Read bahnar Tob 15 Bible Online

Tob 15 - bahnar bible

Tob 15

¹Đơ̆ng noh inh đei 'bôh tơdrong tơ kơpal plĕnh ti hlĭch dêh. Đei tơpơh 'nu linh jang 'lơ̆ng, lu sư wă iŏk tơpơh pơnhan đak pơgang wă pơmat lu bơngai ưh kơ lui. Tơpơh pơnhan đak pơgang noh gô đei tơpơh 'măng pơmat. Tơpơh 'măng đei tơdrong pơmat noh 'Bok Kei-Dei ăn pơmat pơhrăp kon bơngai lu mă Sư hil. Klaih kơ noh Sư huay pă hil dơ̆ng boih.

²Inh kư̆m 'bôh tơdrong hlĭch thoi đak dơsĭ hlăng chơchơr thoi getchai thoi amĭl, mă kư̆m lăng thoi đei ŭnh mơ̆n. Na lu bơngai mă ưh kơ chu kơkuh kơ rup sem, akâu sem ei păng ưh kơ ăn sem ei chơ̆m đŏng yâu tơ klĕng sư păng kuă kơ iŏk dôm tơmam sem ei, kơsô̆ sư dah anăn sư, jei lu bơngai noh boih. Na đĭ-đăng lu bơngai noh lu sư dơ̆ng kơpal đak dơsĭ ei. Lu sư iŏk brŏ 'Bok Kei-Dei,

³hơri tơdrong Môis đam 'Bok Kei-Dei sư bơnê kơ 'Bok Kei-Dei ăn jei sư sơ̆; păng hơri tơdrong Kon Triu mơ̆n. Tơdrong lu sư hơri ei thoi âu: “Ơ 'Bok Kei-Dei Kră Yang Tih Hloh, tôm tơdrong Ih pơm mơsêh mơyang tih-tin ngăl. Ơ 'Bok Pơtao mă pơgơ̆r ling-lang, tôm tơdrong Ih pơm tă ling tơpăt ngăl.

⁴Ơ Kră Yang, đĭ-đăng bơngai băt hli kơ Ih, păng ư-ang anăn Ih, yua kơ pôm Ih đĕch pơm 'lơ̆ng tơpăt. Đĭ rim khŭl bơngai băt năm kơkuh 'bơ̆t anăp Ih, yua kơ Ih sek tơlang tơpăt ngăl.”

⁵Đơ̆ng noh inh lăng dơ̆ng tơ kơpal plĕnh na 'bôh hnam 'Bok Kei-Dei oei thoi hnam akŭm lu bơngai Isơrael pơm păng tua-la-tăng tơ dêh char glă sơ̆, hnam ei 'măng tơpơih.

⁶Na tơpơh 'nu lu linh jang mă wă iŏk tơpơh pơnhan đak pơgang wă pơmat đe ei, lu sư lĕch đơ̆ng hnam 'Bok Kei-Dei noh tă hrŭk ao tai kok rơgoh ngăl păng chô̆ gơ'năm maih tơ kơtơh lu sư.

⁷Klaih kơ noh đei minh 'nu lăm puăn anăn sem brem mă ư-ang anăn 'Bok Kei-Dei, sư iŏk ăn kơ tơpơh 'nu lu linh jang 'lơ̆ng tơpơh tŏ pơnhan 'bĕnh kơ tơdrong 'Bok Kei-Dei mă arih ling-lang hil areh kơ kon bơngai, Sư wă phak pơhrăp tơdrong Sư hil areh noh.

⁸Kơplah lu linh jang 'lơ̆ng tuh đak pơgang đơ̆ng pơnhan lu sư ei tơ teh, tơ lăm hnam 'Bok Kei-Dei 'bĕnh-'bang kơ 'nhui. 'Nhui noh wă tơbăt ăn kơ kon bơngai, mơsêh 'Bok Kei-Dei pơm ưh kơ đei bu gơh mơ̆t, mă đơ̆ng năr lu sư iŏk tơpơh tŏ pơnhan ei truh tuh đĭ.