Read bahnar Tob 12 Bible Online

Tob 12 - bahnar bible

Tob 12

¹Klaih kơ noh đei tơdrong tơ plĕnh ti hlĭch tơpă, đei minh 'nu bơngai drŏ-kăn hrŭk ao hơdah dang măt 'năr, tơ jơ̆ng sư đei măt khei. Tơ kơ̆l sư yơ̆l môk đei mơjĭt-'bar tŏ sơnglŏng.

²Sư jĭ anăp, sư nŏng kơ hmoi kơ jĭ anăp sư chang dah tơpŭ ră.

³Na tơ plĕnh đei tơdrong nai dơ̆ng mơ̆n kư̆m hlĭch bơ̆n ưh kơ biơh 'bôh. Đei minh pôm yă-grai 'brê tih krưp dêh. Sư đei tơpơh tŏ kơ̆l, mơjĭt tŏ ake păng yơ̆l tơpơh tŏ môk pơtao tơ kơ̆l sư.

⁴Kiĕng sư hor ba lu sơnglŏng đơ̆ng plĕnh huŏng tơ teh minh pah lăm pêng. Klaih kơ noh na sư năm 'bơ̆t anăp bơngai drŏ-kăn mă jĭ anăp wă tơpŭ noh, sư răp gô bơngai noh tơpŭ wă luŏn sa kon nge sư.

⁵Lăp bơngai noh tơpŭ kon drŏ-nglo, na 'Bok Kei-Dei iŏk atŏk hloi kon nge 'noh tơ plĕnh, yua kơ kon nge 'noh ning-mônh Sư gô pơm 'Bok Pơgơ̆r tôm kơ dêh char, chĕp 'long jra mam.

⁶Na bơngai drŏ-kăn ei kơdâu ôn hloi akâu sư tơ anih kueng chơngue, tơ anih mă 'Bok Kei-Dei hơmet lê̆ kơ sư boih. 'Bok Kei-Dei hiĕm 'me sư tơ noh kơplah minh-rơbâu 'bar-hrĕng tơdrâu-jĭt năr.

⁷Đơ̆ng noh na đei tơdrong tơblah tơ plĕnh ti. Mikael pơm kră wei-lăng lu linh jang 'lơ̆ng, sư krao đĭ-đăng lu linh sư tơblah păng linh yă-grai păng akâu yă-grai kơdih hai.

⁸Na jei lu linh Mikael. Yă-grai păng lu linh sư thuơ boih na ưh pă gơh oei tơ plĕnh ti dơ̆ng.

⁹Na đe tơhuŏng sư păng đĭ lu linh sư tơ teh. Prao noh boih 'bih so sơ̆ mă đe anăn yŏng yang sơmăt păng yang Satan. Sư pơhlŭ đe jơ̆p kơ teh đak. Đe blah tơhuŏng sư păng lu linh sư đơ̆ng plĕnh tơ teh.

¹⁰Klaih kơ noh na inh kơtơ̆ng 'bơ̆r pơma re tơ plĕnh ti khan: “Dang ei Kră Yang bơ̆n 'Bok Kei-Dei blah dŏng kon bơngai boih, Sư yua tơdrong mơsêh mơyang Sư blah iŏk kon bơngai đơ̆ng yang Satan pơgơ̆r, na Sư wă pơgơ̆r kơdih. Na Sư kư̆m ăn kơ 'Bok Krist pơgơ̆r mơ̆n, yua kơ yang Satan thuơ huŏng tơ teh boih. Sư boih nŏng kơ pơma 'bơ̆t anăp 'Bok Kei-Dei jô̆ kơ lu buăl bơ̆n khan bơngai yoch bơngai kơnê̆ wă kơ 'Bok Kei-Dei tŭk lu buăl bơ̆n.

¹¹Mă-lei jei lu buăl bơ̆n, yua kơ lu sư gơnang kơ Kon Triu 'Bok Kei-Dei lôch tuh pham tang lu sư, păng lu sư adrin ră roi tơdrong Kon Triu. Lu sư ưh kơ 'mêm kơ akâu ôh, lôch bưh arih bưh.

¹²Thoi noh na ơ lu mă oei tơ plĕnh, gah lu iĕm hiôk boih, mă-lei mơnat kơ lu đe mă oei tơ teh păng oei tơ đak dơsĭ, yua kơ yang Satan huŏng tơ teh truh tơ lu sư boih. Satan jơhngơ̆m sư kơnê̆ 'maih hil 'maih areh kơ đe, yua kơ sư băt kơdih khei 'năr sư tơ teh ưh pă đunh boih.”

¹³Yă-grai ei sư ơh kơ đe blah tơhuŏng sư tơ teh boih, na sư druh sa bơngai drŏ-kăn mă tơpŭ kon nge drŏ-nglo noh hei.

¹⁴Mă-lei 'Bok Kei-Dei ăn kơ bơngai drŏ-kăn ei minh blah ao pơnăr klang tih, wă kơ sư gơh păr jăk tơ anih kueng chơngue, tơ anih mă 'Bok Kei-Dei gô hiĕm 'me sư kơplah pêng sơnăm minh puăt. Na yă-grai ei sư tôch đon ưh kơ gơh pơm kiơ kơ sư.

¹⁵Na yă-grai ei sư pruh tơlĕch đak đơ̆ng 'bơ̆r sư jing đak krong tih druh đơ̆ng rŏng bơngai drŏ-kăn ei wă kơ đak krong noh pơhoch sư ră.

¹⁶Mă-lei đei teh sa đak tơgŭm bơngai drŏ-kăn ei, teh ei ha 'bơ̆r luŏn sa pơđĭ đak krong mă đêl yă-grai pruh noh.

¹⁷Thoi noh na yă-grai ei sư ơh kơ druh sa bơngai drŏ-kăn ei ưh kơ đei, na sư năm blah lu kon sâu bơngai drŏ-kăn ei, wă khan lu bơngai lui kiơ̆ nơ̆r 'Bok Kei-Dei pơkă păng lu bơngai ră roi tơdrong Yêsu.

¹⁸Na yă-grai ei dơ̆ng 'bơ̆t pơlao chuơh tơ jih đak dơsĭ.