Read bahnar Tob 4 Bible Online

Tob 4 - bahnar bible

Tob 4

¹Đơ̆ng noh inh ngơk lăng tơ plĕnh, inh 'bôh plĕnh tơpơih thoi 'măng. Păng inh kơtơ̆ng dơ̆ng 'bơ̆r 'Bok mă pơma re jơwa dang đe hlôm keng noh hei, Sư pơma dơ̆ng kơ inh dang ei khan: “Apinh ih tŏk tơ âu, Inh wă tơ'bôh kơ ih dôm tơdrong mă gô đei păng gô 'bôh ning-mônh.”

²Na Yang Bơhngol 'Lơ̆ng pơm kơ inh ưh kơ băt thoi yơ, 'bôh 'băi tơ kơpal plĕnh boih. Na inh 'bôh tang-dŏ 'lơ̆ng rŏ tơ plĕnh ei, tang-dŏ ei đei minh 'nu oei.

³'Bok mă oei tơ tang-dŏ ei inh lăng Sư dang tơmo rang mơnhal, tăp dăr kơ tang-dŏ Sư oei ei đei hơdah jơk thoi plĕnh chro.

⁴Tăp dăr kơ tang-dŏ 'Bok Pơtao ei đei 'bar-jĭt puăn tŏ tang-dŏ nai, đei 'bar-jĭt puăn 'nu lu đe kră oei tơ tang-dŏ ei. Lu sư tă hrŭk ao tai kok păng yơ̆l môk maih.

⁵Păng 'bôh kơchêr kơchar kơmlat lĕch đơ̆ng tang-dŏ 'Bok Pơtao mă oei tŏk-bŏk. Păng inh kơtơ̆ng grơ̆m glaih tơdrăng. 'Bơ̆t anăp tang-dŏ 'Bok Pơtao ei, đei tơpơh tŏ ŭnh kơđeng sư khơ̆ng ling-lang. Kơđeng ei wă pơtih gia kơ Yang Bơhngol 'Lơ̆ng Sư. Yang Bơhngol 'Lơ̆ng minh 'nu đĕch, mă-lei dang tơpơh 'nu.

⁶'Bơ̆t anăp tang-dŏ 'Bok Pơtao ei kư̆m đei đak, mă thoi đak dơsĭ hlăng chơchơr thoi getchai thoi amĭl. Tăp dăr kơ tang-dŏ 'Bok Pơtao ei, đei puăn anăn lu sem brem. Lu sư đei klong măt rŏng anăp lơlap.

⁷Sem mă mônh hơbŏ sư thoi dăm-brang, sem mă 'bar hơbŏ sư thoi rơmo, mă pêng muh măt sư thoi bơngai, sem mă puăn hơbŏ sư thoi sem klang păr kơpal plĕnh.

⁸Rim kơ puăn anăn noh đei tơdrâu hlak pơnăr păng đei klong măt rŏng anăp jơ̆p-jang kơ akâu. Lu sư hơri ư-ang 'Bok Kei-Dei măng năr pă pơdơh 'bơ̆r. Tơdrong lu sư hơri ei thoi âu: “Ô 'lơ̆ng tơpă, ô kăl tơpă 'Bok Kei-Dei Kră Yang Tih Hloh. Pôm Ih đĕch 'lơ̆ng tơpăt. Ih đei đơ̆ng sơ̆ khơ̆ dang ei păng Ih gô jur ning-mônh.”

⁹Rim wơ̆t lu sem brem ei hơri ư-ang 'Bok Pơtao mă oei tơ tang-dŏ, 'Bok mă arih ling-lang ưh kơ layơ tôch,

¹⁰na đĭ-đăng 'bar-jĭt puăn 'nu lu đe kră ei 'nap kơkuh kơ 'Bok Pơtao mă oei tơ tang-dŏ, 'Bok mă arih ling-lang ưh kơ layơ tôch ei. Môk maih lu sư 'măn 'bơ̆t anăp tang-dŏ 'Bok Pơtao, na lu sư hơri thoi âu:

¹¹“Ơ 'Bok Kei-Dei Kră Yang, pôm Ih đĕch mơsêh na trŏ kơ nhôn lui yom păng ư-ang kơ Ih tơpă, yua kơ Ih gơh pơjing kơdih lăm tôm tơdrong. Mă tôm tơdrong kiơ yua kơ Ih wă na Ih pơjing hloi.”