Read bahnar Lu 7 Bible Online

Lu 7 - bahnar bible

Lu 7

¹Lăp năr đơ̆ng rŏng, Jêrup Baal,a păng đĭ-đăng kon pơlei kiơ̆ sư iung đơ̆ng hrôih năm pơm bơsŭn oei pơdơh tơ tu đak Harôt lu bơngai Miđian pơm bơsŭn oei pơdơh tơ lăm thŭng gah yă-nơ̆m kơ lu sư jê̆ jơ̆ng groi Môre.

²Kră Yang khan kơ Giđêôn: Lu bơngai kiơ̆ ih lơ dêh, dah Inh jao kon pơlei Miđian lăm ti lu sư; lei kơnh hli kơ bơngai Isơrael pơang khan: Nhôn kĕ jei đơ̆ng nhôn kơdih.

³Thoi noh lei na ih roi bĕ kơ kon pơlei pơla khan: Bơngai bu hli tơtăm weh bĕ đơ̆ng kông Gileat na wih bĕ tơ hnam. Thoi noh đei 'bar-jĭt 'bar-rơbâu 'nu bơngai wih brŏk oei pă mơjĭt-rơbâu 'nu bơngai.

⁴Kră Yang khan kơ Giđêôn: “Kon pơlei kư̆m oei lơ dêh. Chông ba lu sư jur nhă tơ đak glung; Inh wă pơlong lăng lu sư tơ anih noh. Dah bơngai bu Inh gô khan; ‘Bơngai âu sư gô năm hơdai ih,’ na sư gô kiơ̆ ih; mă-lei bơngai bu Inh khan: ‘Bơngai 'nâu sư ưh kơ gơh năm hăm ih’ na bơngai noh sư ưh kơ gơh năm.”

⁵Thoi noh, Giđêôn chông ba kon pơlei jur nhă đak. Na Kră Yang khan kơ Giđêôn: Dah bơngai bu jur nhă liah păng hơpiĕt thoi kŏ, na lu bơngai noh ih lê̆ sư minh pah pha, bĕ lu bơngai bu jur nhă mă chhŏng đak hăm tơpang ti ih lê̆ lu sư pha.

⁶Đei lăp pêng-hrĕng 'nu bơngai, kŭp nhă chhŏng păng tơpang ti. Na dôm 'nu bơngai noh tă kơ nhă pơtăm kŭl-tăng ngăl.

⁷Kră Yang khan dơ̆ng kơ Giđêôn: Inh gô yua pêng-hrĕng 'nu bơngai mă nhă chhŏng hăm tơpang ti noh wă dŏng pơklaih lu iĕm, Inh wă jao kon pơlei Miđian lăm tơpang ti lu iĕm. Lu kon pơlei nai, ăn kơ lu sư brŏk tơ hnam.

⁸Giđêôn ăn kơ lu bơngai Isơrael noh brŏk tơ anih bơsŭn lu sư kơdih. Mă-lei Giđêôn gơ̆t iŏk pêng-hrĕng 'nu bơngai đĕch; na lu sư iŏk tơmam sa păng tơgiĕp đơ̆ng ti lu kon pơlei mă brŏk. Na kơđông bơngai Miđian oei pơdơh tơ lăm thŭng gah ala.

⁹Lăm măng noh Kră Yang khan kơ Giđêôn: Iung bĕ, năm jur blah bơngai Miđian, yua kơ Inh jao boih kon pơlei noh kơ iĕm.

¹⁰Mă-lei tơdah ih hli kơ tơblah athei chông ba Phura đĭch đam ih kư̆m jur năm tơ noh.

¹¹Ih mơ̆ng lu sư pơma, na đei jơhngơ̆m nuih jur blah iŏk kơ kơđông lu sư. Thoi noh Giđêôn hăm Phura đĭch đam sư, năm jê̆ anih linh gak kơđông.

¹²Tơ noh kon pơlei Miđian, kon pơlei Amalek păng đĭ-đăng bơngai đơ̆ng gah hơlĕch nai oei tơ lăm thŭng lơlang lơlap nhen thoi lep tung-nut, lu aseh lăk-đa lu sư lơ ưh, kơ kĕ kơ jơ̆ nhen thoi pơlao chuơh tơter đak dơsĭ.

¹³Kơplah Giđêôn truh, đei kơtơ̆ng minh 'nu bơngai roi kơ buăl sư khan: Măng 'nâu inh tep đei apo 'bôh minh pôm 'bĕng 'ba tơ'bâu apôm huŏng grŏl lăm kơđông linh Miđian. 'Bĕng noh hơtŭt 'bơm tơ minh pơm bơsŭn na bơsŭn noh păk hloi, păk plơ̆ bơbŭng tơ ala, na bơsŭn noh pơchah đĭ.

