Read bahnar Lu 6 Bible Online

Lu 6 - bahnar bible

Lu 6

¹Lu bơngai Isơrael pơm tơdrong kơnê̆ dơ̆ng 'bơ̆t anăp Kră Yang; na Kră Yang jao lu sư lăm ti kon pơlei Miđian lăm tơpơh sơnăm.

²Lu bơngai Miđian blah lu bơngai Isơrael jei lu sư; yua kơ lu bơngai Isơrael hli kơ lu bơngai Miđian na lu bơngai Isơrael kơdâu ôn oei tơ kông kŏ, lăm sơlŭng lăm hơgơp tơmo dah chă ôn tơ lăm lu pơlei kơjăp.

³Mưh lu bơngai Isơrael chă rei adrĕch, kon pơlei Miđian hăm kon pơlei Amalek păng bơngai đơ̆ng gah hơlĕch năm blah bơngai Isơrael.

⁴Lu sư pơm anih linh wă chă pơrăm lu sư, pơrăm đĭ-đăng tơmam sa plei sa truh tơ tơring Gasa ưh pă đei lê̆ minh tơmam sa kiơ kơ lu bơngai Isơrael, mă triu, rơmo dah aseh iĕ.

⁵Yua kơ bơngai hăm sem dơrong lu sư truh pơm anih lơ tơpă thoi lep tung-nut. Ưh pă kĕ jô̆ kon bơngai hăm lu aseh lăk-đa lơ dêh tơpă truh tơ dêh noh lu sư wă blah pơrăm đĭ.

⁶Yua kơ kon pơlei Miđian na lu bơngai Isơrael pơmat-tat pơngot rơwĕt dêh tơpă. Na lu bơngai Isơrael nhơ̆m krao apinh Kră Yang tơgŭm.

⁷Lăp lu bơngai Isơrael krao apinh Kră Yang, yua kơ lu bơngai Miđian,

⁸na Kră Yang wơh minh 'nu bơngai khan lê̆ adrol năm tơ kon pơlei Isơrael. Sư khan thoi âu. Kră Yang 'Bok Kei-Dei Isơrael khan: Inh dŏng pơklaih chông ba lu iĕm lĕch hlôi đơ̆ng dêh Êyiptơ boih, pơklaih iĕm đơ̆ng pơm đĭch.

⁹Inh dŏng pơklaih lu iĕm đơ̆ng ti lu bơngai Êyiptơ păng klaih iĕm đơ̆ng lu bơngai pơjuă pơđep lu iĕm; Inh pơpuh lê̆ lu sư weh ataih đơ̆ng lu iĕm; păng ăn boih kơ lu iĕm iŏk dêh char lu sư.

¹⁰Inh đei khan kơ lu iĕm: Inh boih Kră Yang 'Bok Kei-Dei lu iĕm; 'nĕ kơ drap kơkuh kơ lu yang kon pơlei Amôrit lăm dêh char mă lu iĕm oei. Mă-lei lu iĕm ưh kơ đei wă mơ̆ng kiơ̆ nơ̆r Inh!

¹¹Linh jang 'lơ̆ng Kră Yang năm ngôi tơ ala yơ̆p 'long kôih tơ pơlei Ôphra, lăm dêh char Jôas, adrĕch bơngai Abierit kơplah noh Giđêôn kon drŏ-nglo Jôas, oei pơjuă ba tơ anih đe hơmet đak hơmu wă ôn kơ lu bơngai Miđian.

¹²Linh jang 'lơ̆ng Kră Yang tơ'bôh kơ sư na khan: Ơ bơngai nuih kơtang, Kră Yang oei hơdai ih!

¹³Giđêôn tơl: Ơ Yŏng tơ'ngla, tơdah Kră Yang oei hơdai lu nhôn, liơ lu nhôn mă đei tơdrong truh thoi âu? Lu tơdrong hlĭch chrơp mă 'bok lu nhôn đei roi khan kơ nhôn kơtơ̆ng tơ yơ? Lu sư khan: Hăm trŏ kơ Kră Yang chông ba lu bơ̆n lĕch đơ̆ng dêh Êyiptơ? Mă-lei dang ei Kră Yang achăng lê̆ lu nhôn, na pơjao lu nhôn lăm ti bơngai Miđian.

¹⁴Kră Yang wih lăng tơ sư păng khan: Năm bĕ yua hăm jơhngơ̆m pran kơtang ih đei boih năm dŏng pơklaih lu bơngai Isơrael đơ̆ng ti kon pơlei Miđian. Hăm trŏ Inh oei wơh ih năm dah ưh?

