Read bahnar I Sam 1 Bible Online

I Sam 1 - bahnar bible

I Sam 1

¹Đei minh 'nu bơngai drŏ-nglo đơ̆ng pơlei Ramathaim Suphima lăm tơring groi kông Êphraim anăn sư Êlkana, kon drŏ-nglo Jêrôham sâu Êlihu, sâu i Tơhu, sâu ach Sup, bơngai adrĕch Êphraim.

²Sư đei 'bar 'nu akăn; minh 'nu anăn sư Hana, minh 'nu nai anăn sư Pênina. Pêninia đei kon hơ'lơ̆p mă-lei An ưh kơ đei hơ'lơ̆p.

³Rim sơnăm Êlkana lĕch đơ̆ng pơlei sư tŏk năm tơ pơlei Silô akŭm kơkuh păng wă pơyơ̆r tơmam soi kơ Kră Yang Tih Hloh. Tơ noh đei 'bar 'nu kon drŏ-nglo Hêli, bre Hopni păng Phinêhas, pơm 'bok soi Kră Yang.

⁴Năr Êlkana pơyơ̆r tơmam soi sư klah asong minh kơ Pênina akăn sư păng kơ rim 'nu kon drŏ-nglo, kon drŏ-kăn sư.

⁵Na sư asong ăn kơ Hana 'bar yua kơ sư hưch dêh kơ Hana, mă-lei Kră Yang ăn kơ sư hơwŏng.

⁶Pênina jơ̆ păng pơklai jơhngơ̆m sư, yua kơ Kră Yang ăn kơ sư hơwŏng.

⁷Ling-lang thoi noh lăm rim sơnăm; rim wơ̆t Hana tŏk năm tơ hnam Kră Yang Pênina ơh pơklai lăm jơhngơ̆m. Dĭng mah Hana nhơ̆m păng ưh kơ sŏng sa.

⁸Êlkana klo sư khan kơ sư, ơ Hana, yua kơ kiơ ih nhơ̆m? Hăm yua kơ kiơ ih ưh kơ sŏng sa? Yua kơ kiơ jơhngơ̆m ih sơ'ngon? Liơ ih đei inh bơih ưh kơ gĭt hloh kơ đei mơjĭt 'nu kon drŏ-nglo hă?

⁹Đang kơ lu sư sŏng sa tơ pơlei Silô bơih, Hana iung, kơplah noh Hêli, oei ngôi hơ-oei kơpal tang-dŏ jê̆ 'măng mơ̆t tơ hnam Kră Yang.

¹⁰Hana jơhngơ̆m sư rŭng răng ưh kơsŭk sư krao apinh Kră Yang sư nhơ̆m sơ'ngon dêh.

¹¹Sư pơma pơkă khan: Ơ Kră Yang Tih Hloh, tơdah ih lăng mơnat kơ đam drŏ-kăn ih, 'blŏk bĕ kơ inh 'nĕ kơ hiơt kơ inh đam drŏ-kăn ih, mă-lei gô ăn kơ đam drŏ-kăn ih đei minh 'nu kon drŏ-nglo, thoi ei inh gô ăn sư kơ ih Kră Yang đĭ chăl arih sư, ưh kơ gơh yuă dah hơkôih sŏk sư.

¹²Kơplah sư oei krao khan 'bơ̆t anăp Kră Yang, Hêli lăng 'bơ̆r sư.

¹³Hana pơma lăm jơhngơ̆m sư, hơkŭng sư đĕch pơpơ̆; đe ưh kơ đei kơtơ̆ng nơ̆r sư ôh. Na Hêli tơchĕng khan, Hana suai sik.

¹⁴Na Hêli khan kơ sư. Dang yơ ih praih kơ suai sik? Lê̆ pă et.

¹⁵Hana tơl, ưh, ơ yŏng tơ'ngla inh, inh minh 'nu bơngai drŏ-kăn ơh sơ'ngon dêh. Inh ưh kơ đei et sik ôh, kư̆m ưh kơ đei suai mơ̆n, yua kơ inh tơ'bôh đĭ jơhngơ̆m inh kơ Kră Yang.

¹⁶'Nĕ jơ̆ kơ inh đam ih thoi bơngai drŏ-kăn kư̆ kă, yua kơ inh pơma âu dang ei kơlih kơ jơhngơ̆m inh rŭng răng ơh sơ'ngon.

¹⁷Na Hêli khan, năm mă 'lơ̆ng bĕ krao khan bĕ kơ Kră Yang 'Bok Kei-Dei Isơrael ăn kơ ih tơdrong ih krao apinh sư.

¹⁸Sư drơ̆ng, apinh ih ăn kơ inh đam drŏ-kăn ih đei mơnat 'bơ̆t anăp ih. Na Hana wih brŏk păng sŏng sa, muh măt sư ưh pă sơ'ngon bơih.

¹⁹Lu sư iung đơ̆ng hrôih drap kơkuh 'bơ̆t anăp Kră Yang; đơ̆ng noh lu sư wih brŏk tơ hnam lu sư tơ pơlei Rama. Êlkana oei hơdai hăm akăn sư Hana, Kră Yang 'blŏk kơ sư.

²⁰Na truh tơ Hana anăp na tơpŭ kơ minh 'nu kon drŏ-nglo. Krao anăn sư Samuel,b yua kơ sư đei khan, inh đei apinh bơih sư đơ̆ng Kră Yang.

²¹Êlkana păng đĭ-đăng hnam dơnŏ sư tŏk năm wă pơyơ̆r kơ Kră Yang tơmam soi lăm rim sơnăm, wă pơsĭt tơdrong sư đei pơkă bơih.

²²Mă-lei Hana ưh kơ tŏk năm hơdai ôh, sư khan kơ klo sư, gô kon hơ'lơ̆p lê̆ mŏ, inh gô năm chông ba sư, wă kơ sư năm 'bơ̆t anăp Kră Yang păng oei hloi tơ noh ling-lang.

²³Êlkana klo sư khan kơ sư, pơm bĕ thoi ih tơchĕng khan 'lơ̆ng. Gô bĕ dĭng tơ sư lê̆ mŏm. Wă kơ apinh Kră Yang pơsĭt nơ̆r ih pơma. Thoi noh sư oei hnam, rong kon drŏ-nglo noh truh tơ sư lê̆ mŏm.

²⁴Truh tơ sư lê̆ mŏm bơih, Hana chông ba kon sư năm hơdai sư. Păng kư̆m dui ba rơmo tơno pêng sơnăm, minh êphac tơpŭng, minh pơm get akar sik hơmu. Sư chông kon sư tơ hnam Kră Yang tơ pơlei Silô. Kon hơ'lơ̆p sư noh oei 'lơ̆p.

²⁵Lu sư 'bet pơlôch rơmo noh na chông ba hơ'lơ̆p noh tơ Hêli.

²⁶Păng khan: “Ơ yŏng tơ'ngla inh arih ling-lang ơ yŏng inh, inh bơih bơngai drŏ-kăn mă oei dơ̆ng tơ âu 'bơ̆t anăp ih krao apinh Kră Yang.

²⁷Inh krao apinh yua kơ bơngai hơ'lơ̆p âu; Kră Yang ăn bơih tơdrong inh krao apinh sư.

²⁸Na inh pơyơ̆r sư kơ Kră Yang yua; lăm đĭ chăl sư arih dang yơ; sưd noh jing tơmam Kră Yang boih.” Klaih kơ noh lu sư drap kơkuh bơnê kơ Kră Yang tơ noh.