak tơl khan: Tơdah ih năm hơdai hăm inh, inh gô năm. Tơdah ih ưh kơ năm hơdai hăm inh, inh ưh kơ năm.

⁹Yă ei tơl, sĭt tơpă inh gô năm hơdai hăm ih; mă-lei trong ih yak năm 'nâu ưh kơ đei ư-ang kơ ih ôh, yua kơ Kră Yang gô pơjao Sisêra lăm tơpang ti minh 'nu bơngai drŏ-kăn. Thoi noh Đêbôra iung yak năm hơdai hăm Barak truh tơ pơlei Kiđes.

¹⁰Barak krao akŭm pơpôi bơngai Sebulun păng bơngai Naptali năm tơ pơlei Kêđes, đe mơjĭt-rơbâu 'nu bơngai kiơ̆ sư păng Đêbôra năm hơdai sư.

¹¹Hêber bơngai Kênit sư weh boih đơ̆ng lu kon pơlei Kênit sư noh, kon sâu Hôbap 'nhŏng oh akăn Môis; sư năm pơm bơsŭn jê̆ tơ tơm 'long tih tơ Sananim, jê̆ Kêđes.

¹²Đe roi ăn kơ Sisêra băt kơ Barak, kon drŏ-nglo Abinôam, năm tŏk boih tơ kông Tabôr.

¹³Sisêra akŭm đĭ gre aseh, đei tơsĭn-hrĕng tŏ gre aseh păng đĭ lu linh sư đơ̆ng pơlei Harôsêt Hagôim năm truh tơ thong đak krong Kisôn.

¹⁴Đêbôra pơma hăm Barak khan: Iung bĕ! Năr 'nâu boih năr mă Kră Yang pơjao Sisêra lăm ti ih. Hăm trŏ kơ Kră Yang năm adrol kơ ih? Thoi noh na Barak jur đơ̆ng kông Tabôr, đei mơjĭt-rơbâu 'nu bơngai kiơ̆ sư.

¹⁵Kră Yang yua đao gưm pơm pơrŭng Sisêra păng đĭ lu gre aseh bơsei sư hăm đĭ-đăng lu linh sư kơdâu tơklah tơklang kơ Barak. Sisêra jur đơ̆ng gre aseh sư, kơdâu jơ̆ng hoh.

¹⁶Barak druh kiơ̆ gre aseh păng khŭl linh dĭng truh tơ Harôsêt Hagôim păng đĭ-đăng lu linh Sisêra đe pơlôch hăm đao gưm ưh pă đei lê̆ minh 'nu bơngai bu.

¹⁷Sisêra kơdâu ôn jơ̆ng hoh truh tơ bơsŭn Jăl, akăn Hêber bơngai Kênit; yua kơ Jabin, pơtao Hasor păng adrĕch Hêber bơngai Kênit hiôk hơiă dih băl.

¹⁸Yă Jăl lĕch sơng iŏk Sisêra na khan kơ sư: Ơ 'bok yŏng mơ̆t bĕ tơ hnam inh 'nĕ kơ hli. Thoi noh na sư mơ̆t lăm bơsŭn yă ei păng yă ei iŏk khăn tơsu kơ sư.

¹⁹Sư pơma hăm yă ei khan: Inh apinh ih song inh đak nhă tŏ sĕt, inh 'maih nhă dêh. Yă ei iŏk get akar đak toh rơmo ăn kơ Sisêra nhă; đơ̆ng noh tơsu kơ sư khăn dơ̆ng.

²⁰Na sư khan kơ yă ei dơ̆ng: Athei dơ̆ng bĕ 'bơ̆t 'măng bơsŭn ih, tơdah đei bu apinh ih, tơ âu hăm đei bu ưh, tơl ưh kơ đei bơngai bu.

²¹Đơ̆ng noh Sisêra tep hiơt, yua kơ lap dêh. Jăl akăn Hêber iŏk minh pơm 'long hơdrơ̆ng pơm bơsŭn na ti sư chĕp mut yak hơdar hơdeh năm jê̆ na pơ̆ng 'bơ̆t tơ'ngăp sư, klĕch hlôi truh tơ teh Sisêra lôch hloi, kơtă.

²²Barak oei druh 'moi Sisêra, Jăl lĕch sơng, na khan: Năm lăng bĕ, inh gô tơ'bôh ăn kơ ih bơngai mă ih oei chơchă. Barak mơ̆t kiơ̆ yă ei, 'bôh Sisêra 'bĭch lôch 'bơ̆t noh, 'bôh 'long hơdrơ̆ng pơm bơsŭn klĕch hlôi kơ tơ'ngăp sư.

²³Lăm năr noh Kră Yang ăn kơ Jabin pơtao Kanaan chu bơngai Isơrael.

²⁴Lu bơngai Isơrael rai đunh rai pran blah iŏk Jabin jei sư, pơtao Kanaan dĭng truh kơ sư pơlôch pơrăm đĭ.