¹⁵Giđêôn tơl: Mă-lei Ơ Kră Yang, liơ inh gơh dong pơklaih bơngai Isơrael? Adrĕch adrung nhôn iĕ đĕch lăm adrĕch Manase; na lăm adrĕch Inh âu boih bơngai iĕ hloh.

¹⁶Kră Yang khan kơ sư: Inh gô oei hơdai ih, na ih gô blah kon pơlei Miđian jei ih thoi ih blah minh 'nu bơngai.

¹⁷Giđêôn khan: Tơdah Kră Yang mơnat kơ inh dang ei, apinh tơ'bôh ăn kơ inh minh tơdrong tơdra wă kơ inh băt tơpă Ih đei khan boih kơ inh?

¹⁸Inh apinh Ih 'nĕ kơ weh đơ̆ng âu dĭng truh tơ inh wih brŏk tơ Ih, chĕp ba tơmam soi, pơyơ̆r ăn kơ Ih, Kră Yang khan: Inh gô oei tơ âu dĭng truh ih wih brŏk tơ âu dơ̆ng.

¹⁹Giđêôn sư mơ̆t lăm bơsŭn sư hơmet 'nhĕm rôp minh pơm kon bơbe păng iŏk minh Ephata tơpŭng hĕch pơm 'bĕng ưh kơ đei 'buih pông. Sư tah 'nhĕm lăm bai, tuh đak 'nhĕm lăm gŏ na chĕp tơmam pơyơ̆r ei ăn kơ Kră Yang tơ ala yơ̆p 'long kôih

²⁰Linh jang 'lơ̆ng Kră Yang 'Bok Kei-Dei khan kơ sư: Iŏk bĕ 'nhĕm păng 'bĕng ưh kơ đei 'buih pông lê̆ 'bơ̆t kơpal tơmo âu, na tuh đak 'nhĕm tơ kơpal tơmam noh. Giđêôn pơm hloi thoi noh.

²¹Linh jang Kră Yang yơ̆r iŏk chĕp 'long jra sư dan tôt tơmam soi, tơ 'nhĕm păng tơ 'bĕng ưh kơ đei 'buih pông, đei ŭnh lĕch đơ̆ng tơmo, sa lê̆ 'nhĕm păng 'bĕng ưh kơ đei 'buih pông. Na linh jang 'lơ̆ng Kră Yang kư̆m weh 'biao pă 'bôh đơ̆ng.b

²²Giđêôn sư băt tơpă kơ noh linh jang 'lơ̆ng Kră Yang na Giđêôn khan: Ơ, Kră Yang mă Mơsêh Mơyang. Băt inh lôch Yua kơ inh 'bôh boih linh jang 'lơ̆ng Kră Yang tơm măt inh!

²³Mă-lei Kră Yang khan: 'Nĕ kơ hli, chơ̆n jơhngơ̆m bĕ; ih ưh kơ lôch ôh.

²⁴Giđêôn pơm minh pơm chơnang soi kơ Kră Yang tơ noh. Păng anăn anih noh Kră Yang Ăn Hiôk-Hian. Chơnang noh oei đei truh tơ năr 'nâu tơ pơlei Ôphra, lăm dêh lu bơngai Abierit.

²⁵Kŭm lăm măng noh, Kră Yang khan kơ Giđêôn: Rôp iŏk bĕ kon rơmo dăm 'bă ih păng rôp minh pôm kon rơmo dăm mă 'bar đei tơpơh sơnăm; na pơrăm lê̆ bĕ chơnang soi kơkuh kơ yang Baal. Păng kăl kơ tơpăk lê̆ bĕ gơ̆ng rup yang Asêra 'bơ̆t cheng chơnang soi noh.

²⁶Đơ̆ng noh ih athei man minh pơm chơnang soi kơ Kră Yang 'Bok Kei-Dei ih, tơ kơpal tơmo 'nâu kiơ̆ thoi đei pơkă boih. Đơ̆ng noh rôp bĕ kon rơmo dăm mă 'bar, pơm tơmam soi 'buh pơyơ̆r. Iŏk 'long gơ̆ng Sêra noh pơm ŭnh 'buh tơmam soi.

²⁷Na Giđêôn rơih iŏk mơjĭt 'nu bơngai lăm lu đĭch đam sư tơgŭm sư wă pơm kiơ̆ thoi nơ̆r Kră Yang đei pơkă! Yua kơ sư hli kơ 'bă sư păng lu bơngai oei lăm pơlei 'bôh, na sư ưh kơ pơ̆n pơm tơdrong ei kơ'năr, sư pơm kiơ̆ kê̆ kơmăng.

