Read bahnar I Sam 11 Bible Online

I Sam 11 - bahnar bible

I Sam 11

¹Nahas, pơtao bơngai Ammôn, pơgơ̆r lu linh năm wang dăr pơlei Jabes lăm Gileat. Đĭ-đăng kon pơlei lăm Jabes năm apinh Nahas: Apinh ih ăn kơ nhôn kĭ pơgơ̆p hăm ih, na lu nhôn gô bơ̆jang kơ ih.

²Nahas pơtao bơngai Ammôn tơl: Inh gô kĭ pơgơ̆p hăm lu iĕm kiơ̆ thoi âu: Ăp kơ đĭ-đăng lu iĕm ăn kơ inh kuek lê̆ măt minh pah gah 'ma, wă pơm mơlâu kơ đĭ-đăng bơngai Isơrael.

³Đĭ-đăng lu đe kră pơlei Jabes khan kơ sư: Apinh ih ăn kơ lu nhôn lăm tơpơh năr wă kơ, lu nhôn gô wơh bơngai năm chă khan jơ̆p-jang kon pơlei Isơrael; tơdah ưh kơ đei bu dŏng pơklaih lu nhôn, lei lu nhôn gô kŭp kơ̆l yơ̆r ti kơ ih.

⁴Thoi noh lu bơngai đei wơh ei năm tơ Gibêah, pơlei đe Sôl, roi dôm nơ̆r ei ăn kơ kon pơlei pơla kơtơ̆ng. Đĭ-đăng kon pơlei nhơ̆m ôr.

⁵Kơplah ei, Sôl 'nao wă brŏk đơ̆ng chŭn, năm đơ̆ng rŏng kơ rơmo sư; na sư jet: Iĕm nhơ̆m kơ kiơ hah? Na đe roi kơ sư dôm nơ̆r đơ̆ng pơlei Jabes năm chă khan ei.

⁶Lăp Sôl kơtơ̆ng tơdrong noh, sư đei Yang Bơhngol đơ̆ng Kră Yang 'Bok Kei-Dei pơtrŭt sư păng sư hil blĕk ơh dêh.

⁷Sư rôp minh hơgrop rơmo, sư kăt soch lê̆ na wơh bơngai chă asong jơ̆p-jang kơ dêh char Isơrael păng hăm nơ̆r tơbăt: Bơngai bu ưh kơ wă kiơ̆ Sôl păng Samuel, na lu rơmo lu sư kư̆m gô kăt soch thoi noh mơ̆n. Kră Yang pơm kơ kon pơlei băt hli kơ Sôl, na đĭ-đăng lu sư năm kiơ̆ sư.

⁸Sôl akŭm lu sư tơ pơlei Bêsek; bơngai Isơrael pêng-hrĕng rơbâu, bơngai Juđa pêng-jĭt rơbâu 'nu.

⁹Sư khan kơ bơngai đe wơh năm đơ̆ng pơlei Jabes lăm char Gileat: Năm roi bĕ: 'Năr dơ̆ng tŏ dơning, lu iĕm gô đei tơdrong dŏng pơklaih. Lu bơngai đe wơh ei wih brŏk roi dôm nơ̆r ei kơ kon pơlei Jabes. Kon pơlei kơtơ̆ng thoi ei na lu sư chơt hiôk,

¹⁰păng năm khan kơ Nahas pơtao Ammôn: Năr dơning lu nhôn kŭp kơ̆l yơ̆r ti kơ iĕm, lu iĕm wă pơm kiơ kơ lu nhôn mơ̆ng kơ iĕm wă.

¹¹Mă-lei pơgê dơning, Sôl klah asong kon pơlei pơm pêng khŭl, năm blah đe Ammôn păng pơlôch đĭ lu sư dĭng truh tơ 'năr dơ̆ng. Lu kon pơlei Ammôn kơdâu hơlah hơlang kơdih kơdih.

¹²Kon pơlei apinh Samuel: Đe bu khan: Sôl khan wă pơm pơtao pơgơ̆r bơ̆n hah? Apinh ih pơjao lu bơngai 'noh ăn kơ nhôn pơlôch bĕ.

¹³Mă-lei Sôl tơl lu sư: Năr âu lu bơ̆n ưh kơ gơh pơlôch bu; yua kơ năr âu Kră Yang đĕch ăn kơ bơngai Isơrael đei jơnei tih.

¹⁴Samuel khan kơ kon pơlei pơla thoi âu: Bĕ bơ̆n năm tơ Gilgal wă hơmet ming pơk Sôl pơm pơtao.

¹⁵Đĭ-đăng kon pơlei wang năm tơ Gilgal; tơ ei, 'bơ̆t anăp Kră Yang lu sư pơk Sôl pơm pơtao. Tơ ei lu sư pơyơ̆r tơmam soi bơnê kơ Kră Yang. Đơ̆ng noh, Sôl păng đĭ-đăng kon pơlei Isơrael et sa chơt hiôk pă băt dang yơ.