Read bahnar Tob 9 Bible Online

Tob 9 - bahnar bible

Tob 9

¹Lăp linh jang 'lơ̆ng mă pơđăm hlôm keng, inh 'bôh minh pôm sơnglŏng đơ̆ng plĕnh đêl huŏng tơ teh. Đe ăn kơ sơnglŏng noh khuă wă pơih 'măng sơlŭng jrŭ.

²Lăp sơnglŏng ei iŏk khuă pơih 'măng sơlŭng jrŭ noh boih, na đei hloi 'nhui tŏk đơ̆ng sơlŭng noh tơ plĕnh kơŭl hyôi thoi đơ̆ng tơnuh ŭnh tih, măt 'năr anê̆ rơwơ̆ng mah glĭp măng mu.

³'Blă 'noh đei lep păr tŏk kiơ̆ 'nhui lĕch đơ̆ng sơlŭng noh năm jơ̆p-jang kơ teh đak. Lep noh gơh sôch thoi aguăt.

⁴Lep noh 'Bok Kei-Dei ưh kơ ăn sư sa 'nhĕt, sa 'ba, dah sa hla 'long ôh. Sư ăn lep noh năm chă sôch kon bơngai mă ưh kơ lui, ưh kơ đei chơ̆m đŏng yâu 'Bok Kei-Dei tơ klĕng sư.

⁵Lep noh 'Bok Kei-Dei ưh kơ ăn sư sôch kon bơngai mah truh lôch ôh, Sư ăn sôch pơmat lu bơngai mă ưh kơ lui lăm pơđăm khei. Lep noh sôch jĭ dang aguăt sôch.

⁶Kơplah năr ei kơnh đĭ-đăng kon bơngai hmăng kơ dah lôch đĕch boih. Lu sư apơi kơ lôch, mă-lei ưh kơ lôch oei arih.

⁷Lep noh mưh sư wă năm blah sôch đe, sư năm đĭ kơ tơpôl pơrĕng, thoi aseh juăt kơ năm tơblah. Tơ kơ̆l lu sư lăng thoi yơ̆l môk maih ngăl, muh măt lu sư thoi muh măt kon bơngai.

⁸Sŏk lu sư thoi sŏk bơngai drŏ-kăn, grĕng lu sư thoi grĕng dăm-brang.

⁹Ao lu sư hrŭk thoi ao mam đe hrŭk; lu sư tơtuh pơnăr jơwa dang aseh lơ dui gre năm tơblah.

¹⁰Kiĕng sư thoi kiĕng aguăt, sơmôch sư sôch đe 'bơ̆t kiĕng. Lu sư năm blah sôch kon bơngai lăm pơđăm khei, pơm kơ kon bơngai jĭ jăn pơmat-tat.

¹¹Lu sư đei yŏng pơgơ̆r kơdih, yŏng lu sư ei jĭ yang pơgơ̆r sơlŭng jrŭ, anăn sư lăm nơ̆r Hêbrơ khan Abadon; tơ̆ng kiơ̆ kơ nơ̆r Grĕk khan Apôliôn wă khan yang chă blah pơrăm đe.

¹²Tơdrong gleh truh mă mônh tôch dôm noh boih, oei pă 'bar tơdrong dơ̆ng.

¹³Klaih kơ noh linh jang mă tơdrâu sư hlôm keng, na inh kơtơ̆ng 'bơ̆r pơma đơ̆ng lăm puăn tŏ ake chăt 'bơ̆t puăn pah mum chơnang soi maih đe 'măn 'bơ̆t anăp 'Bok Kei-Dei noh,

¹⁴sư pơma kơ linh jang mă tơdrâu thoi âu: “Ih năm yaih achăng puăn 'nu yang mă đe chô̆ kron lu sư tơ jih đak krong Êphrat.”

¹⁵Na linh jang mă tơdrâu ei năm yaih achăng hloi puăn 'nu yang mă đe chô̆ kron ei. Puăn 'nu yang ei wă chă pơlôch pơrăm đe. Na tơdrong sư wă pơlôch pơrăm đe noh sư hơmet lê̆ đơ̆ng sơ̆ boih, sư khŏm wă pơlôch pơrăm kon bơngai rim adrĕch adrung truh kơ minh pôm teh đak kơdih lăm pêng tŏ teh đak, dang ei khei âu sơnăm âu hloi.

¹⁶Puăn 'nu yang ei đei linh lơ tơpă tă hao aseh ngăl, đe khan đei 'bar-hrĕng trĭu 'nu.

¹⁷Lăm tơdrong mă tơ'bôh kơ inh noh, inh đei 'bôh lu linh hao aseh ei tă hrŭk ao mam 'brê thoi pla ŭnh, 'nhui ŭnh, tơmo ŭnh dreng. Kơ̆l aseh ei thoi kơ̆l dăm-brang; sư đei pla ŭnh, 'nhui ŭnh păng tơmo ŭnh dreng lĕch 'nhui 'bâu chhok hơ̆-hang, kon bơngai hơ'nơ̆k lôch yua kơ sư pruih tơlĕch đơ̆ng 'bơ̆r sư.

¹⁸Pêng tơdrong sơmôch pơlôch pơrăm kon bơngai noh gơh pơlôch dang minh pah lăm pêng pah teh đak, kon bơngai lôch.

¹⁹Lu aseh ei kư̆m gơh pơlôch pơrăm đe păng kiĕng sư, yua kơ kiĕng sư đei kơ̆l thoi 'bih gơh choh pơlôch kon bơngai.

²⁰Lu bơngai mă huay truh kơ tơdrong aseh pơrăm, lu sư oei ưh kơ chu tơbral 'mơ̆i. Lu sư oei kơkuh kơ yang kơnê̆, pơm kơdih rup yang păng maih păng hu păng mam kong păng tơmo dah păng 'long. Pơm kơdih rup mă ưh kơ 'bôh, ưh kơ kơtơ̆ng, ưh kơ gơh yak, 'noh boih kơkuh khan yang.

²¹Tơdrong lu sư pơlôch đe kư̆m ưh kơ chu tơbral, oei pơlôch đe hơnơ̆ng, oei pơm pơjâu chă sol đe, ngôi pơyô kư̆ kă, chă tơtông tơmam đe.