²⁸Pơgê hrôih, wă lu kon pơlei iung đơ̆ng tep, 'bôh chơnang soi kơkuh kơ yang Baal pơchah păk hăm gơ̆ng rup yang Asêra gah cheng đe kăl tơpăk boih păng 'bôh kon rơmo dăm mă 'bar đe pơyơ̆r boih tơ chơnang soi mă 'nao pơm noh,

²⁹lu sư apinh dih băl khan: Bu pơm tơdrong 'nâu? Đang kơ lu sư apinh păng chă hơlen, khan đei bơngai roi kơ lu sư: Giđêôn kon drŏ-nglo Jôas pơm tơdrong noh.

³⁰Lu kon pơlei pơla khan kơ Jôas: Ăn kon ih lĕch, sư gô lôch yua kơ sư pơrăm chơnang soi kơkuh kơ yang Baal păng kăl tơpăk lê̆ gơ̆ng rup yang Asêra cheng noh hai.

³¹Mă-lei Jôas tơl tơwih kơ lu bơngai wă pơm kơnê̆ hăm sư: Lu iĕm wă blah dŏng yang Baal hă? Lu iĕm wă dŏng sư dah kiơ? Bơngai bu wă blah dŏng sư gô lôch pơgê 'nâu. Dah Baal yang tơpă, lê̆ kơ sư năm tơblah kơdih bĕ, yua kơ chơnang soi sư đe pơrăm boih to.

³²Thoi noh lăm năr noh đe krao Giđêôn Jêrup Baal, yua kơ đêl khan, thôi lê̆ kơ yang Baal tơblah hăm 'bok noh. Yua kơ Giđêôn đei pơrăm boih chơnang soi sư!

³³Đĭ-đăng lu kon pơlei Miđian, kon pơlei Amalek păng lu bơngai đơ̆ng tơring gah hơlĕch pơgơ̆p băl hơdai, năm tŏk tơ pah to kơ đak Krong Jôrđăn, pơm bơsŭn oei tơ thŭng Jêsreel.

³⁴Yang Bơhngol 'lơ̆ng Kră Yang truh oei hơdai Giđêôn; sư hlôm keng krao lu bơngai Abierit akŭm băl kiơ̆ sư.

³⁵Sư wơh lu bơngai năm roi tơbăt tơ jơ̆p-jang kơ bơngai Manase, akŭm pơpôi băl năm kiơ̆ sư. Sư kư̆m wơh dơ̆ng bơngai năm roi tơbăt Aser, Sebulun păng bơngai Naptali, na lu đe noh kư̆m năm hơdai pơm jơhngơ̆m hăm lu đe Giđêôn.

³⁶Giđêôn pơma dơnuh hăm Kră Yang 'Bok Kei-Dei: Tơdah Ih wă yua inh dŏng pơklaih lu bơngai Isơrael, thoi nơ̆r Ih đei khan boih,

³⁷na 'nâu inh gô lê̆ akar sŏk triu tơ anih đe pơjuă 'ba; tơdah tŭk jur kơpal sŏk triu đĕch mă-lei tơ teh oei hrĕng kro, noh lei na inh gô băt kơnăl kơ Ih wă yua inh dŏng pơklaih lu bơngai Isơrael thoi Ih đei pơkă boih.

³⁸Tơdrong noh đei truh tơpă thoi noh; truh pơgê đơ̆ng rŏng Giđêôn iung đơ̆ng hrôih iŏk wĕnh akar sŏk triu, đơ̆ng tŭk jur na đei đak 'bĕnh kơ pơnhan.

³⁹Giđêôn pơma dơnuh dơ̆ng hăm Kră Yang 'Bok Kei-Dei: Apinh ih 'nĕ kơ hil mĭl kơ inh; ăn kơ inh pơma hăm Ih hơya pă minh wơ̆t đơ̆ng; ăn kơ inh pơlong lăng hăm akar sŏk triu pă minh wơ̆t đơ̆ng. Apinh Ih ăn kơ akar sŏk triu hrĕng kro, mă-lei lê̆ tŭk ngom jur gom jơ̆p kơ teh.

⁴⁰Lăm măng noh, Kră Yang 'Bok Kei-Dei pơm thoi noh. Minh drô̆ akar sŏk triu đĕch oei hrĕng kro, mă-lei teh tăp dăr đei tŭk đak ngom gom hơ-ih ngăl.