Read bahnar II Yo 1 Bible Online

II Yo 1 - bahnar bible

II Yo 1

¹Inh kră wei-lăng bơngai lui chih hơpong kơ iĕm 'nhŏng oh. Yua kơ 'Bok Kei-Dei rơih iŏk iĕm na inh 'mêm kơ iĕm tơpă. Bơ̆n jing 'nhŏng oh bơngai lui. Mă-lei ưh kơ sĭ kơdrô̆ inh ôh 'mêm kơ iĕm, dôm lu bơngai băt tơdrong 'Bok Kei-Dei tơpă sư kư̆m 'mêm kơ iĕm mơ̆n.

²Đĭ-đăng kơ bơ̆n 'mêm mơnat dih băl kơlih kơ bơ̆n kiơ̆ tơdrong 'Bok Kei-Dei tơpă; păng bơ̆n gô kiơ̆ tơdrong Sư khŏm khŏm.

³'Bă tơm bơ̆n 'Bok Kei-Dei păng Kon Sư Yêsu Krist gô 'mêm mơnat kơ bơ̆n, wei-lăng bơ̆n tôm tơdrong păng ăn kơ bơ̆n hiôk-hian ling-lang yua kơ bơ̆n lui kơ Sư mă trŏ păng bơ̆n băt 'mêm kơ Sư.

⁴Inh hiôk chơt tơpă kơlih kơ inh kơtơ̆ng lu iĕm mơ'nah kiơ̆ tơdrong 'Bă tơm bơ̆n 'Bok Kei-Dei tơpă, noh thoi 'Bok Kei-Dei pơkă kơ bơ̆n sơ̆.

⁵Na inh wă apinh athei iĕm băt pơm thoi âu: Bơ̆n athei adrin tơpă gah tơdrong 'mêm mơnat dih băl. Tơdrong pơkă noh ưh kơ sĭ tơdrong pơkă 'nao ôh. Bơ̆n đei tơdrong pơkă noh đơ̆ng tơm hmơm sơ̆ boih.

⁶Dah bơ̆n băt tơpă tơdrong 'mêm mơnat dih băl păng 'mêm kơ 'Bok Kei-Dei, lei bơ̆n athei răk dôm tơdrong Sư pơkă. Tơdrong pơkă noh hei iĕm kơtơ̆ng đơ̆ng tơm hmơm sơ̆ boih thoi âu: Bơ̆n athei 'mêm kơ 'Bok Kei-Dei păng bôl buăl mơ̆n.

⁷Dang ei đei lơ bơngai năm bơtho jơ̆p-jang chă hơlĕnh kơ đe, lu sư khan Yêsu Krist ưh kơ jing kon bơngai tơpă ôh sơ̆. Bơngai bu bơtho thoi noh, bơngai 'noh sư hơlĕnh đĕch păng sư ayăt kơ Yêsu Krist mơ̆n.

⁸Kơlih kơ thoi noh na iĕm athei kơchăng hŏ hli kơ lu sư hơlĕnh kơ iĕm, na iĕm lui kơ lu sư. Dah iĕm kơchăng tơpă lei dôm tơdrong iĕm jang iĕm huay kơ hiong ôh. Na iĕm gô đei iŏk tôm tơdrong apah ning-mônh.

⁹Bơngai bu khan sư băt hloh kơ bơ̆n mă sư ưh kơ wă kiơ̆ thoi Yêsu Krist bơtho, bơngai 'noh 'Bok Kei-Dei ưh kơ oei hơdai păng sư ôh. Dah bơngai bu oei kiơ̆ dôm tơdrong Yêsu Krist bơtho, bơngai 'noh 'Bă tơm bơ̆n 'Bok Kei-Dei păng Kon Sư Yêsu Krist oei hơdai păng sư.

¹⁰Bơngai bu năm ngôi hơpong tơ iĕm, na sư bơtho iĕm ưh kơ trŏ thoi Yêsu Krist bơtho, bơngai 'noh iĕm 'nĕ kơ sơng iŏk sư mơ̆t tơ hnam iĕm. Păng lăp sư wă brŏk iĕm 'nĕ khan kơ sư khan: Yak mă 'lơ̆ng kơ ih.

¹¹Dah bơngai bu khan kơ sư khan: Yak mă 'lơ̆ng kơ ih, bơngai 'noh dang tơgŭm sư pơm dôm tơdrong kơnê̆.

¹²Inh đei lơ tơdrong nai dơ̆ng wă pơma kơ iĕm, mă-lei inh ưh kơ wă chih pơma kơ iĕm dôm tơdrong noh lăm kơthơ âu ôh. Kơlih kơ ưh pă đunh boih inh wă tơ'bơ̆p iĕm na inh gô bơtho iĕm păng akâu inh kơdih. Thoi noh na bơ̆n chơt hiôk dih băl.

¹³Lu 'nhŏng oh bơngai lui đơ̆ng nhôn mă 'Bok Kei-Dei rơih boih, lu sư kư̆m đei nơ̆r jet gia pơma apơi rơnguơ̆ ră kơ iĕm mơ̆n.