Read bahnar Ru 3 Bible Online

Ru 3 - bahnar bible

Ru 3

¹Naômi mă tơnei Rut khan kơ Rut: Ơ mŏ, inh wă athei chă kơ ih anih hnam, wă kơ ih chơt hiôk.

²Ih băt boih 'Bôô, yua kơ ih đei kiơ̆ hơdai boih lu đam sư 'Bôô noh kơtum bơ̆n 'mơ̆i, măng âu kơnh sư păng lu jang kơ sư wă năm um pơliĕng 'ba tơ anih preh 'ba.

³Thoi noh ih năm 'nhao hơrao hơpĕch bĕ, pik đak pơgang 'bâu phu păng hrŭk hơbĕn ao mă 'lơ̆ng, na jur năm tơ anih preh 'ba sư kơplah sư sŏng sa tam mă đang ih 'nĕ ăn kơ sư 'bôh ih.

⁴Mưh sư wă năm 'bĭch, ih athei lăng tông sư 'bĭch 'bơ̆t yơ, đơ̆ng noh ih năm pơih khan 'bơ̆t jơ̆ng sư, ih 'bĭch hloi 'bơ̆t jơ̆ng sư, sư gô khan kơ ih pơm kiơ kơnh.

⁵Rut tơl, inh gô pơm kiơ̆ dôm tơdrong ih đei khan kơ inh.

⁶Đơ̆ng noh sư jur tơ anih preh 'ba păng pơm kiơ̆ dôm tơdrong tơnei sư pơkă kơ sư.

⁷Đang kơ sŏng sa boih 'Bôô jơhngơ̆m sư hiôk dêh, sư năm 'bĭch tep tơ cheng pôi 'ba, Rut năm chơlon hơdar hơdar pơih khăn 'bơ̆t jơ̆ng sư na 'bĭch hloi.

⁸Tŏk-bŏk măng 'Bôô kơdrăt plơ̆ akâu sư lăng 'bôh minh 'nu drŏ-kăn 'bĭch 'bơ̆t jơ̆ng sư!

⁹Sư apinh, bu hah? Inh Rut, đam drŏ-kăn ih, apinh ih tơsu ăn kơ inh khăn, yua kơ ih kơtum jê̆, ih trŏ kơ huai iŏk inh.

¹⁰'Bôô khan, ơ mŏ adruh apinh Kră Yang ăn kơ ih tơdrong pŭn hiôk! Ơ mŏ adruh tơdrong ih pơm 'nâu 'lơ̆ng hloh kơ adrol, yua kơ ih ưh kơ wă kiơ̆ lu tơdăm mơlôh mă sư mơdrŏng dah dơnuh.

¹¹Ih 'nĕ kơ hli, inh gô pơm ăn kơ ih dôm tơdrong ih apinh yua kơ đĭ-đăng kon pơlei băt kơ ih drŏ-kăn iơ̆m dim gơh găt.

¹²Trŏ boih inh jing kơtum jê̆, mă-lei đei minh 'nu kơtum jê̆ hloh kơ inh.

¹³'Bĭch bĕ măng âu tơ âu, pơgê dơning inh gô năm apinh tơdah bơngai noh sư wă huai iŏk ih, sư athei huai iŏk bĕ, mă-lei tơdah bơngai noh ưh kơ lăp đon wă huai iŏk ih, lei inh gô pơkă 'bơ̆t anăp Kră Yang mă arih ling-lang tơpă inh gô huai iŏk ih! Ih tep bĕ tơ âu dĭng truh pơgê dơning.

¹⁴Thoi noh Rut tep 'bơ̆t jơ̆ng sư ei dĭng truh pơgê, 'Bôô khan: 'Nĕ ăn kơ bu băt minh 'nu drŏ-kăn năm tơ anih preh 'ba âu, na Rut iung đơ̆ng hrôih oei măng kuă ăn đe băt.

¹⁵'Bôô khan dơ̆ng: Ba ao ih oei hrŭk noh bơyar bĕ na chĕp mă kơjăp na sư bơyar hloi ao. 'Bôô tuh ăn kơ sư 'ba tơ'bâu, tơdrâu hnŏng ăn kơ sư pŭ ba, na wih brŏk tơ pơlei sư.

¹⁶Kơplah Rut brŏk truh tơ hnam tơnei sư, tơnei sư apinh, ih năm hăm đei tơdrong truh kơ ih thoi yơ mŏ? Rut roi kơ tơnei sư dôm tơdrong mă 'Bôô đei tơgŭm sư khan.

¹⁷Sư đei tŏng ăn kơ inh tơdrâu hnŏng 'ba tơ'bâu âu păng pơkă khan ih ưh kơ gơh brŏk tơ tơnei ih tơpang ti hoh đĕch ôh.

¹⁸Naômi khan dơ̆ng: Ơ mŏ adruh inh, oei gô bĕ tơ âu dĭng truh tơdrong noh thoi yơ. Tơdah tơdrong âu ưh tam mă keh đang, yua kơ tơdrong noh sư ưh tam mă tôch dâu, mă-lei sư gô pơm keh đang năr âu.