Read bahnar I Sam 10 Bible Online

I Sam 10 - bahnar bible

I Sam 10

¹Samuel iŏk minh gĕl getchai iĕ mong đak rơmă 'bâu phu, na tuh tơ kơ̆l Sôl, đơ̆ng noh chŭm sư păng khan: 'Nâu Kră Yang tuh đak rơmă 'bâu phu kơ ih wă kơ ih pơgơ̆r kon pơlei Sư.

²Năr âu adrol wă weh tơklah đơ̆ng inh, ih gô tơ'bơ̆p 'bar 'nu bơngai drŏ-nglo 'bơ̆t bơsat Rachel tơ pơlei Selsa, dêh Bênjamin; bre sư gô khan kơ ih: Lu aseh akăn mă ih chă noh 'bôh bơih; 'nâu 'bă ih ưh pă bơngơ̆t kơ aseh akăn noh dơ̆ng bơih, mă-lei sư bơngơ̆t kơ măr iĕm dơ̆ng na khan: Inh wă pơm liơ kơ kon drŏ-nglo inh âu?

³Đơ̆ng noh ih kư̆ yak năm, truh tơ tơm 'long kôih Tabôr, ih gô tơ'bơ̆p pêng 'nu năm tơ pơlei Bethel. Wă kơkuh kơ Kră Yang 'Bok Kei-Dei, minh 'nu chĕp ba pêng tŏ kon bơbe tơno, minh 'nu chĕp ba pêng tŏ 'bĕng păng bơngai mă pêng chĕp ba minh tŏ get akar sik.

⁴Lu sư gô kơkuh kơ ih păng ăn kơ ih 'bar tŏ 'bĕng. Lei ih athei iŏk đơ̆ng lu sư.

⁵Đơ̆ng noh ih gô truh tơ Gibêah Elohima, jơ̆ minh pơm anih kơđông đe Philistin; kơplah ih mơ̆t bơih tơ pơlei, ih gô tơ'bơ̆p minh khŭl 'bok khan lê̆ adrol jur đơ̆ng anih kơkuh, lu sư suang reh brŏ dung teh hơgơ̆r iĕ, hlôm 'lal păng reh tĭng-nĭng năm adrol kơ ih; Lu sư gô khan lê̆ adrol.

⁶Yang bơhngol Kră Yang gô mơ̆t lăm ih gô suang khan lê̆ adrol hăm lu sư, ih gô jing bơngai nai.

⁷Kơplah ih 'bôh dôm tơdrong tơdra âu truh, na ih athei pơm kiơ̆ trŏ dôm tơdrong sư tơ'bôh. Ih gô băt Kră Yang 'Bok Kei-Dei oei hơdai ih!

⁸Đơ̆ng noh, ih athei năm jur adrol kơ Inh tơ Gilgal, inh gô kiơ̆ ih tơ noh wă pơyơ̆r tơmam soi 'buh păng tơmam soi băt bơnê. Ih athei gô Inh truh tơ noh tơpơh năr Inh gô bơtho ih dôm tơdrong ih athei pơm.

⁹Lăp Sôl wă weh đơ̆ng Samuel, Kră Yang 'Bok Kei-Dei tơplih jơhngơ̆m Sôl păng dôm tơdrong tơdra đei roi lê̆ adrol đĭ-đăng 'blep trŏ kơ lăm năr noh.

¹⁰Wă Sôl truh tơ Gibêah, đei minh khŭl 'bok khan lê̆ adrol sơng sư. Yang Bơhngol Kră Yang mơ̆t lăm sư, sư kư̆m khan lê̆ adrol hơdai lu sư.

¹¹Kơplah lu bơngai đêl juăt băt kơ Sôl adrol, 'bôh sư khan lê̆ adrol hăm lu 'bok khan lê̆ adrol, na tơjet dih băl khan: Đei tơdrong kiơ truh kơ kon drŏ-nglo Kis noh kih? Sôl kư̆m mơ̆t hơdai hăm bơngai khan lê̆ adrol mơ̆n dah kiơ?

¹²Đei bơngai lăm Gibêah tơl: 'Bă lu sư bu hah? Na đei nơ̆r đơ̆ng sơ̆ khan: Sôl kư̆m dai bơngai khan lê̆ adrol dah kiơ?

