Read bahnar Tob 19 Bible Online

Tob 19 - bahnar bible

Tob 19

¹Đơ̆ng noh inh kơtơ̆ng tơ plĕnh ti thoi lĕ kơ 'bơ̆r bơngai tơpôl lơ pơma 'bơ̆r re khan: “Halêluya, ư-ang kơ 'Bok Kei-Dei dŏng pơklaih kon bơngai. Sư mơsêh mơyang tih-tin tơpă.

²Sư sek tơlang trŏ tơpă. Sư phak boih bơngai đi mă pơm jơ̆p kơ teh đak jing kơnê̆ 'mê̆-'mach, yua kơ tơdrong sư pơm kư̆ kă păng yua kơ sư pơlôch lu đĭch đam 'Bok Kei-Dei.”

³Lu bơngai tơpôl ei pơma 'bơ̆r re pă 'măng dơ̆ng: “Halêluya, ư-ang kơ 'Bok Kei-Dei yua kơ 'nhui ŭnh đơ̆ng sa Pơlei Babilôn ei tŏk khŏm khŏm hoh-hoy kơ păt.”

⁴Na 'bar-jĭt puăn 'nu lu đe kră, hăm puăn anăn lu kon sem brem ei lu sư 'nap 'bơ̆t anăp 'Bok Kei-Dei oei tơ tang-dŏ sư kơkuh khan: “A-men trŏ boih tơdrong iĕm khan Halêluya ư-ang kơ 'Bok Kei-Dei noh.”

⁵Đơ̆ng noh inh kơtơ̆ng 'bơ̆r pơma lĕch đơ̆ng tang-dŏ 'Bok Kei-Dei khan: “Ơ lu đĭch đam 'Bok Kei-Dei, lu bơngai lui yom kơ Sư, lu bơngai pơm tih pơm iĕ, bĕ bơ̆n kơkuh ư-ang kơ 'Bok Kei-Dei Kră Yang bơ̆n.”

⁶Đơ̆ng noh inh kơtơ̆ng 'bơ̆r bơngai tơpôl pơma jơwa thoi đak chơkơi, thoi grơ̆m glaih thoi âu: “Halêluya, ư-ang kơ 'Bok Kei-Dei Kră Yang Tih Hloh. Sư wă pơgơ̆r tôm tơdrong ngăl boih.

⁷Bĕ bơ̆n hiôk chơt, bĕ bơ̆n 'nă hal, ư-ang anăn 'Bok Kei-Dei yua kơ trŏ năr Kon Sư Kon Triu wă iŏk akăn. Akăn Sư kư̆m hơmet tôm tơdrong đang boih.

⁸'Bok Kei-Dei ăn kơ akăn Sư hrŭk ao che 'bui kok hơdah rang dêh.” Ao che 'bui kok hơdah rang noh wă pơtih gia kơ lu kon 'Bok Kei-Dei jing bơngai 'lơ̆ng tơpăt boih.

⁹Na linh jang khan kơ inh thoi âu: “Ih chih răk tơdrong âu hŏ: Lu bơngai mă 'Bok Kei-Dei krao sŏng sa hơpong kơ Kon Triu iŏk akăn, lu sư hiôk dêh.” Na sư khan dơ̆ng kơ inh thoi âu: “Tơdrong mă inh 'nao khan kơ ih âu hei, ưh kơ trŏ tơdrong inh kơdih ôh, tơdrong 'Bok Kei-Dei tơpă.”

¹⁰Na inh kơkuh 'nap hloi 'bơ̆t jơ̆ng sư, mă-lei sư khan: “Ih 'nĕ kơkuh kơ inh, yua kơ inh kư̆m đĭch đam 'Bok Kei-Dei thoi ih, thoi lu bôl buăl ih ră roi tơdrong Yêsu. Ih kơkuh kơ 'Bok Kei-Dei đĕch trŏ, yua kơ đĭ-đăng lu bơ̆n tă kơ ră roi tơdrong Yêsu thoi lu bơngai pơtruh nơ̆r 'Bok Kei-Dei sơ̆.”