¹⁴Buăl sư mơ̆ng hloi khan, tơpă noh đao gưm Giđêôn, kon drŏ-nglo Jôas, bơngai Isơrael. Kră Yang 'Bok Kei-Dei pơjao boih bơngai Miđian păng đĭ-đăng lu linh lăm kơđông tơ lăm tơpang ti sư.

¹⁵Lăp Giđêôn kơtơ̆ng roi kơ tơdrong apo păng kơtơ̆ng nơ̆r tơlang kơ tơdrong apo noh, na sư drap kơkuh kơ Kră Yang 'Bok Kei-Dei. Na sư wih brŏk tơ kơđông linh bơngai Isơrael păng khan: Iung bĕ, yua kơ Kră Yang pơjao boih linh bơngai Miđian lăm ti lu iĕm!

¹⁶Sư klah asong pêng-hrĕng 'nu bơngai noh pơm pêng khŭl, sư asong ăn kơ rim 'nu bơngai linh chĕp tơgiĕp păng bơ̆i hoh lăm noh tah minh hơchô̆ hơpaih wă tơ̆k.

¹⁷Na Giđêôn pơkă khan: Iĕm lăng tơ inh, Inh pơm kiơ iĕm pơm kiơ̆ thoi inh; mưh inh năm tơ jê̆ kơđông ayăt, inh pơm thoi yơ lu iĕm pơm kiơ̆ thoi noh.

¹⁸Mưh inh păng lu bơngai kiơ̆ inh hlôm tơgiĕp, lu iĕm kư̆m hlôm tơgiĕp tơ tăp dăr kơđông Miđian păng jreo: Yua Kơ Kră Yang păng yua Kơ Giđêôn!

¹⁹Giđêôn păng minh-hrĕng 'nu bơngai kiơ̆ sư năm truh tơ anih linh gak kơđông; kơplah lu sư 'nao tơplih băl gak mă 'bar kơmăng. Lu sư hlôm tơgiĕp păng teh pơchah bơ̆i mă lu sư chĕp tơ ti.

²⁰Pêng khŭl linh noh hlôm tơgiĕp păng teh pơchah bơ̆i tah ŭnh; ti gah 'ngiĕo lu sư yơ̆r chĕp ŭnh, ti gah 'ma lu sư chĕp tơgiĕp hlôm; na lu sư jreo khan: Toh đao bĕ. Yua kơ Kră Yang păng yua kơ Giđêôn!

²¹Lu sư dơ̆ng jum dăr kơ kơđông linh, bu 'bơ̆t yơ dơ̆ng 'bơ̆t ei. Na đĭ-đăng lu linh lăm kơđông Miđian kơdâu, lu sư ôr păng kơdâu ôn đĭ.

²²Kơplah lu sư hlôm pêng-hrĕng tŏ tơgiĕp, Kră Yang pơm lu linh Miđian iŏk đao gưm 'bet pơlôch băl tơduă. Păng đĭ-đăng khŭl linh pơlôch băl tơduă Khŭl linh kơdâu ôn hlôi truh tơ pơlei Bet Sita tơklă char Sêrêra, păng truh tơ hơdral pơlei Abel Mêhôla jê̆ pơlei Tabat.

²³Lu bơngai Isơrael đơ̆ng adrĕch bơngai Naptali, Aser păng Manase pơpôi băl na druh 'moi pơlôch bơngai Miđian.

²⁴Giđêôn wơh bơngai năm tơ jơ̆p kơ groi kông Êphraim, na krao: Jur năm blah kon pơlei Miđian blah iŏk trong tơnŏk đơng lu sư juăt tŏk kơ đak Krong Jôrđăn, blah truh tơ pơlei Bêt Bara păng iŏk rok jih đak Krong Jôrđăn. Thoi noh lu bơngai drŏ-nglo Êphraim năm. Lu sư blah iŏk trong đơ̆ng tŏk kơ đak krong Jôrđăn dĭng truh tơ pơlei Bêt Bara păng iŏk rok jih đak Krong Jôrđăn.

²⁵Lu sư đei rôp 'bar 'nu yŏng pơgơ̆r linh kon pơlei Miđian anăn bre sư Ôrep păng Sêep; lu sư pơlôch Ôrep tơ kơpal tơmo Ôrep păng lu sư pơlôch Sêep tơ anih đe hmĕt đak plei hơmu Sêep. Lu sư oei druh 'moi kon pơlei Miđian, păng lu sư chĕp ba kơ̆l Ôrep păng kơ̆l Sêep ăn kơ Giđêôn oei tơ paih to ter jih đak Krong Jôrđăn.