¹³Đơ̆ng rŏng kơ Sôl ưh pă khan lê̆ adrol, na sư tŏk tơ anih kơjung kơpal groi.

¹⁴Ma Sôl jet sư păng đam sư: Măr iĕm năm tơ yơ? Sôl drơ̆ng sư: Nhi chă lu aseh iĕ akăn Jrok; ưh kơ 'bôh; na nhi năm apinh Samuel.

¹⁵Ma Sôl pơma dơ̆ng: Apinh măr iĕm roi tơbăt kơ inh dôm tơdrong Samuel đei khan kơ măr iĕm.

¹⁶Sôl roi kơ ma sư: Sư đei roi kơ nhi khan aseh iĕ akăn măr iĕm 'bôh bơih. Mă-lei Sôl ưh kơ đei roi gah Samuel tơ'bôh kơ sư tơdrong jang wă pơm pơtao ôh.

¹⁷Samuel krao akŭm đĭ kon pơlei Isơrael năm tơ Kră Yang tơ Mispa,

¹⁸na khan kơ bơngai Isơrael: Kră Yang 'Bok Kei-Dei bơngai Isơrael khan thoi âu: Inh đei chông ba bơngai Isơrael lĕch hlôi đơ̆ng Êyiptơ, inh đei dŏng pơklaih lu iĕm đơ̆ng ti đe Êyiptơ păng đơ̆ng ti dôm lu pơtao pơgŏ pơđep lu iĕm.

¹⁹Mă-lei lu iĕm sơngah kơ Kră Yang 'Bok Kei-Dei lu iĕm, Tơ'ngla mă dŏng pơklaih iĕm đơ̆ng dôm tơdrong pơmat-tat păng hli hlơt; Lu iĕm đei apinh: Ăn kơ nhôn minh 'nu pơtao wă kơ pơgơ̆r lu nhôn! Na dang ei, hơmet bĕ dơ̆ng 'bơ̆t anăp Kră Yang pơrĕng kiơ̆ adrĕch adrung păng kiơ̆ kơtum kơtŏng.

²⁰Samuel athei đĭ-đăng adrĕch Isơrael năm jê̆, na sư hlang lăng trŏ kơ adrĕch Bênjamin.

²¹Sư athei adrĕch Bênjamin năm jê̆ pơrĕng kiơ̆ kơtum kơtŏng, đơ̆ng noh hlang trŏ kơ hnam dơnŏ Matri. Đơ̆ng noh hlang lăng trŏ kơ Sôl kon drŏ-nglo Kis. Đe chă Sôl mă-lei ưh kơ 'bôh.

²²Na lu sư jet Kră Yang dơ̆ng: Hăm pă đei bu nai năm tơ âu dơ̆ng? Kră Yang tơl: To, sư ôn lăm anih lê̆ tơmam noh.

²³Đe kơdâu chă sư tơ noh. Na chông Sôl lĕch năm tơ anăp tŏk-bŏk kon pơlei, sư kơjung hloh kơ đe, đe dang kiơ̆ hơngiĕng sư đĕch.

²⁴Samuel khan kơ kon pơlei: Lu iĕm lăng 'nâu bơngai mă Kră Yang rơih iŏk? Lăm đĭ-đăng kon pơlei hoh-hoy ưh kơ đei bu dang sư ôh. Đĭ-đăng kon pơlei jreo păng ôr khan: Ăn kơ pơtao arih ling-lang!

²⁵Samuel bơtho tơ'bôh tơdrong juăt kơ pơtao 'bơ̆t anăp kon pơlei, chih tơ sơ̆p hla bơar dan 'bơ̆t anăp Kră Yang. Đơ̆ng noh, Samuel ăn kơ kon pơlei brŏk tơ hnam lu sư kơdih kơdih.

²⁶Sôl kư̆m brŏk tơ hnam sư kơdih tơ Gibêah, đei lu linh pran kơtang mă Kră Yang 'Bok Kei-Dei ăn lu sư kư̆m brŏk kiơ̆ Sôl.

²⁷Mă-lei đei lu bơngai mơ'nah pơjăm sư khan: Sư 'noh khan wă dŏng tơgŭm yă kiơ đei đăi? Lu sư pơjăm lăng Sôl ưh kơ rơ-a, ưh kơ wă chĕp ăn kơ sư tơmam kiơ ôh. Mă-lei Sôl sư ngăn hreh đĕch.