¹¹Inh kư̆m 'bôh plĕnh tơpơih păng 'bôh hloi aseh kok tơ noh. 'Bok mă oei hao aseh ei đe anăn Sư 'Bok 'Lơ̆ng Tơpăt. Tơdrong Sư sek tơlang đe kư̆m tơpăt, mă Sư blah rôp lu bơngai ayăt kơ Sư kư̆m kiơ̆ tơdrong tơpăt.

¹²Măt Sư thoi pla ŭnh, Sư yơ̆l môk pơtao lơlap. Păng đei chih anăn tơ akâu Sư, mă-lei ưh kơ đei bu băt kơ anăn Sư noh, pôm Sư kơdih đĕch băt.

¹³Ao Sư hrŭk 'brông 'brang kơ pham ngăl. Đe anăn Sư Nơ̆r Pơma 'Bok Kei-Dei.

¹⁴Đĭ-đăng kơ linh kơpal plĕnh ti hrŭk ao kok rơgoh, tă kơ hao aseh kok kiơ̆ Sư ngăl.

¹⁵Minh hlak đao han đei 'bar pah măt lĕch đơ̆ng 'bơ̆r 'Bok ei wă koh chong drong tơ'lĕnh kon bơngai jơ̆p kơ dêh char, klaih kơ noh Sư gô pơgơ̆r đe hăm 'long jra mam. Lu bơngai mă ưh kơ lui, Sư gô phak thoi đe peh plei hơmu tơ lăm tơpăl tơmo wă chơpĕt iŏk đak, noh tơdrong 'Bok Kei-Dei Kră Yang Tih Hloh Sư hil kơ kon bơngai.

¹⁶Đe chih tơ ao tai Sư mă 'bơ̆t jơ̆ng thoi âu: “Sư pơm 'Bok Pơtao, Sư tih hloh kơ đĭ-đăng lu pơtao nai. Sư pơm Yŏng, Sư tih hloh kơ đĭ-đăng lu yŏng nai.”

¹⁷Đơ̆ng noh inh 'bôh minh 'nu linh jang 'lơ̆ng, sư dơ̆ng tơ măt 'năr krao 'bơ̆r re lu sem păr tơ tŏk-bŏk rơwơ̆ng thoi âu: “Tơ âu bĕ akŭm băl. Pă 'biơ̆ iĕm năm et sa tih tơmam 'Bok Kei-Dei ăn kơ iĕm.

¹⁸Iĕm năm sa đak ôm atâu 'bok pơtao, 'bok tih linh, lu bơngai pran tih, lu aseh păng akâu bơngai mă hao aseh noh; sa đĭ rim khŭl bơngai rơngei, bơngai đĭch, bơngai pơm tih, pơm iĕ.”

¹⁹Na inh 'bôh sem brem mă kơnê̆ ei hăm lu 'bok pơtao đơ̆ng jơ̆p kơ teh đak păng lu linh sư akŭm wă tơblah păng 'Bok mă hao aseh păng lu linh Sư mơ̆n.

²⁰Na gah sem brem mă kơnê̆ ei păng sem brem mă 'bar mă gơh pơm tơdrong hlĭch chrơp, wă kơ kon pơlei pơla lui kơ tơdrong sư pơm noh na chơ̆m đŏng yâu sem brem kơnê̆ tơ klĕng lu bơngai mă kơkuh kơ rup sư noh, gah bre sư 'Bok mă hao aseh păng lu linh Sư blah rôp tơhuŏng hloi bre sư oei arih tơ dơnâu ŭnh.

²¹Na lu linh bre sư lôch đĭ kơ 'Bok mă hao aseh koh chong drong tơ'lĕnh păng đao 'bar pah măt mă lĕch đơ̆ng 'bơ̆r Sư. Klaih kơ noh na ăn kơ lu sem păr jur sa sĕch ôm lu atâu bơngai noh hrăp hreng.