Read bahnar Ru 1 Bible Online

Ru 1 - bahnar bible

Ru 1

¹Lăm chăl lu kră sek tơlang pơgơ̆r đei pơngot rơwĕt tih lăm dêh char Juđê, đei minh 'nu bơngai đơ̆ng pơlei Betlehem dêh Juđê, sư chông ba akăn păng 'bar 'nu kon năm truh tơ dêh Môap na lu sư oei tơ noh.

²Bơngai drŏ-nglo anăn Êlimêlek, akăn sư anăn Naômi, 'bar 'nu kon drŏ-nglo anăn Makhlôn păng Kiliôn. Lu sư đơ̆ng bơngai Êphrat, pơlei Betlehem, dêh Juđê. Lu sư năm tơ teh đak Môap păng oei tơ noh.

³Mă-lei Êlimêlek klo Naômi lôch, achăng akăn sư păng 'bar 'nu kon tơdăm sư.

⁴Bre kon sư chă akăn oei kơ adruh Môap; minh 'nu anăn Orpa, minh 'nu noh anăn sư Rut; lu sư oei tơ noh dang mơjĭt sơnăm.

⁵Đơ̆ng rŏng kơ noh Mahlơn păng Kiliôn bre sư kư̆m lôch, achăng lê̆ mĕ sư Naômi pă đei klo pă đei kon.

⁶Kơplah noh Naômi kơtơ̆ng khan Kră Yang đei tơgŭm kon pơlei sư, tơmam sa phĭ mah, na sư hăm bre mŏ mai sư iung lĕch đơ̆ng dêh Môap wih brŏk tơ dêh char sư kơdih.

⁷Thoi noh na sư achăng lê̆ pơlei mă sư oei noh na wih brŏk tơ dêh char Juđê hăm bre mŏ mai sư.

⁸Naômi khan kơ bre mŏ mai sư thoi âu: Năm bĕ măr iĕm wih brŏk tơ hnam mĕ iĕm kơdih. Apinh Kră Yang ăn kơ măr iĕm pŭn hiôk, kư̆m thoi măr iĕm đei pơm 'lơ̆ng kơ inh hăm lu bơngai lôch noh.

⁹Hơpơi kơ Kră Yang ăn kơ măr iĕm tơdrong chơt hiôk hăm klo hle. Đơ̆ng noh sư kuăr chŭm bre mŏ mai sư na bre mŏ mai sư nhơ̆m.

¹⁰Bre mŏ mai sư khan: Ưh ôh nhi gô brŏk kiơ̆ tơ dêh char ih.

¹¹Naômi tơl: Ơ mŏ hơdruh, brŏk bĕ tơ hnam mĕ iĕm. Năm kiơ̆ inh wă pơm kiơ? Dơnŏ khan inh oei đei kon dơ̆ng lei na gô pơm klo măr iĕm?

¹²Ơ bre mŏ adruh măr iĕm brŏk bĕ, wih bĕ, yua kơ inh đĭ kră boih ưh pă đei kon dơ̆ng. Mă đơ̆ng inh khan, inh oei đei hơmĕng kơsơ̆ âu kơnh inh gô đei klo, mă khan inh đei hơiơch kơ 'bar 'nu kon drŏ-nglo dơ̆ng,

¹³na măr iĕm wă kĕ gŏk gô truh bre sư 'lŏ tơ̆l? Măr iĕm wă ưh kơ chă klo nai hloi hă? Ưh ôh, ơ bre mŏ adruh, tơdrong chhŭr nuih ơh sơ'ngon inh hloh kơ măr iĕm, yua kơ Kră Yang yơ̆r ti Sư pơrăm inh.

¹⁴Na lu sư nhơ̆m dơ̆ng, đơ̆ng noh Orpa chŭm tơnei sư na tơklah; mă-lei Rut sư kiơ̆ tơnei sư Naômi.

¹⁵Naômi khan dơ̆ng kơ Rut thoi âu: Ih lăng bĕ, oh ih sư brŏk tơ pơlei păng yang sư kơdih, ih brŏk thoi mŏ ih bĕ.

¹⁶Mă-lei Rut tơl sư thoi âu: Ih 'nĕ pă athei inh tơklah đơ̆ng ih, yua kơ ih năm tơ yơ inh gô kiơ̆ ih tơ noh; ih oei tơ yơ inh gô oei hơdai ih tơ noh; kon pơlei ih kư̆m jing kon pơlei inh mơ̆n; Kră Yang 'Bok Kei-Dei ih kư̆m jing Kră Yang 'Bok Kei-Dei inh mơ̆n;

¹⁷ih lôch tơ yơ, inh kư̆m wă lôch păng 'bŭ hơdai ih tơ noh. Mă khan tơdrong kiơ pha 'nguaih kơ tơdrong lôch wă plah inh đơ̆ng ih. Apinh Kră Yang ăn tơdrong gleh truh tơ inh.

¹⁸'Bơ̆t Naômi kơtơ̆ng păng băt kơ sư wă kiơ̆, na sư ưh pă athei dơ̆ng.

¹⁹Thoi noh na bre sư năm hơdai truh tơ pơlei Betlehem. Kơplah bre sư truh tơ pơlei Betlehem đĭ-đăng bơngai lăm pơlei 'bôh 'brơ̆k mơnat, lu drŏ-kăn tơpinh băl, noh hăm trŏ kơ Naômi ưh?

²⁰Na sư tơl lu sư khan. 'Nĕ pă krao inh anăn Naômia dơ̆ng krao inh anăn Marab yua kơ Tơ'ngla Mơsêh Mơyang ăn kơ inh đei tơdrong chhŭr nuih.

²¹Inh weh đơ̆ng âu sơ̆ inh đei tơm tơdrong, mă-lei inh brŏk âu brŏk tơpang ti hoh. Kră Yang tuh ăn kơ inh tơdrong gleh glăn păng Tơ'ngla mơsêh mơyang pơm kơ inh pơmat-tat.

²²Naômi hăm Rut, bơngai Môap, mŏ mai sư yak hơdai sư. Bre sư đơ̆ng char Môap, truh tơ pơlei Betlehem kơplah bơyan wă jê̆ kĕch 'ba.