Read bahnar Ru 4 Bible Online

Ru 4 - bahnar bible

Ru 4

¹'Bôô năm tŏk tơ 'măng jang pơlei păng hơ-oei tơ noh. Kơplah bơngai mă gơh huai iŏk Rut năm rok 'noh, bơngai mă 'Bôô roi na 'Bôô khan: Ơ 'nhŏng năm tơ âu hơ-oei ngôi dâu bĕ na sư hơ-oei hloi.

²'Bôô pơtơm mơjĭt 'nu lu đe kră lăm pơlei na sư khan: Ngôi 'bơ̆t dâu bĕ, na lu kră hơ-oei hloi.

³'Bôô khan hloi kơ bơngai mă gơh huai iŏk Rut thoi âu: Naômi, bơngai mă 'nao brŏk đơ̆ng char Môap, sư roi khan wă tĕch teh 'nhŏng lu bơ̆n Êlimêlek.

⁴Na inh roi tơbăt kơ ih, apinh ih răt iŏk bĕ teh noh, 'bơ̆t anăp lu đe ngôi tơ âu păng 'bơ̆t anăp lu kră pơlei inh. Tơdah ih wă ih huai iŏk bĕ. Mă-lei tơdah ưh ih roi kơ inh băt. Yua adrol kơ ih ưh kơ đei bu gơh huai iŏk, đơ̆ng rŏng kơ ih trŏ kơ inh boih gơh. Bơngai noh drơ̆ng: Inh gô huai iŏk.

⁵'Bôô khan dơ̆ng: Mưh năr ih răt iŏk mir đơ̆ng Naômi, lei ih athei iŏk hloi Rut bơngai Môap, klo sư lôch wă pơtrơp ioi wei iŏk mŭk tơmam bơngai lôch noh.

⁶Bơngai mă gơh huai iŏk tơl sư: Mưh lei inh ưh kơ gơh huai iŏk ôh, kơnh hli kơ tơmam inh hiong. Iŏk bĕ kơ ih tơmam mŭk mă trŏ kơ inh huai iŏk ră, yua kơ inh ưh kơ đei huai iŏk?

⁷'Nâu tơdrong juăt kră sơ̆ bơngai Isơrael wă kơ huai iŏk dah tơplih băl: Wă pơsĭt tơdrong ei, bơngai âu plôh chơkhŏ sư ăn kơ bơngai noh; âu jing tơdrong wă pơsĭt nơ̆r pơkăm lu bơngai Isơrael.

⁸Thoi noh bơngai mă trŏ kơ huai iŏk khan kơ 'Bôô: Iŏk bĕ kơ ih, đơ̆ng noh sư plôh chơkhŏ sư ăn kơ 'Bôô.

⁹Đơ̆ng noh 'Bôô khan kơ lu kră păng đĭ-đăng kon pơlei thoi âu: Năr âu 'bơ̆t tơm măt lu iĕm inh răt iŏk boih đơ̆ng Naômi dôm mŭk tơmam Êlimêlek păng đĭ-đăng tơmam đơ̆ng Kiliôn păng Mahlơn.

¹⁰Păng Rut adruh bơngai Môap inh iŏk pơm akăn wă pơtrơp anăn bơngai lôch păng mŭk tơmam, wă kơ anăn bơngai lôch huay kơ hiong ôh đơ̆ng lu 'nhŏng oh sư păng đơ̆ng kon pơlei pơla sư; năr âu lu iĕm pơsĭt kơ tơdrong âu.

¹¹Đĭ-đăng lu kon pơlei păng lu kră 'bơ̆t 'măng jang ei wang tơl thoi âu: Đĭ-đăng lu nhôn pơsĭt tơdrong noh. Hơpơi kơ Kră Yang ăn bơngai drŏ-kăn mơ̆t oei lăm hnam ih nhen thoi bre Rachel păng Lêa, bre sư pơjing boih adrĕch Isơrael. Ăn kơ ih arih jang sa rai tŏk lăm char Êphratha păng anăn ih đei ư-ang lăm Betlehem.

¹²Hơpơi kơ Kră Yang ăn kơ ih đei kon sâu đơ̆ng bơngai adruh âu, thoi adrĕch Phêrês kon Tamar hăm Juđa.

¹³Thoi noh 'Bôô iŏk Rut pơm akăn, bre sư oei hơdai, Kră Yang ăn kơ Rut anăp na tơpŭ kơ minh 'nu kon drŏ-nglo.

¹⁴Lu drŏ-kăn khan kơ Naômi trŏ bơnê kơ Kră Yang, Sư ưh kơ đei lê̆ ih ôh; ăn hloi kơ ih đei bơngai trŏ kơ huai iŏk; hơpơi anăn kon hơ'lơ̆p noh đei ư-ang lăm dêh char Isơrael.

¹⁵Sư gô jing minh 'nu bơngai pơlung tơiung ih, sư gô wei rong ih lăm năr ih kră, yua kơ sư kon mŏ mai ih bơngai 'mêm kơeng kơ ih, Rut mŏ mai ih gĭt hloh kơ tơpơh 'nu kon drŏ-nglo.

¹⁶Thoi noh Naômi pơk kon hơ'lơ̆p 'bơ̆t kơtơh sư păng wei rong.

¹⁷Lu bơngai drŏ-kăn rông 'bôt lu sư anăn ăn kơ bơngai hơ'lơ̆p drŏ-nglo âu Ôbêt, na khan: Đe tơpŭ boih minh 'nu hơ'lơ̆p drŏ-nglo ăn kơ Naômi, Ôbêt sư jing 'bă kơ Jese, 'bok tơm Đawit.

¹⁸'Nâu adrĕch adrung Phêrês: Phêrês pơjing Hêsrôn.

¹⁹Hêsrôn pơjing Aram; Aram pơjing Manadap,

²⁰Manadap pơjing kơ Nasôn, Nasôn pơjing Samôn,

²¹Samôn pơjing kơ 'Bôô, 'Bôô pơjing Ôbêt;

²²Ôbêt pơjing Jese, Jese pơjing kơ Đawit.